ރާއްޖޭގައި ކުއްލި ހާލަތު އިއުލާން ކުރެއްވީ އުއްތަމަ ފަނޑިޔާރު ޖަވާބުދާރީ ކުރެވޭނެ ގޮތެއްނެތިގެން ކަމަށް ރައީސުލްޖުމްހޫރިއްޔާ ޔާމީން އަބްދުލްގައްޔޫމް ވިދާޅުވެއްޖެއެވެ.
ރައްޔިތުންނާ މުޚާތަބު ކުރައްވައި އެމަނިކުފާނު މިއަދު ވިދާޅުވީ ސްޕްރީމްކޯޓުގެ އަމުރާ ގުޅިގެން އުފެދުނު ޚިޔާލު ތަފާތުވުންތަކާއި މައްސަލަތައް ހައްލު ކުރައްވަން ވަރަށް މަސައްކަތް ކުރެއްވި ކަމަށެވެ.
ސްޕްރީމްކޯޓުގެ އަމުރު އެމަނިކުފާނު ސިފަކުރައްވައިފައިވަނީ ބަޣާވާތެއްގެ ގޮތުގައެވެ. އެހެންވެ ކުއްލި ނުރައްކަލުގެ ހާލަތު އިއުލާން ކުރެއްވީ "މިއީ ކިހާ ވަރެއްގެ ބަޣާވާތެއްކަން ކިހާ ހިސާބަކުން އައި ބަޣާވާތެއްކަން އަޅުގަނޑު ދެނެގަންނަން ބޭނުންވެގެން،" ކަމަށްވެސް ވިދާޅުވިއެވެ.
އެމަނިކުފާނު ވިދާޅުވީ ކުއްލި ނުރައްކަލުގެ ހާލަތު އިއުލާންކުރީ މިހާރު ދިމާވެފައިވާ މައްސަލަތަކަށް ހައްލެއް ގެންނެވުމުގެ މަގުސަދުގައި ކަމަށެވެ. ކުއްލި ނުރައްކަލުގެ ހާލަތު އިއުލާންކުރި ގަރާރުގައި ކާފިއުއެއް ހިންގަން ނޯންނާނެ ކަމަށްވެސް ވިދާޅުވިއެވެ. އަދި އެއްވެސް ރައްޔިތެއްގެ އާންމު ދިރިއުޅުމަށްވެސް އެއްވެސް ނޭދެވޭ އަސަރެއް ނުކުރާނެ ކަމަށްވެސް ވިދާޅުވިއެވެ.
ރައީސް ވިދާޅުވީ މި ހާރުދިމާވެފައިވާ މައްސަލަތައްކަށް ހައްލު ހޯއްދެވުމަށް އުއްތަމަ ފަނޑިޔާރާ ބައްދަލުކުރެއްވުމަށް އިއްޔެވެސް ދެންނެވި ކަމަށެވެ. އެހެންނަމަވެސް އެމަނިކުފާނު ބައްދަލު ނުކުރެއްވި ކަމަށްވެސް ވިދާޅުވިއެވެ. އަދި ހަތަރު އެންގުމެއް ސްޕްރީމް ކޯޓަށް އެންގެވި ކަމަށްވެސް ވިދާޅުވިއެވެ. އެކަމަކު އެ ބަލައިނުގަތް ކަމަށްވެސް ރައީސް ވިދާޅުވިއެވެ.
އެންމެފަހުން ސްޕްރީމްކޯޓުން މަސައްކަތް ކުރެއްވީ ދައުލަތުގެ ބަންޑާރަ ނާއިބު ވަކިކުރައްވަން ކަމަށްވެސް ވިދާޅުވިއެވެ. އެ ގޮތަށް އެކަން ކުރެއްވިނަމަ ގާނޫނުއަސާސީގައި ބުނާ ލަފާ އެމަނިކުފާނަށް ދެއްވާނީ ކާކުތޯ ވިދާޅުވެ ރައީސްވަނީ ސުވާލު އުފައްދަވައިފައެވެ. އަދި އެމަނިކުފާނު ވަކިކުރި ޕޮލިސް ކޮމިޝަނަރު (އަހުމަދު އަރީފް) އަލުން އެމަގާމަށް ރުޖޫއަ ކުރެއްވުމަށްވެސް ސުޕްރީމް ކޯޓުން ރިވިއު ކުރެއްވި ކަމަށްވެސް ވިދާޅުވިއެވެ. އެފަހުން އެ މަގާމަށް ހަމަޖެއްސެވި އަހުމަދު ސައުދީ ވެސް އަލުން އެ މަގާމަށް ގެންނަވަން ސްޕްރީމްކޯޓުން ވާހަކަ ދެއްކެވި ކަމަށްވެސް ވިދާޅުވިއެވެ.
ރައީސް ވިދާޅުވީ ސްޕްރީމްކޯޓުގެ އަމުރުގެ ސަބަބުން ޖޭއެސްސީ ބޭއްވޭނެ ގޮތެއް ނެތް ކަމަށެވެ. އެހެންވެ "ސުޕްރީމް ކޯޓުގެ ފަނޑިޔާރުން ޖަވާބުދާރީ ކުރެވޭނެ ގޮތެއްނެތް. އެކަމަކު ސުޕްރީމް ކޯޓަށް މައްސަލަތައް ބަލައިގަންނަމުންދިޔަ. އޭގެ ތެރޭގައި ހުކުރު ދުވަހު ބަލައިގަތް އެއްމައްސަލައަކީ ރައީސުލްޖުމްހޫރިއްޔާ އަޒުލް ކުރުމުގެ މައްސަލަ. އެކަމަކު އެއީ ސުޕްރީމް ކޯޓުން ބޭރުގައިއޮތް މައްސަލައެއް. އެ ހިސާބުން އަޅުގަނޑުމެން ވަރަށް ސީރިއަސް،" ރައީސް ވިދާޅުވިއެވެ. ކުއްލި ނުރައްކަލުގެ ހާލަތު އިއުލާން ކުރެއްވީ އެދިމާވި ކަންކަން ހައްލު ކުރައްވަން ކަމަށް ވިދާޅުވިއެވެ. ވަރަށް އަވަހަށް ފުލުހުން އެބޭފުޅުންނަށް ހޯދިފައިވާ އެއްޗެހި ހާމަކުރައްވާނެ ކަމަށްވެސް ރައީސް ވިދާޅުވިއެވެ.
ރައީސް ވިދާޅުވީ ފަނޑިޔާރުންނަށްވިޔަސް އެބޭފުޅުންގެ މައްސަލަތައް ބެލެންޖެހޭނެ ކަމަށެވެ. އެމައްސަލަތައް ބެލެންއޮތް މަގު ބަންދުކުރީމައި ހުޅުވައިގެންވެސް އެކަންކުރެއްވުމުގެ ފުރުސަތު ސަރުކާރަށް ދެއްވަންޖެހޭ ކަމަށް ވިދާޅުވިއެވެ.
