ރައީސް ނަޝީދު މަޝްހޫރުވެގެން ދިޔައީ ފުލެޓާހެދި ކަމަށާއި، މި ސަރުކާރު "ފުލެޓުވެގެން" މިދަނީ ފުލެޓާހެދި ކަމަށް ކުރީގެ ޓޫރިޒަމް މިނިސްޓަރ އަދި ޖުމްހޫރީޕާޓީގެ ކައުންސިލް މެންބަރު ޑރ. އަބްދުﷲ މައުސޫމް ވިދާޅުވެއްޖެއެވެ.
ވީޓީވީގެ ޕްރޮގްރާމެއްގައި ވާހަކަ ދައްކަވަމުން ޑރ. މައުސޫމް ވިދާޅުވީ ރައީސް ނަޝީދު ގެންގުޅުއްވި ފުލެޓު އެޅުމުގެ ސިޔާސަތު ވަރަށް ފުޅާދާއިރާއެއްގައި ކުރިއަށް ގެންދެވި ކަމަށެވެ. އެއީ ގެދޮރުގެ މައްސަލަ ހައްލުކުރެއްވުމަށް އެމަނިކުފާނު ކުރެއްވި އެއް މަސައްކަތް ކަމަށްވެސް މައުސޫމް ވިދާޅުވިއެވެ. ނަޝީދުގެ އެސިޔާސަތުގެ ސަބަބުން އެމަނިކުފާނު މަޝްހޫރުވިޔަސް މިސަރުކާރު މިހާރު ފުލެޓުވަމުން މިދަނީ ފުލެޓާހެދި ކަމަށް މައުސޫމް ވިދާޅުވިއެވެ.
މި ސަރުކާރުން އެންމެފަހުން ފުލެޓް ދޫކުރެއްވި އިރު ފުލެޓް ލިބުމުގެ ޝަރުތު ހަމަވާ އެތައް ބަޔަކު ތިއްބައި ޝަރުތުހަމަނުވާ އެތައްބަޔަކަށް ފުލެޓް ދީފައިވާކަން ދަލީލުކޮށްދޭ ލިސްޓެއް އާންމުވެފައިވާ ކަމަށެވެ. "ރައްޔިތުންގެ ކަންބޮޑުވުމަކީ ފަންސާސް ޕޮއިންޓް ލިބިފައިތިބި މީހުންނަށް ފުލެޓް ލިބިފައި، ޕޮއިންޓްލިބި އިތުރުވެފައިވާ މީހުންނަށް ފުލެޓް ނުލިބޭތީ،" މައުސޫމް ވިދާޅުވިއެވެ. މިފަދަ ކަންކަން ސަރުކާރުން ކުރައްވާ ކަމަށްވާނަމަ ރައްޔިތުންގެ އިތުބާރު ގެއްލި ސަރުކާރަށް އޮންނަ ތާއީދު ކުޑަވާނެ ކަމަށް އޭނާ ވިދާޅުވިއެވެ.
