ފުލުހުންނާއި، ސިފައިންގެ މުއައްސަސާގައި ޓެރަރިސްޓުން ތިބިކަމަށް ރައީސް ނަޝީދު ދެއްކެވިކަހަލަ ވާހަކަތައް ދެން ނުދެއްކެވުމަށް ޖުމްހޫރީޕާޓީގެ ލީޑަރު ގާސިމް އިބްރާހީމް ރައީސް ނަޝީދަށް އިންޒާރު ކުރައްވައިފިއެވެ.
ގާސިމްގެ އިންޒާރު ރައީސް ނަޝީދަށްއައީ ޖަރުމަނު ވިލާތުގައި ހުންނަވައިގެން ވީޓީވީއަށް ދެއްވި އިންޓަވިއުއެއްގައެވެ. އެމަނިކުފާނު ވިދާޅުވީ ފުލުހުންނާއި ސިފައިންގެ މުއައްސަސާއަކީ އަބަދުވެސް ގައުމީ ޚިދުމަތުގައި ތިބިތަންތަން ކަމަށެވެ. އެހެންކަމުން އެތަންތަނުގައި މަސައްކަތްކުރާ މީހުންގެ މައްޗަށް އެފަދަ ބޮޑުތުހުމަތު ކުރެއްވުމަކީ އެއްގޮތަކަށްވެސް ކޮށްގެންވާނެ ކަމެއްނޫން ކަމަށެވެ.
ގާސިމް ވިދާޅުވީ ރައީސް ނަޝީދު އެވިދާޅުވި ވާހަކައަކީ އެއްވެސް ވަރެއްގެ ހަގީގަތެއް އެކުލެވިގެންވާ ވާހަކައެއް ނޫންކަމަށެވެ. ދިވެހި ފުލުންނާއި ސިފައިންގެ ތެރޭގައި ޓެރަރިސްޓުން ނުތިބޭނެކަމަށްވެސް އޭނާ ވިދާޅުވިއެވެ.
"ރައީސް ނަޝީދު ވިދާޅުވެފައި އެބައޮތް ފުލުހުންގެ ތެރޭގައި ޓެރަރިސްޓުން އެބަތިބިކަމަށް. އެއީ އަޅުގަނޑު އެކަން ކުށްވެރިކުރަން. އެމަނިކުފާނު އެހެއްދެވީ ވަރަށްބޮޑު ގޯހެއް. އެއްގޮތަކަށްވެސް ކުރައްވައިގެންވާނެ ކަމެއްނޫން. އެއީ ގައުމުގެ ސިންގާސަނާއަށާއި ގައުމުގެ އިސްތިގުލާލަށާއި މިނިވަންކަމަށް ބުރޫއަރާފާނެ އަދި ގައުމުގެ އިހުތިރާމަށް ވަރަށްބޮޑަށް ގެއްލުންވެގެންދާނެކަމެއް. އެމަނިކުފާނު ދެން އެބާވަތުގެ ކަމެއް ނުކުރައްވާނެ ކަމަށް އަޅުގަނޑު އިލްތިމާސްކޮށް އިންޒާރުކުރަން،" ގާސިމް ވިދާޅުވިއެވެ.
ބޭރުގެ މިލިޓަރީ ރާއްޖެ ގެނެސްގެން ގާނޫނުއަސާސީގެ ތެރެއަށް ރާއްޖޭގެ ކަންކަން ވެއްދުމަށް ރައީސް ނަޝީދު ގޮވައިލެއްވުމަކީވެސް ހެޔޮނިޔަތުގައި ކުރެއްވި ކަމެއް ކަމަށްވިޔަސް އެއީ ކޮށްގެންވާނެ ކަމެއް ނޫންކަމަށްވެސް ގާސިމް ވިދާޅުވިއެވެ.
meenage vaahakayah aharumen ehaa samaalukameh nudhen
Hoon mihaaru anekolhah jahanvee dho...mi varah munaafigu meeheh...meena aa baiathu hifaakah nuvaane