ދިވެހި ސަރުކާރަށް ގިނަ ޚިދުމަތްތަކެއް ކޮށްދެއްވާފައިވާ ބުޗާގޭ ދޮންމަނިކު އަވަހާރަވެއްޖެއެވެ.
ހޯމް އެފެއާޒްގެ ދަށުން ހިންގި ފިލްމު ސެންސަރުބޯޑުގެ ޗެއަރމަންގެ ގޮތުގައި މަސައްކަތްކުރައްވާފައިވާ ދޮންމަނިކު ވަނީ ރ. އަތޮޅުގެ އަތޮޅުވެރިކަން ވެސް ކުރައްވާފައެވެ. އަދި މަހްކަމަތުލް އަމަންއާންމުގެ ސެކްރެޓަރީކަމާއި ތަހުގީގު ކޮމިޓީގެ ސެކްރެޓަރީކަން ވެސް ކުރައްވާފައި ވެއެވެ.
މީގެ އިތުރުން ޕަބްލިކް މެއިންޓެނަންސް ޑިވިޜަންގެ ވަކީލްކަމާއި، ވުޒާރަތުއް ދާޚިލިއްޔާގެ ހާއްސަ ވަކީލުކަމާއި، ޕޯސްޓް މާސްޓަރ ކަމުގެ މަގާމާއި ކޮންޓްރޯލާ އޮފް ކޮމިއުނިކަބްލް ޑިޒީޒަސް ޑިވިޝަންގެ ވަކީލްކަމުގެ މަގާމާއި މެރިން ޑިވިޜަންގެ ވަކީލުކަން ވެސް ކުރައްވާފައެވެ.
ސަރުކާރަށް 40 އަހަރު ޚިދުމަތްކުރައްވައިގެން ދެވަނަ ޕެންޝަން ލިބިވަޑައިގެންފައިވާ ދޮންމަނިކަކީ ކުރީގެ ޔޫތު މިނިސްޓަރު އިރުތިޝާމް އާދަމްގެ ބައްޕާފުޅެވެ.
އުމުރުން 91 އަހަރުގައި ދޮންމަނިކު އަވަހާރަވިއިރު، ދޮންމަނިކުގެ ތިން ކައިވެންޏަކަށް 22 ބޭފުޅުން ލިބިވަޑައިގެންފައިވެއެވެ.
މީގެ 8 އަހަރު ކުރިން އޮސްޓްރޭލިއާއަށް ދިރިއުޅުން ބަދަލުކުރެއްވި ދޮންމަނިކު އުމުރުން 91 އަހަރުގައި، އަވަހާރަވިއިރުވެސް އުޅުއްވަމުން ގެންދެވީ އެ ގައުމުގައެވެ.
