(20 މެއި 2023 ގައި ޝާއިއުކުރި ބަޔާ ގުޅޭ)
އަޝްހަރާއި ޚައިރާދު އައިސް ގެޔަށް ވަނުމާއެކު ، އެންމެ ފުރަތަމަވެސް ކުރިމަތިލާންޖެހުނީ ފަރީދާއާއެވެ. އެދެމީހުންގެ ކުރިމައްޗަށް ހުއްޓި ، ޚައިރާދާ ދިމާއަށް އެއްޗެތި ގޮވަން ފެށިއިރު ފަރީދާހުރީ ހަމަ ހޭގައިހެންނެއް ހިއެއް ނުވެއެވެ.
ހަތަރު އަހަރުފަހުން ކުއްޖަކު ގޮވައިގެން އައިސް މިގެޔަށްވަނީމަ ، އަހަރެންގެ ދަރިފުޅު ޚައިރާދަށް ލިބުނީކަމަށް ހީކުރީ ހެއްޔެވެ ؟ އަހަރެންގެ ދަރިފުޅަކީ މޮޔައެއްނޫނެވެ. އަޝްހަރެވެ. މިއަންހެނާ އެ ދައްކާވާހަކަޔަށް ހެއްލި ދުނިޔެއިން ގެއްލި ނުދާށެވެ ! މީނާ އެ ހަދަނީ ހުސް ދޮގެވެ. މިއީ މަކަރުވެރިޔެކެވެ. އޭނާ މަސައްކަތްކުރަމުން އެގެންދަނީ އަޝްހަރާ އަހަރެންނާ ދެމެދު އޮތް ގުޅުން ކަނޑުވައިލައި ، އަހަރެމެން ދެމައިން ދުރުކުރާށެވެ. ޚައިރާދުގެ ދަރިފުޅަށް އަޝްހަރު ބޭސްކޮށްދީފީމެއްނޫން ހެއްޔެވެ. އެކަމަކާ އަހަރެން ދެކޮޅެއް ނުހަދަމެވެ. އެއީ އިންސާނެއްގެ ދަރިއެކެވެ. އަޝްހަރު އެކަން ތިކޮށްދިނީ އިންސާނިއްޔަތަށް ޓަކައެވެ. އެކަމަކު ، އަޝްހަރު ތި ލޯބިދެމުންގެންދަނީ ، މީނާއަށް ކާކުގެ ފަރާތުން ލިބިފައިހުރި ދަރިއަކަށްކަން އަޝްހަރަށް އެނގޭ ހެއްޔެވެ ؟ ހަތަރު އަހަރުވަންދެން އުޅޭނެތާކު އުޅެއުޅެފައި ، ކުއްޖަކު ގޮވައިގެން އައިސް މިގެޔަށް އެވަނީ ، ކޮންތާކު ކިހިނެއް އުޅެފައިކަމެއްވެސް ނޭނގެއެވެ. ޚައިރާދު ބުނެބަލާށެވެ ! މިގެޔަށް ގެނެސް ތިވެއްދީ ކާކުގެ ދަރިއެއް ހެއްޔެވެ ؟
ފަރީދާގެ ވާހަކަތައް އަޑުއަހަން އަޝްހަރާއި ޚައިރާދު ހިމޭންކަންމަތީ ތިއްބެވެ. އެހެންނަމަވެސް ފަރީދާގެ ވާހަކަ އެހިސާބަށް ދިޔަތަނާ އަޝްހަރަކަށް ނުހުރެވުނެވެ. ދެން ހެވޭބުނެ ފަރީދާ ހުއްޓުވިއެވެ.
" މަންމާއެވެ ! ދެން އިތުރަށް އެންމެ ބަހެއްވެސް ، އަހަރެންގެ ދަރިފުޅާ ބެހޭގޮތުން މަންމަގެ ދުލުން ބޭރު ނުކުރާށެވެ ! " އިސްދަށަށް ޖަހައިގެންހުރެ ، ރޮމުން ރޮމުން އަޝްހަރު ބުންޏެވެ.
އެހެންނަމަވެސް ، ފަރީދާއަކަށް އެވަރަކުން އަދި ނުފުދުނެވެ. އަޝްހަރަށް ގޮވާލާފައި ، މީނާގެ ބަހަށް އަޝްހަރު ހެއްލުނީތޯ ސުއާލު ކުރިއެވެ. އެ ކުއްޖަކީ އަޝްހަރުގެ ދަރިއެއްކަން ސާބިތު ކުރުމަށް އޭނާއަތުގައި އޮތީ ކޮން ހެއްކެއްތޯ އޭނާއާ ސުއާލުކޮށް ބަލާށެވެ.
" ހަރީމަކީ އަހަރެންގެ ދަރިއެކެވެ. އަހަރެންނަކީ ބަޝީރަތު ޙުސައިންގެ ދަރިއެއް ހެއްޔެވެ ؟ އެކަން ސާބިތުކުރަން އަހަރެންނަށް ހެއްކެއް ދައްކަ ބަލާށެވެ ! " އަޝްހަރު ފަރީދާއާ ދިމާއަށް ލޯއަޅައިގެންހުރެ ބުންޏެވެ.
އަޝްހަރު އޭނާގެ މަންމަޔާ ޖަދަލު ކޮށް މަންމަ ކުށްވެރި ކުރަނީތޯ ފަރީދާ ސުއާލު ކުރިއެވެ.
އަޝްހަރު އޭނާގެ މަންމަޔާ ދިމާއަށް ހަޅޭއްލަވައިގަތެވެ. އޭނާ ކުށްވެރިކުރަނީ ، އޭނާގެ އަމިއްލަ ނަފުސެވެ. އޭނާއަކީ ކުށްވެރިޔެކެވެ. " އަހަރެންނަކީ ، ބަޝީރަތު ޙުސައިންގެ ދަރިއެއްކަން ނުވަތަ ނޫންކަން އެނގުން އަހަރެންނަކަށް މުހިންމެއްނޫނެވެ. ހަރީމަކީ އަހަރެންގެ ދަރިއެއްކަން ނުވަތަ ނޫންކަން އެނގުން އަހަރެންނަށް މުހިންމެއްނޫނެވެ. އަހަރެންގެ މައްސަލައިގާ ، ކުށްވެރިޔަކީ ދަރިފުޅު ކަމަށްވިޔަސް ނުވަތަ މަންމަ ކަމަށްވިޔަސް ، ހުރިހާ އަނިޔާއެއް ލިބޭނީ އަހަރެންނަށް ނޫންހެއްޔެވެ ؟ " އަޝްހަރު ބުންޏެވެ.
އަޝްހަރަކީ ، އޭނާގެ ދަރިއެއްކަން ސާބިތުކުރުމަށް ހެކި ދެއްކުމަށް އޭނާގެ ބައްޕަ ، ފަރީދާގާތު ބުނިތޯ އަޝްހަރު ސުއާލު ކުރިއެވެ. ހަމަ އެގޮތަށް ، ދުނިޔޭގައި އުޅޭ ކޮންމެ މަޔަކުވެސް ، ވިހާފައި އެވިހޭ ދަރިޔަކީ އޭނާގެ ފިރިމީހާގެ ދަރިއެއްކަން ސާބިތު ކުރުމަށް ހެކިދައްކަން ޖެހޭތޯ އެއްސެވެ.
" ﷲ ގަންދީ ބުނަމެވެ. އެ ކުއްޖާ ( ހަރީމް ) އެއީ އަހަރެންނަށް ޙަލާލުގޮތުގައި ލިބިފައިވާ އަހަރެންގެ ދަރިއެއްނޫންކަމަށް ވަންޏާ ، ދުނިޔޭގައި މިއުޅޭހާ އަންހެނުން ވިހާފައިވާ އެއްވެސް ކުއްޖަކީ ޙަލާލު ކުދިންނެއްނޫނެވެ. ދުނިޔޭގެ އެންމެން އެކަން ޤަބޫކުރިޔަސް ، އަދި މުޅިދުނިޔެއާ ޚިލާފުވާން ޖެހުނަސް އަހަރެން ، އަހަރެންގެ ދަރިފުޅު ، ހަރީމް ދޫކޮށެއްނުލާނަމެވެ. އަދި އހަރެންގެ އަންހެނުން ، ޚައިރާދުވެސް ދޫކޮށެއް ނުލާނަމެވެ. " އަޝްހަރު ވަރަށް ސާބިތުކަމާއެކު ބުންޏެވެ.
އަޝްހަރުގެ ވާހަކައިން ، ޚައިރާދު ރޮއްވައިލިއެވެ. އޭނާގެ ހިތުގައި ހަތަރު އަހަރުވަންދެން ޖަމާވެފައިހުރި ހިތާމައާއި ހިތްދަތިކަމާ އަދި ތަކުލީފުތައް ، އެހިތުން ނެރެ އެއްފަހަރުން ، އެހިތް ސާފުކޮށްލި ފަދައެވެ. ލޮލަށް ޖަމާވަމުންދިޔަ ކަރުނަ ، ތިއްކަކަށްފަހު ތިއްކެއް ނުކުމެ ، ތަޅުންގަނޑުމައްޗަށް އެޅެމުން ދިޔައެވެ. އެއީ އުފާވެރިކަމުން ފުރިގެންވާ ޝަބްނަމުގެ ތިކިތަކެއް ފަދައެވެ.
" އަހަރެންގެ އަންހެނުންނަށް މަންމަ ދިން އަނިޔާއަކީ ، އިންސާނަކު ޖަނަވާރަކަށްވެސް ނުދޭނެފަދަ އިހާނެތި އަނިޔާއެކެވެ. މަންމަޔަށް އޭނާ ދިނީ ކޮން ތަކުލީފެއް ހެއްޔެވެ ؟ ކުރީ ކޮން އުނދަގުލެއް ހެއްޔެވެ ؟ ދިނީ ކޮން ގެއްލުމެއް ހެއްޔެވެ ؟ އަހަރެންގެ އަންހެނުންނަކީ އަހަރެންނާ އެކަށީގެންނުވާ މީހެއްކަމަށް މަންމަ ދެކޭނަމަ ، އަހަރެންގާތު އެވާހަކަ ސާފުކޮށް ބުނަންވީ ނޫންހެއްޔެވެ ؟ އޭރަށްވެސް އަހަރެންނަށް އޭނާ ދޫކޮށްލެވުނީހެވެ. ވަރި ކުރެވުނީހެވެ. އެފަދަ ބޮޑު އަނިޔާއެއް އޭނާގެ އަނބިމީހާއަށް ނުދީ ސަލާމަތުން ދުނިޔޭގައި އުޅެން ދޫކޮށްލާފައި ބެހެއްޓުނީހެވެ. އެފަކީރު ދިރިހުއްޓައި ވަޅުލެވިގެންނެއް ނުދިޔައީހެވެ. މަންމަ ރާވައިގެން ތިކުރިކަމެއްގައި ، މަންމަގެ ކޮޅަށްޖެހި ، އަހަރެންނަށް އިޚްތިޔާރު ކުރެވުނީ މަންމައެވެ. އިޙްތިރާމް ކުރެވުނީ މަންމައަށެވެ. ރޮއި ހޭރި އާދޭސްކޮށްފައި ، އަންހެނުންދެއްކި އެއްވެސް ވާހަކައެއް އަޑުނާހައި އަހަރެން އަޑުއެހީ މަންމަ ދެއްކި ވާހަކައެވެ. އެއީ އަހަރެންނަށް ކުރެވުނު ، މަޢާފު ޙައްޤުނޫން ކުށެކެވެ. ބޮޑުވެގެންވާ ފާފައެކެވެ. " އަޝްހަރު ރޮމުން ރޮމުން ބުނަމުން ގެންދިޔައެވެ.
" އަހަރެންނަކީ މަންމަގެ ދަރިއެކެވެ. ޚައިރާދުގެ މައްޗަށް މަންމަގެ ހިތުގައި ރުޅިވެރިކަން އޮތަސް ، އަހަރެންގެ މައްޗަށް ނަފުރަތެއް ނެތެއް ނޫންހެއްޔެވެ ؟ އެހުރިހާކަމެއް މަންމަ ކުރީ ކީއްވެގެން ހެއްޔެވެ ؟ " އަޝްހަރު އޭނާގެ މަންމައާ ދިމާއަށް ހަޅޭއްލަވައިގަތެވެ.
އަޝްހަރުގެ ބާރު އަޑުން ޚައިރާދުވެސް ، ފަރީދާވެސް ސިއްސައިގެން ދިޔައެވެ. ފަރީދާ އޭނާގެ ވާހަކަ ފެއްޓިއެވެ.
" އަހަރެން އަޝްހަރުދެކެ ވަރަށް ލޯބިވަމެވެ. ދުނިޔޭގެ ހުރިހާ އެއްޗަކަށްވުރެ ބޮޑަށް އަހަރެން ލޯބިވީ އަހަރެންގެ ހުރި ހަމައެކަނި ދަރިފުޅު ، އަޝްހަރު ދެކެއެވެ. " ފަރީދާ އަޅައަޅައިގެންފައި ވާހަކަ ދައްކަމުން ގެންދިޔައެވެ.
ދަރިންދެކެވާން ، އެއީ ކޮންކަހަލަ ލޯތްބެއްތޯ އަޝްހަރު ސުއާލުކުރިއެވެ. އޭނާގެ ދަރިފުޅުވެސް ނުރައްކަލަށް ވަށްޓާލައިފައިވާ ކަމަށް އަޝްހަރު ބުންޏެވެ. އެދަރިފުޅު ދުނިޔެއަށް އައުމަށްވެސް މަންމަ ބޭނުމެއް ނުވެއެވެ. ޚައިރާދަށް ދިން އަނިޔާގައި އެ ދަރިފުޅަށް ކަމެއްވީނަމަ ، އޭނާ ދުނިޔެއަށް ދައްކާނީ ކޮން މޫނެއް ހެއްޔެވެ ؟ ޚައިރާދަށް އޭނާ ދޭނީ ކޮން ޖަވާބެއް ހެއްޔެވެ ؟ ޚައިރާދަކީ ، އޭނާގެ ބައްޕަގެ މަރުމަތީ އޭނާއާ ޙަވާލުކޮށްފައިވާ އަމާނާތެކެވެ. އެއަމާނާތަށް ޚިޔާނާތްތެރިވުމަށް އޭނާއަށް މަޖުބޫރު ކުރުވީ މަންމައެވެ. މަޙުޝަރުދުވަހުން ބައްޕަގެ ކުރިމަތީ އޭނާ އިސްއުފުލާލާނީ ކިހިނެއް ހެއްޔެވެ ؟ ދޭނީ ކޮން ޖަވާބެއް ހެއްޔެވެ ؟ ހެއްދެވި ފަރާތަށްވެސް ، އެއްވެސް މިންވަރެއްގެ ބިރުވެރިކަމެއް މަންމަގެ ހިތަކު ނެތެވެ.
" ދުނިޔޭގެ ކުރިމަތީގައި އަހަރެންނަށްޓަކައި ، މަންމަ ފަޚުރުވެރިވަމެއްނޫން ހެއްޔެވެ ؟ މިއަދު ހަމަ އެމަންމަވަނީ ، އެއްވެސް ޤާބިލްކަމެއްނެތް އާވާރާ މުޖުރިމަކަށް އޭނާ ހަދާފައެވެ. ދަރިންދެކެ ވާންޖެހޭ ލޯތްބަކީ އެއީ ހެއްޔެވެ ؟ ދަރިންދެކެ ވާންޖެހޭ ލޯބި އަހަރެންނަށް ދަސްކޮށްދިނީ ޚައިރާދެވެ. މިވީ ކުޑަދުވަސްކޮޅުގެ ތެރޭގައެވެ. " އަޝްހަރު އޭނާގެ މަންމައާ ދިމާއަށް އަޑުގަދަކޮށް ، ހަޅޭއްލަވަމުން ގެންދިޔައެވެ.
އޭނާގެ މައިވަންތަކަމުގެ ލޯތްބާމެދު ޔަޤީންކުރުމަށް ފަރީދާ އެދެމުން ގެންދިޔައެވެ. އޭނާ ބޭނުންވީ ، އޭނާގެ ދަރިފުޅުގެ ދިރިއުޅުމުގައި ހުރިހާ މުއްސަނދިކަމެއް ޖަމާވެފައި އޮތުމަށެވެ. ފަރީދާ ބޭނުންވީ ހުރިހާކަމެއްވެސް އަޝްހަރު އެދޭގޮތަށް އެދިރިއުޅުމުގައި ފުރިހަމަވެފައި އޮތުމަށެވެ. އޭނާގެ މުއްސަނދިކަމަކީ ކޮބައިތޯ އަޝްހަރު ސުއާލުކުރިއެވެ. އޭނާގެ ޙައިޞިއްޔަތަކީ ކޮބައިހެއްޔެވެ ؟ އޭނާގެ ޙައިޞިއްޔަތަކީ އޭނާގެ އަންހެނުންނާއި ދަރިފުޅުގެ ކުރިމަތީ މުޖުރިމަކަށް ހަދާފައި އޮތުން ހެއްޔެވެ ؟ ދުނިޔެއިން އޭނާއަށްދޭން މަންމަޔަށް ފެނުނު ދަރަޖަޔަކީ އެއީ ހެއްޔެވެ ؟ އޭނާގެ އަންހެނުންނާއި ދަރިފުޅާ ދިމާއަށް އިސްއުފުލާލައި ބަލައިލުމުގެ ޤާބިލްކަން އޭނާގެ ކިބައިން ނައްތައިލުން ހެއްޔެވެ ؟ އޭނާގެ ބޮލުގައި އެއްޗަކުން ޖަހައި ، އޭނާއަކީ ދުނިޔެއިން މޮޔަވެފައިވާ ސިކުނޑިއެއްނެތް އިންސާނަކަށް ހެދިނަމަވެސް މާ ރަނގަޅުވީހެވެ.
" އެ ކުށެއްނެތް ކުއްޖާ ( ޚައިރާދު ) އަށް އަނިޔާކޮށް ރަޙުމެއްނެތި ފަޟީޙަތްކުރިއިރު ، އަހަރެން މަރައިލިނަމަވެސް މާ ރަނގަޅުވީހެވެ. ޚައިރާދުގެ ބަދަލުގައި އަހަރެންނަށް އެއަނިޔާ ނުދިނީ ކީއްވެ ހެއްޔެވެ. އެއީ މީހެއްގެ ޔަތީމު ދަރިއެކެވެ. އަހަރެންގެ ދުރުތާތިމާގެ ކުއްޖެކެވެ. އޭނާއާ ދިމާނުކޮށް އަހަރެންނަށް ، މަންމަގެ އުފަންދަރިޔަށް ، އެހުރިހާ އަނިޔާއެއް ދިންނަމަވެސް މާ ރަނގަޅުވީސް ނޫން ހެއްޔެވެ. އޭރަކަށް ، އެހެންމީހަކު ޝަކުވާކުރާކަށް ޖާގައެއް ނޯންނާނެ ނޫންހެއްޔެވެ ؟ އަހަރެންގެ އަނހެނުންނާއި ދަރިފުޅު ، ހަތަރު އަހަރުވަންދެން އެއުފުއްލި ތަކުލީފާއި ހިތާމައިން އެމީހުން ސަލާމަތް ކުރެވުނީހެވެ. އެދެމީހުންނަށް އެފަދަ އަނިޔާއެއް ދިނުމަށްވުރެ އަހަރެން މަރުވިނަމަވެސް މާ ރަނގަޅެވެ. " އަޝްހަރު ބުންޏެވެ.
އެވާހަކަ ނުދައްކައި އެހެން ވާހަކައެއް ދައްކަން ފަރީދާ އެދުނެވެ. އެވާހަކަތައް އަޑުއަހާކަށް އޭނާއަކަށް މިހާރު ކެތެއް ނުކުރެވޭނެއެވެ. އަޝްހަރު ދެކެ އޭނާ އިންތިހާއަށް ލޯބިވެއެވެ. އަޝްހަރުގެ ޖާނާއި ނަފުސަށް ގެއްލުމެއްވާނެކަމެއް ކުރާކަށް އޭނާ އެއް އިރެއްގައިވެސް ބޭނުމެއް ނުވެއެވެ. އޭނާ ބޭނުންވީ ، އަޝްހަރުގެ ދިރިއުޅުމުން ޚައިރާދު ދުރަށްލައި އަޝްހަރު ބޭނުންވާފަދަ ކުއްޖަކު އަޝްހަރުގެ ދިރިއުޅުމަށް ގެންނާށެވެ. އެއީ އަޝްހަރުގެ އުފަލަށްޓަކައެވެ. އެއްކަމެއް ޔަޤީން ކުރާށެވެ ! ފަރީދާ ހުއްޓި ހުއްޓިފައި ބުންޏެވެ. އަޝްހަރު ވިހޭއްސުރެ ފެށިގެން އަޝްހަރުދެކެ އޭނާ އިންތިހާއަށް ލޯބިވިއެވެ. އެކަން ، އަޝްހަރަށްވެސް ރަނގަޅަށް އެނގޭނެއެވެ.
" މަންމަގެ ވަސްވާހުގައި ޖެހި ، މަންމަގެ ބަހަށް ، ދޮގު އެއީ ، ތެދުކަމުގައި އަހަރެން ޤަބޫލުކުރީމެވެ. މަންމަ ބުނެބަލާށެވެ ! އެ ދޮގުތައް ، ހަތަރު އަހަރުވަންދެން ތެދުގެ ގޮތުގައި އޮވެއްޖެ ހެއްޔެވެ ؟ އަހަރެންނަށް މިހާރު ހުރިހާކަމެއް އެނގިއްޖެއެވެ. ޙަޤީޤަތް ސާފުވެއްޖެއެވެ. އެހެނަސް ވަގުތު ފާއިތުވީ ފަހުންނެވެ. އެހަތަރު އަހަރު ، އަހަރެން އުޅުނު ޙާލު މަންމަޔަށް ފެންނާނެއެވެ. އަހަރެންދެކެ ވީ ލޯބީގެ އަގަކީ އެއީ ހެއްޔެވެ ؟ ގަދަކަމުން ހިނިތުންވެލައިގެން ހުރެ ، ރެޔާއި ދުވާލު ، އަހަރެން ކުރަމުން ގެންދިޔަ ހިތާމައާއި އަހަރެންގެ ލޮލުން އޮހޮރުނު ކަރުނަ މަންމަޔަށް ފެނުނު ހެއްޔެވެ ؟ ދިރި ހުއްޓަސް އެ ހަތަރު އަހަރު އަހަރެން އުޅެމުން ގެންދިޔައީ ފުރާނަނެތް މަސްގަނޑެއްގެ ގޮތުގައެވެ. އަހަރެމެންގެ ވިޔަފާރިޔަށް ލިބުނު ބޮޑު ގެއްލުމުން އެކަން އެއޮތީ ފެންނާށެވެ. އެ ގެއްލުމުގެ ބޮޑުބައި ދިޔައީ ، އަހަރެންނަށްވެސް ވަގަށް ، މަންމަގެ މަކަރުވެރިކަމުގައި ، ރިޝްވަތުގެ ގޮތުގައި ކައިސަރަށް ދީގެންކަން މިއެނގުނީ މިއަދުއެވެ. މިހުރިހާ އަނިޔާއަކާއި ގެއްލުމަކާ ތަކުލީފެއް ޖެއްސީ އަހަރެން މިދުނިޔެއަށް އުފަންކުރި މަންމަ ފިޔަވާ އެހެންމީހެއްނޫނެވެ. އެހެންމީހަކު އޮޅުވާލައި މަކަރު ހެދިޔަސް މަޔަކު ، ދަރިޔަކަށް އެފަދަ އަނިޔާއެއް ނުދޭނެ ނޫން ހެއްޔެވެ ؟ " އަޝްހަރު ، އޭނާގެ ދެލޯފުހެމުން ބުނަމުން ގެންދިޔައެވެ.
" ނޫނެކެވެ. އަހަރެން އަޝްހަރަކަށް އޮޅުވާލައިގެން އެއްވެސް މަކަރެއް ނުހަދަމެވެ. މި އަންހެންކުއްޖާ އެހަދަނީ ދޮގެވެ. " ފަރީދާއަށްވެސް މިހާރު ހުރީ ރޮވިފައެވެ.
" ނޫނެކެވެ ! މަންމާއެވެ ! އެވަރުގެ ރަނގަޅު އިންސާނަކު ދުނިޔެމައްޗަކު ނުހުންނާނެއެވެ. ޚައިރާދު ދޮގެއް ނުހަދާނެއެވެ. މަންމަ އެވަނީ އަހަރެންގެ ދުނިޔެ ނަރަކަޔަކަށް ހަދާފައެވެ. އަހަރެންގެ ދަރިފުޅު މަރައިލަން ބޭނުންވީ ޚުދު އަހަރެންގެ މަންމައެވެ. " އަޝްހަރު ބުންޏެވެ.
ނޫނެކެވެ. ފަރީދާ ބުނަމުން ގެންދިޔައެވެ. އޭނާ އަޝްހަރަށް އެއްވެސް ގެއްލުމެއް ނުދެއެވެ. ﷲ ގެ ރަޙުމަތްފުޅާއެކު ، އަޝްހަރު ދުނިޔެއަށް އުފަންކޮށް ، ދުނިޔެއަށް ގެނެސްދިނީ މަންމަކަމުގައި އަޝްހަރު ބުންޏެވެ. ހަމައެއާއެކު ، ދުނިޔެއިން އޭނާ ނައްތައިލީވެސް ހަމަ އެ މަންމައެވެ. ދިރިހުއްޓައި އޭނާގެ ނަފުސު ، ބައްޕަ ފަދައިން ކަށްވަޅަށްލައި ، އޭނާ ދުނިޔެއިން ބޭރުކޮށްލީ އެ މަންމައެވެ. އަޝްހަރު ، މަންމަޔާ ދިމާއަށް ލޯއަޅައިގެންހުރެ ، ޚައިރާދުގެ އަތުގައި ހިފާލައި ، ޚައިރާދު ގޮވައިގެން ، ކޮޓަރިއާ ދިމާއަށް ހިނގައިގަތެވެ.
ފަރީދާ އޭނާގެ ދެލޯފުހެމުން ގެންދިޔައެވެ. ދަރިފުޅާބެހޭގޮތުން ، ޚައިރާދަށް ގޮންޖަހައި ޚައިރާދާ ދިމާއަށް ފަރީދާ ބުނިބަސް އޭނާގެ ހަނދާނަށް އައިސް ، ބޯ ހާސްކުރަމުން ގެންދިޔައެވެ.
" އަހަރެން ގޮންޖަހާފައި ބުނަމެވެ. ޚައިރާދުގެ ބަނޑުގައި ތިއޮތް ކުއްޖަކީ އަޝްހަރުގެ ދަރިއެއްކަން ސާބިތުކޮށްދީފިއްޔާ ، ނުވަތަ ތިކުއްޖަކީ އަޝްހަރުގެ ދަރިއެއް ކަމަށް އަޝްހަރު ބަލައިގެންފިއްޔާ ، ޚައިރާދަށް ކާމިޔާބު ވީއެވެ. އަހަރެން ބަލިވީއެވެ. "
ފަރީދާ މަޑު މަޑުން ހިރެމުންގޮސް ، ވަނީ އޭނާގެ ކޮޓަރިއަށެވެ. އޭނާގެ މޫނުމަތީގައިވަނީ މާޔޫސްކަމާއި ހާސްކަމެވެ. ބިރުވެރިކަމާއި އުދާހެވެ. އެނދާ ދިމާއަށް ދަނިކޮށް ، އެތާ ހަމައިސްކޮޅަށްހުރި ލޯގަނޑުން އޭނާގެ މޫނު ފެނުނެވެ. އެހާ އަވަހަށް އޭނާގެ ސިފަވަނީ ބަދަލުވެފައެވެ. ބިރުންގޮސް ، މީހަކަށް ބަލައިލަން ނުކެރޭ ޑަކައިތެއްގެވެސް ، އެވަރުގެ ހުތުރު މޫނެއް ނުހުންނާނެއެވެ.
(ނުނިމޭ)
enmennah ves vvv.ibraiytheri adhi ehaame reethi reethi varahves reethi vaahakaeh
Alhey miah vure dhigukoh genes dheebala
Alhamdhu Lillaahi khairaadhah kaamiyaabaai, falaah dhevvaashi
haqqa .nasru dhevvaanee e Fareedhaa balikuravvashi
ވވވރީތި