މޯލްޑިވްސް ބްރޯޑްކާސްޓިންގ ކޮމިޝަން (ބްރޯޑްކޮމް) ގެ މެމްބަރުކަމަށް ދ. މީދޫ، ބިއްލޫރިވިލާ، ސަފާ ޝަފީގު އައްޔަންކުރަން ރައްޔިތުންގެ މަޖިލީހުން ރުހުން ދީފި އެވެ.
އެ ކޮމިޝަނުން ހުސްވެފައިވާ މެންބަރުކަމުގެ މަޤާމަށް ޢައްޔަންކުރުމަށް ރައީސުލްޖުމްހޫރިއްޔާ، ރައްޔިތުންގެ މަޖިލީހަށް ފޮނުއްވި ނަންތަކުގެ ތެރެއިން ކޮމިޓީން ދިރާސާކުރައްވައި، ތަޅުމަށް ފޮނުއްވާފައިވަނީ ޞަފާ ޝަފީޤާއި، ޝިހާމް މުޙައްމަދު ވަޙީދުގެ ނަމެވެ. އެ ދެނަމަށް ވެސް މިއަދު ވަނީ ވޯޓަށް އަހާފައެވެ.
ޞަފާ، އެ މަގާމަށް ޢައްޔަންކުރަން ފާސްވީ 40 މެންބަރުންގެ ވޯޓުންނެވެ. ޝިހާމް މުޙައްމަދު ވަޙީދު އައްޔަންކުރެއްވުމަށް ވޯޓު ދެއްވީ 7 މެމްބަރުންނެވެ. ނުފެންނަކަމަށް 31 މެމްބަރަކު ވަނީ ވޯޓު ދެއްވާފައެވެ.
ބްރޯޑްކޮމަށް މެންބަރަކު ޢައްޔަންކުރެއްވުމަށް ރުހުން ހޯއްދެވުމަށް މަޖިލީހަށް ނަން ފޮނުއްވީ، ބްރޯޑްކޮމްގެ މެމްބަރުކަމުގެ މަޤާމުގައި ހުންނެވި އަމްޖަދު އިބްރާހީމްގެ މެންބަރުކަމުގެ މުއްދަތު މިދިޔަ މާރިޗް މަހުގެ 15 ގެ ނިޔަލަށް ހަމަވުމާ ގުޅިގެންނެވެ.
ބްރޯޑްކޮމްއަކީ 7 މެންބަރުންގެ މައްޗަށް އެކުލެވޭ ކޮމިޝަނެކެވެ.
އެކޮމިޝަންގައި މިހާރުތިއްބެވީ ރައީސާ މަރްޔަމް ވަޙީދާ އާއި، ނާއިބު ރައީސް މުޙައްމަދު ފަޒީންގެ އިތުރުން ކޮމިޝަންގެ މެންބަރުން ކަމަށްވާ އަމްޖަދު ވަޙީދާއި، ޢަލީ ޔޫސުފާއި، އާމިނަތު އަމީނާއާއި، ޝިފްލާ އިބްރާހީމެވެ.
