ރާއްޖޭގެ ސިޔާސީ ހާލަތާ ބަހޭ މައުލޫމާތު އެކުވެރި ބައެއް ގައުމުތަކާ ހިއްސާ ކުރެއްވުމަށް ރައީސް ޔާމީންވަނީ މަންދޫބުން ފޮނުއްވައިފައެވެ.
މިހާތަނަށް މަންދޫބުން ފޮނުއްވައި ފައިވަނީ ޕާކިސްތާން، ޗައިނާ، ސައުދީ އަރަބިޔާ އަށެވެ. އެގައުމުތަކަށް ފޮނުވާފައިވައިނީ ފޮރިން މިނިސްޓަރު ޑރ. މުހައްމަދު އާސިމް، ފިޝަރީޒް މިނިސްޓަރު ޑރ. މުހައްމަދު ޝައިނީ، އިކޮނޮމިކް ޑިވެލޮމެންޓް މިނިސްޓަރ މުހައްމަދު ސައީދެވެ.
މީގެ ތެރެއިން ޑރ. ޝައިނީ ސައޫދީއަށް ފުރައިވަޑައިގެންނެވީ މިއަދުއެވެ. އާސިމް ފޮނުއްވެވީ ޕާކިސްތާނަށެެ. ސައީދު ފޮނުއްވެވީ ޗައިނާއަށެވެ. އެ ދެބޭފުޅުން އިއްޔެވަނީ ފުރައިވަޑައިގެންފައެވެ.
ރާއްޖެއާ އެކުވެރި ގައުމުތަކަށް ރައީސް ޔާމީން މަންދޫބުން ފޮނުއްވިއިރު އެގަމުތަކުގެ ލިސްޓުގައި އިންޑިއާނެތް ކަމަށް އެގައުމުގެ ނޫހެއް ކަމަށްވާ ފަސްޓްޕޯސްޓުންވަނީ ފާހަގަ ކޮށްފައެވެ. އެއީ ހައިރާންވާންވީ ކަމެއްނޫން ކަމަށްވެސް އެނޫހުގައި ބުނެފައިވެއެވެ.
"އިންޑިއާއަކީ ޖިއޮގްރަފީ ގޮތުންވެސް ދިވެހިރާއްޖެއާ އެންމެ ކައިރި ގައުމު. އެކަމަކު އެކުވެރި ގައުމުތަކުގެ ލިސްޓުގައި އިންޑިއާއެއް ނުހިމެނޭ،" އެ ނޫހުގައި ބުނެފައިވެއެވެ.
ރައީސް ޔާމީންގެ ވެރިކަމުގައި، ރާއްޖެއިން ގެންދަނީ އިސްލާމީ ގައުމުތަކުގެ އިތުރަށް ޗައިނާއާ ގުޅުން ބަދަހި ކުރަމުން ކަމަށް އެނޫހުގައި ބުނެފައިވެއެވެ.
އެ ނޫހުން އެހެން ބުނެފައިވިޔަސް އިންޑިއާއާމެދު ރައީސް ޔާމީން ގެންގުޅުއްވަނީ "އިންޑިއާ ފަސްޓް" ސިޔާސަތެކެވެ.
