ޗައިނާގެ ސަފީރުކަމަށް ހ. ފިލިގަސްދޮށުގޭ، ހުދާ އަލީ ޝަރީފް އައްޔަން ކުރުމަށް ރުހުން ހޯދަން މަޖިލީހަށް ހުށަހަޅައިފިއެވެ.
އޭނާގެ ނަން މަޖިލީހަށް ހުށަހެޅުއްވީ މިއަދުގެ މަޖިލީހުގެ ޖަސްލާގައެވެ.
ހުދާ އެ މަގާމަށް އައްޔަނުކުރަން ރުހުން ހޯދަން ރައީސް އިބްރާހިމް މުހައްމަދު މަޖިލީހަށް ފޮނުއްވި ސިޓީ މިއަދުވަނި އިއްވާފައެވެ.
ރައީސްގެ ސިޓީގައި ވަނީ ރާއްޖެއިން މިހާރު ޗައިނާއަށް ކަނޑައަޅުއްވާފައި ހުންނަވާ ސަފީރަކީ މ. ބީނާފުށި، އައިޝަތު އަޒީމާގެ ބަދަލުގައި ހުދާ އެ މަގާމަށް އައްޔަނުކުރަން ގަސްތު ކުރައްވާ ކަމަށް ވިދާޅުވެފައެވެ.
އެހެން ނަމަވެސް އެބަދަލު ގެންނަވާ ސަބަބެއް ވިދާޅެއްނުވެއެވެ.
އެކަމާ މެދު ރައްޔިތުންގެ މަޖިލީހުން ގޮތެއް ނިންމަވައިދެއްވުމަށް ރައީސް ސޯލިހު އެދިވަޑައިގެންފައި ވެއެެވެ.
އެކަމާމެދު އިތުރަށް ކުރަންޖެހޭ ދިރާސާކޮށް ގޮތެއް ނިންމުމަށް ރައްޔިތުންގެ މަޖިލީހުގެ ހާރިޖީ ގުޅުންތަކާ ބެހޭ ކޮމިޓީއަށް ވަނީ ފޮނުވައިފަ އެވެ.
