ދިވެހި އަދަބިއްޔާތަށް ޚިދުމަތް ކުރެއްވި އައިމިނަތު އައްބާސް އަވަހާރަވެއްޖެއެވެ.
އުމުރުން 69 އަހަރުގައި އޭނާ އަވަހާރަވީ އޭޑީކޭ ހޮސްޕިޓަލުގައި ކެންސަރު ބައްޔަށް ފަރުވާ ހޯއްދަވަމުން ގެންދަވަނިކޮށް މިއަދު ހެނދުނުއެވެ.
ކުރީގެ މަޝްހޫރު ޅެންވެރިޔާ، ގ. ޑޭޒީމާގޭ، އާމިނަތު ފާއިޒާގެ ދަރިކަނބަލުން އާމިނަތު އައްބާސް ވަނީ ޅެންހެދުމުގެ ބައެއް މުބާރާތްތަކާއި ލަވަ މުބަރާތްތަކުގެ އިތުރުން ފިލްމު ފެސްޓިވަލާއި ޅެމާއި ލަވައިގެ ފެންވަރު ބެއްލެވުމާއި އިންސާފު ކޮށްދެއްވުމުގެ މަސައްކަތް ކޮށްދެއްވާފައެވެ.
އޭނާއަށް ވަނީ އިސްލާމީ ކަންތައްތަކާއި ބެހޭ އެންމެމަތީ މަޖިލީހުން 1996 ވަނަ އަހަރު ބޭއްވި ދީނީ ޅެންހެދުމުގެ މުބާރާތުން އެއްވަނަ ހޯއްދަވާފައެވެ. އަދި ދިވެހިބަހާއި ތާރީޚަށް ޚިދުމަތްކުރާ ގައުމީ މަރުކަޒުން 9 ވަނަ ޅެންވެރިންގެ ދުވަހުގެ މުނާސަބަތުގައި ބޭއްވި ކުޑަކުދިންގެ ޅެންފޮތް އެކުލަވައިލުމުގެ މުބާރާތުން އެއްވަނަ ވެސް ހޯއްދަވާފައިވެއެވެ.
މީގެ އިތުރުން ވެސް ގިނަ ކާމިޔާބީތަކެއް ހޯއްދާފައިވާއިރު، ދިވެހި ނޫސްވެރިކަމަށް ވެސް ވަނީ އަގު ނުކުރެވޭ ޚިދުމަތެއް ކުރައްވާފައެވެ.
