ރާއްޖޭގެ މިހާރުގެ ސިޔާސީ ހާލަތާބެހޭ ގޮތުން އެކުވެރި ބައެއް ގައުމުތަކަށް މައުލޫމާތު ދެއްވުމަށް ރައީސުލްޖުމްހޫރިއްޔާގެ މަންދޫބުން ފުރާވަޑައިގެންފިއެވެ.
ރައީސްގެ ޚާއްސަ މަންދޫބުންގެ ގޮތުގައި ބައެއްގައުތަކަށް ފުރާވަޑައިގެންނެވީ ވަޒީރުންނެވެ. އެގޮތުން ޗައިނާ ސަރުކާރަށް ރާއްޖެއާ ބެހޭ މައުލޫމާތު ދެއްވުމަށް ފޮނުއްވީ މިނިސްޓަރ އޮފް އިކޮނޮމިކް ޑިވެލޮޕްމަންޓް މުޙައްމަދު ސަޢީދެވެ. އެމަނިކުފާނު ޗައިނާއަށް ފުރާވަޑައިގެންނެވީ މިރޭގެ ވަގުތެއްގައެވެ.
އެކުވެރި ޕާކިސްތާނަށް ފޮނުއްވީ މިނިސްޓަރ އޮފް ފޮރިން އެފެއާޒް ޑޮކްޓަރ މުޙައްމަދު ޢާޞިމެވެ. އެމަނިކުފާނުވެސްވަނީ ވަނީ މިރޭގެ ވަގުތެއްގައި ޕާކިސްތާނަށް ފުރާވަޑައިގެންފައެވެ.
މިނިސްޓަރ އޮފް ފިޝަރީޒް އެންޑް އެގްރިކަލްޗަރ ޑޮކްޓަރ މުޙައްމަދު ޝައިނީ މާދަމާގެ ވަގުތެއްގައި ސަޢުދީ ޢަރަބިއްޔާއަށް ފުރާވަޑައިގަތުމަށް ހަމަޖެހިފައެވެ.
ފެބުރުއަރީ ފުރަތަމަ ދުވަހުގެރޭ ސްޕްރީމްކޯޓުން ކުރެއްވި އަމުރާ މެދު ސަރުކާރުން ހިތްހަމަނެޖެހިގެންވަނީ އުއްތަމަ ފަނޑިޔާރާއި، ފަނޑިޔާރު އަލީ ހަމީދު ހައްޔަރު ކޮށްފައެވެ. އެކަމާ ގުޅިގެން އދ. އިންނާއި ދުނިޔޭގެ ބައެއް ގައުމުތަކުންވަނީ އެގޮތަށް އަމަލު ނުކުރުމަށް ސަރުކާރަށް ގޮވައިލައްވައިފައެވެ.
