ދޮންބެއްޔާ ކުރެން ، މުސާރަޔަށް ލިބެނީ ކިހާވަރެއްތޯ ރައްޓެއްސަކު އަހައިލިއެވެ. ރަނގަޅަށް ބުނާނީ ބާވައެވެ؟ ނުވަތަ ނުބުނާނީ ބާވައެވެ ؟ ދޮންބެއްޔާ ހިތަށް އެރިއެވެ. ހަމައެއާއެކު ، ދޮށީ ޢުމުރުގެ މީހަކު ދޮންބެއްޔާގާތު ބުނި ވާހަކައެއްގެ މަތިންވެސް ހަނދާން ވިއެވެ. އެމީހަކު ، ދޮންބެއްޔާގާތު ބުނީ ؛
" އަންހެނެއްކުރެން ، އޭނާގެ ޢުމުރު ނާހާށެވެ ! ފިރިހެނެއްކުރެން ، އޭނާއަށް ލިބޭ މުސާރަ ނާހާށެވެ ! "
އެއީ ، ކީއްވެގެންބާވައެވެ ! އެމީހަކު އިތުރަށް ސާފުކޮށްދިން ގޮތުގައި ، އަންހެނެއްގާތު ޢުމުރުން ކިހާވަރެއްތޯ އަހައިފިއްޔާ ތެދަކަށް ނުބުނާނެއެވެ. އަދި އަމްދުން ، ފިރިހެނަކު ، އަންހެނަކު ކުރެން ޢުމުރު އަހައިފިއްޔާ ތެދަކަށް ނުބުނާނެއެވެ. ޢުމުރު ބުނާނީ ޅަކޮށެވެ. ޅަވާން ވެގެންނެވެ. ފިރިހެނެއްގާތު މުސާރަޔަށް ލިބެނީ ކިހާވަރެއްތޯ އަހައިފިއްޔާ ރަނގަޅު ޢަދަދެއް ނުބުނާނެއެވެ. ފިރިހެނުން ކުރެން ، އޭނާގެ މުސާރަޔަކީ ކިހާވަރެއްތޯ ، އަންހެނަކު އަހައިފިއްޔާ ބުނާނީ ، ބޮޑުކޮށެވެ. ރަނގަޅު ޢަދަދެއް ނުބުނާނެއެވެ. ގިނައިން ލިބޭކަން ދައްކަން ވެގެންނެވެ.
އެންމެފަހުން ، ދޮންބެއްޔާބުނީ ، އެވާހަކަ އޭނާކުރެން ނޭހުމަށެވެ. ދޮގެއްހަދަން ބޭނުންނުވާތީއެވެ. ވާހަކަ އޮޅުވާލަންވެގެން ދޮންބެއްޔާގެ ޖަވާބަށްފަހު ، އޭނާގެ ރަޙުމަތްތެރިޔާއާ ، ހިސާބު ޢިލްމުން ، ޢުމުރާގުޅޭ ސުއާލެއް ކުރިއެވެ.
" އަހަރެންގެ ޢުމުރަކީ ، 30 އަހަރެވެ. އަހަރެންގެ ކޮއްކޮގެ ޢުމުރަކީ ، އަހަރެންގެ ޢުމުރުގެ ދެބައިކުޅަ އެއްބަޔެވެ. އަހަރެންގެ ޢުމުރުން 40 އަހަރުވާއިރު ، އަހަރެންގެ ކޮއްކޮގެ ޢުމުރުން ވާނީ ކިތައް އަހަރު ހެއްޔެވެ ؟ " ދޮންބެއްޔާ ، އޭނާގެ ރަޙުމަތްތެރިޔާ ދޭނެ ޖަވާބެއްގެ އިންތިޒާރުގައި ހުއްޓެވެ.
