އައްޑޫ ސިޓީ ހިތަދޫގައި ރޭ ހިންގައިފައިވާ އަލިފާނުގެ ހާދިސާތަކާ ގުޅުންހުރި މީހުން ހޯދުމުގެ މަސައްކަތް ކުރައްވަމުން ގެންދަވާ ކަމަށް ފުލުހުން ވިދާޅުވެއްޖެއެވެ.
ސްޕްރިންޓެންޑެންޓް އޮފް ޕޮލިސް އަހުމަދު ޝިފާން ވިދާޅުވީ ރޭ ހިންގި އަލިފާނުގެ ހާދިސާ ވަރަށް ސީރިއަސްކޮށް ބައްލަވަމުން ގެންދަވާ ކަމަށެވެ. ހިތަދޫގައި ރޭ ވަނީ ތިން ތަނެއްގައި ރޯކޮށްފައެއެވެ. އޭގެ ތެރެއިން އެރަށު ދޮންލަފަރުގޭގައި ރޯކޮށް އެގެއަށްވަނީ ވަރަށްބޮޑެތި ގެއްލުން ވެފައެވެ.
އޭގޭގައި އަލިފާން ރޯކޮށްލިއިރު އެގޭގެ ކޮޓަރިއެއްގައި އަންހެނަކު ނިދާއިއޮތެވެ. އޭނާ ސަލާމަތްވީ ބައެއްގެ އެހީގައި އެގޭ ކުޑަދޮރެއް ހަލާކޮށް ބޭރަށް ނުކުމެގެންނެވެ. އެގޭގެ އިތުރަށް އެރަށު ވައިޓްހީރާއި، ރަސްރީތީގައިވެސް ރޭވަނީ ރޯކޮށްލައިފައެވެ.
"ރޭ އައްޑޫސިޓީގެ ގެއަކާއި ދެ ތަނެއް އަލިފާން ރޯކޮށްފައިވާކަން އަޅުގަނޑު ފާހަގަކޮށްލަން. މި މައްސަލަތަކުގެ ތަހުގީގު ވަރަށް ސީރިއަސްކޮށް މިދަނީ ކުރަމުން. މިކަމާ ގުޅުންހުރި އަދި ޝާމިލްވާ މީހުން ހޯދުމުގެ މަސައްކަތް ކުރަމުންދާ ކަމަށް ދަންނަވަން،" ޝިފާން ވިދާޅުވިއެވެ.
ޝިފާން ވިދާޅުވީ ގައުމުގެ ސުލްހަ މަސަލަސްކަން ނަގާލައި ހަމަނުޖެހުމަށް މިހާރުވެސް އެކިފަރާތްތަކުން މަސައްކަތް ކުރަމުންދާކަން ފާހަގަކުރެވިފައިވާ ކަމަށެވެ. އެފަދަ ކަންކަން ހުއްޓުވައި ގައުމު އަމާންތަނެއްގެ ގޮތުގައި ބޭއްވުމަށް ދިވެހި ފުލުހުން ތިބޭނީ އެކަތިގަނޑެއްގެ ގޮތުގައި ކަމަށްވެސް އޭނާ ވިދާޅުވިއެވެ.
އެހެންވީމާ ގައުމުގެ ސުލްހަމަސަލަސްކަން ނަގާލައި ގައުމު ހަލަބޮލިކޮށް ހަމަނުޖެހުން އުފެއްދުމަށް އެކިފަރާތްކުން ކުރަމުންދާ މަސައްކަތައް ހުއްޓާލުމަށް އޭނާވަނީ އިލްތިމާސް ކުރައްވައިފައެވެ.
ރޭ އަލިފާން ރޯކޮށްލި ގެއިން އަލިފާން ނިއްވާލެވިފައިވަނީ އެމްއެންޑީއެފް ފަޔަރު ނައިސް ގަޑިއަކަށްވުރެ ގިނައިރު މަސައްކަތް ކޮށްގެންނެވެ.
