ކުރީގެ ރައީސް ޑރ. މުހައްމަދު ވަހީދު ހަސަން ޕީޕީއެމް އިން ވަކިވެވަޑައިގެންފިއެވެ.
ޕްރޮގްރެސިވް ޕާޓީ އޮފް މޯލްޑިވްސް، ޕީޕީއެމްގެ އެޑްވައިޒަރުގެ ގޮތުގައި ހުންނެވި ޑރ. ވަޙީދު ޕީޕީއެމުން އިސްތިއުފާދެއްވިކަން ހާމަކުރެއްވީ ޓްވިޓަރ ގައެވެ.
އިނގިރޭސިބަހުން ދެންމެ ޢާންމުކުރެއްވި ބަޔާނެއްގައި ވިދާޅުވެފައިވަނީ މީގެ ދިހަ އަހަރުގެ ކުރިން ޕީޕީއެމްއާ އެ މަނިކުފާނު ގުޅިވަޑައިގަތީ ގައުމުގައި ހަމަޖެހުން ގާއިމުކޮށް، ތަރައްގީގެ މަސައްކަތްތައް ކުރިއަށް ގެންދެވުމަށް ކަމަށެވެ.
ޑރ ވަހީދު ވިދާޅުވީ އޭގެ ތެރެއިން ގިނަ ކަންކަން ޕްލޭނާ އެއްގޮތަށް ހާސިލުވި އިރު، ރާއްޖޭގެ އިގުތިސާދާއި ޑިމޮކްރަސީ ހަރަދަނާކޮށް ރައްޔިތުންގެ ފާގަތިކަން އިތުރު ކުރަން އިތުރު މަސައްކަތްތަކެއް ކުރަން އަދިވެސް އެބަހުރި ކަމަށެވެ.
ހުރިހާ ދިވެހިންނަށް ކާމިޔާބީ ހޯދައިދިނުމަށް، އެމަނިކުފާނުގެ ހުނަރާއި ތަޖުރިބާއާއި އިލްމު ބޭނުންކުރެވޭނެ ހަމަޖެހޭ، ނަޒާހަތްތެރި އަދި ތެދުވެރި ޖާގައެއް މި ވަގުތަށް މުހިންމުކަމަށް، ގަބޫލުފުޅުކުރެއްވޭ ކަމަށް ޑރ ވަހީދު ވިދާޅުވިއެވެ.
ޑރ. ވަހީދު ވިދާޅުވީ އެ މަނިކުފާނު އަބަދުވެސް މަސައްކަތް ކުރައްވާނީ ދިވެހިންގެ ކުރިއެރުމާއި ގައުމުގެ މިނިވަންކަމާއި އިސްތިގުލާލު އަދި އިޖުތިމާއީ އިގުތިސާދީ ކުރިއެރުމަށެވެ.
ރައީސް ވަހީދު ޕީޕީއެމުން މި ވަކިވެވަޑައިގެންނެވީ ރައީސް ޔާމީނަށް ރިޔާސީ ރޭހުން ފުރުސަތު ލިބިވަޑައިނުގަންނަވާ ހާލަތެއްގައި ރިޔާސީ ކެންޑިޑޭޓަކަށް ވެވަޑައިގަތުމަށް ޝައުގުވެރިކަން ފާޅު ކުރައްވާފައި ވަނިކޮށެވެ. އަދި މިފަހަރުގެ ރިޔާސީ އިންތިހާބުގެ ކަންތައްތަކުގެ ތެރެއިން ޑރ ވަހީދުގެ ކުށުގެ ރެކޯޑު ސާފުކުރެއްވުމަށްވެސް ހުށަހެޅުނެވެ.
