ބައްލަވަން ބޭނުންފުޅުވީ ފަނޑިޔާރުންގެ މައްސަލައެއް ނޫންކަމަށާއި، ބޭނުންފުޅުވީ ޖުޑިޝަލްއެޑުމިނިސްޓްރޭޝަންގެ އެޑްމިނިސްޓްރޭޓަރ ހަސަން ސައީދުގެ މައްސަލައެއް ކަމަށް ރައީސް ޔާމީން ވިދާޅުވެއްޖެއެވެ.
ގައުމާ މުޚާތަބު ކުރައްވައި މިއަދު ވާހަކަފުޅު ދައްކަވަމުން ރައީސް ވިދާޅުވީ "އަޅުގަނޑުމެން ބަލަން ބޭނުންވީ ފަނޑިޔާރުންގެ މައްސަލަތަކެއް ނޫން. އަޅުގަނޑުމެން ބަލަން ބޭނުންވީ ހަސަން ސައީދުގެ މައްސަލަ. އެކަމަކު ހަސަން ސައީދު ފިލީ،" ކަމަށެވެ. ހަސަން ސައީދާ ގުޅޭގޮތުން ބައްލަވަން ބޭނުންފުޅުވީ ފުލެޓެއް ގަތުގައި ކޮރަޕްޝަންގެ މުއާމަލާތެއް ހިންގައިފައިވާ ކަމުގެ މައްސަލައެވެ.
އެހެންނަމަވެސް އޭނާގެ މައްސަލަ ބަލަން ފެށުމުން އެ މައްސަލަ ސްޕްރީމްކޯޓުން ބާތިލްކުރެއްވި ކަމަށްވެސް ރައީސް ވިދާޅުވިއެވެ. އެހިސާބުން ސްޕްރީމްކޯޓަށް އައިސްގެން އުޅޭ ނުފޫޒެއް ބެއްލެވި ކަމަށް ރައީސް ވިދާޅުވިއެވެ. އެކަން ބެއްލެވިއިރު "ޖޭއެސްސީގެ އިސްބޭފުޅާ (ހަސަން ސައީދު) ހުޅުމާލެއިން ފްލެޓެއް ގަންނަން ފޮނުއްވާފައި އޮތް އެޕްލިކޭޝަނެއް. ދެން ފެނިގެން ދިޔައީ ސުޕްރީމް ކޯޓުގެ އިސް ފަނޑިޔާރު އަބްދުﷲ ސައީދާއި، އަލީ ހަމީދުގެ މަސްލަހަތުހިމެނޭ ފްލެޓްތަކެއްގެ އެޕްލިކޭޝަންތަކެއް،" ރައީސް ވިދާޅުވިއެވެ.
ހަސަން ސައީދުގެ މައްސަލަ ބަލަން މަސައްކަތް ކުރެއްވުމުން ސްޕްރީމްކޯޓުންވަނީ އޭނާގެ މައްސަލަ ހުއްޓާލަން އަންގަވައި ކްރިމިނަލް ކޯޓުގެ އަމުރުވެސް ބާތިލް ކުރައްވައިފައެވެ. އެކަން އެގޮތަށް ކުރެއްވުމުން ވަރަށްބޮޑަށް ހައިރާންކަން ލިބިވަޑައިގެންނެވި ކަމަށްވެސް ރައީސް ވިދާޅުވިއެވެ. "އޭނާ (ހަސަން ސައީދު) ހައްޔަރުގައި ބަހައްޓައިގެން ހާޒިރު ކުރެވޭނެ ގޮތެއް ނުވި. އަނެއްކޮޅުން ފެނިގެން ދިޔައީ ކްރިމިނަލް ކޯޓުން އަމުރުތަކެއް ބާތިލް ކުރަމުން ދިޔަތަން. އެކަމަކު އެއްވެސް މީހެއްގެ މައްސަލައެއް ނުބެލި އޮވެގެން ނުވާނެ. ހަސަން ސައީދުވެސް މި މައްސަލައިން ބަރީއަ ވާންބޭނުންވާ ކަމަށްވާނަމަ އިސްތިއުނާފު މަރުހަލާއިން ކުރިއަށް ދާންވީ،" ރައީސް ވިދާޅުވިއެވެ.
ރައީސް ވިދާޅުވީ "ފަނޑިޔާރަކު ހާޒިރު ކުރެވޭނީ ސުޕްރީމް ކޯޓުން އަމުރެއް ދޭން. އެކަމަކު ހަސަން ސައީދުގެ މައްސަލަ ސުޕްރީމް ކޯޓުން ބާތިލް ކުރުމުން އަބްދުﷲ ސައީދާއި އަލީ ހަމީދުގެ މައްސަލައިގައި ސުޕްރީމް ކޯޓުގެ އަމުރެއް ނުވަތަ ހުއްދައެއް ލިބޭނެ ކަމަކަށް ނުބެލެވޭ،" ކަމަށެވެ. އެހިސާބުން އުއްތަމަ ފަނޑިޔާރު އަބްދުﷲ ސައީދާއި، ފަނޑިޔާރު އަލީ ހަމީދުގެ ވިސްނުން ބަދަލުވީ ކޮން ނުފޫޒެއްގެ ދަށުންތޯ ބައްލަންވަން ބޭނުންފުޅުވި ކަމަށްވެސް ރައީސް ޔާމީންވިދާޅުވިއެވެ.
