ރާއްޖޭގެ ކުރީގެ ރައީސުލްޖުމްހޫރިއްޔާ އަލްއުސްތާޒު މައުމޫން އަބްދުލްގައްޔޫމުގެ މައްޗަށް ފުލުހުންކޮށްފައިވާ ހުރިހާ ތުހުމަތަކީ ދޮގުތުހުމަތެއް ކަމަށް އެމަނިކުފާނުގެ ގާނޫނީ ވަކީލު މައުމޫން ހަމީދު ވިދާޅުވެއްޖެއެވެ.
ރައީސް މައުމޫނުގެ މައްޗަށް ފުލުހުން ކޮށްފައިވާ ތުހުމަތަކީ ރީޝްވަތު ދިނުމާއި، ގާނޫނީ ސަރުކާރު ވައްޓަވާލަން އުޅުއްވުމާއި، ސަލާމަތީ ޚިދުމަތްތަކުގެ މެދުގައި ބައިބައި އުފެއްދެވުމަށް މަސައްކަތް ކުރެއްވި ކަމުގެ ތުހުމަތެވެ. މިއިން އެއްވެސް ތުހުމަތަކީ އޭގައި އެއްވެސް އަސްލެއް އަދި ހަގީގަތެއްނެތް ތުހުމަތުތަކެއް ކަމަށްވެސް ރައީސް މައުމޫންގެ ފަރާތްޕުޅުން މައުމޫން ހަމީދު ވިދާޅުވިއެވެ.
މައުމޫން މިހެން ވިދާޅުވިޔަސް ފުލުހުން މިއަދު ބޭއްވި ޕްރެސް ކޮންފަރެންސެއްގައި އެކްޓިން ކޮމިޝަނަރުއޮފް ޕޮލިސް އަބްދުﷲ ނަވާޒު ވިދާޅުވީ ރައީސް މައުމޫނުގެ މައްޗަށް ކުރާ ތުހުމަތުތަކާ ގުޅޭ ހެކިވެސް ލިބިފައިވާ ކަމަށެވެ. އިތުރުހެކިވެސް ލިބެމުންދާ ކަމަށް އޭނާ ވިދާޅުވިއެވެ. އެ މައްސަލައާ ގުޅުންހުރި ތަންތަން ބަލައި ފާސްކުރައްވަމުން ގެންދަވާ ކަމަށްވެސް ނަވާޒު ވަނީ ވިދާޅުވެފައެވެ.
ރައީސް މައުމޫން ހައްޔަރު ކުރެއްވުމުން އެމަނިކުފާނު ދޫކޮށްލެއްވުމަށް ކުރީގެ ރައީސް މުހައްމަދު ނަޝީދާއި، އިދިކޮޅު އިއްތިހާދުގެ އިސްބޭފުޅުންވަނީ ސަރުކާރަށް ގޮވައިލައްވައި ފައެވެ.
ފުލުހުން ރައީސް މައުމޫން ހައްޔަރު ކުރައްވައިގެން ގެންދެވިއިރު އެމަނިކުފާނުގެ ދަރިކަލުން ފާރިސް މައުމޫން ހުންނެވީ ފުލުހުންގެ ބަންދުގައެވެ. އެހެންނަމަވެސް ރައީސް މައުމޫން ބަންދު ކުރުމަށްފަހު ފުލުހުންވަނީ ފާރިސް ދޫކޮށްލައިފައެވެ.
ރައީސް މައުމޫނުގެ އިތުރަށް ރާއްޖޭގެ އުތަމަ ފަނޑިޔާރާއި، ސްޕްރީމްކޯޓުގެ ފަނޑިޔާރު އަލީ ހަމީދާއި، ޖުޑީޝަލް އެޑްމިނިސްޓްރޭޝަންގެ އިސްވެރިޔާ ހަސަން ސައީދު ހުސައިންވެސް ފުލުހުންވަނީ ހައްޔަރުކޮށްގެން ގެންގޮސްފައެވެ.
