އައްބާސް އާދިލް ރިޒާ، ފުލުހުން ހައްޔަރުކޮށްފި އެވެ.
އޭނާ ހައްޔަރުކޮށްފައިވަނީ ރާއްޖޭގައި ހުންނަ އިންޑިއާގެ ހައިކޮމިޝަނުގައި ހުޅުޖަހަން ފެންނަ ކަމަށް ބުނެ، އާންމުންގެ މެދުގައި ނަފްރަތު އުފެދޭ ގޮތަށް ވާހަކަ ދައްކާފައިވާކަމަށް ވާހަކަ ދެކެވެމުން އަންނަ ދަނޑިވަޅެއްގަ އެވެ.
ފުލުހުން ބުނީ ތަހުގީގުކުރަމުންދާ މައްސަލައަކާއި ގުޅިގެން ކޯޓު އަމުރެއްގެ ދަށުން އައްބާސް އާދިލް ރިޒާ ހައްޔަރުކޮށްފައިވާ ކަމަށެވެ. ނަމަވެސް އިތުރު ތަފްސީލެއް އަދިހާމައެއް ނުކުރެއެވެ.
މިދިޔަ ހުކުރު ދުވަހު އައްބާސް އާދިލް ރިޒާގެ އެކައުންޓުން ކުރި ޓްވީޓުގައި، އޭނާ ތުހުމަތުކުރި ގޮތުގައި ފެބްރުއަރީ 8، 2012 ގައި އައްޑޫގައި ހުޅުޖެހީ އިންޑިއާގެ އޯޑަރަށް ކަމަށެވެ. ފޮޓޯތަކާ އެކު ކުރި ޓްވީޓުގައި އޭނާ ބުނީ އެކަމުން ލިބުނު ގެއްލުމުން އަދި އޮތީ ބަދަލު ނުހިފި ކަމަށެވެ.
"އެމްބަސީން ފަށަން އަޅުގަނޑަށް ފެންނަނީ،" އިންޑިއާ އައުޓް ހޭޝްޓެގާ އެކު އޭނާ ކުރި ޓްވީޓުގައި ވެއެވެ.
ކުރީގެ ރައީސް ޑރ. މުހައްމަދު ވަހީދުގެ ތަރުޖަމާނު ކަމާއި، މެލޭޝިއާގައި ހުންނަ ރާއްޖޭގެ އެމްބަސީގައި ވެސް މީގެ ކުރިން އިސް މަގާމެއްގެ އިތުރުން ބޮޑެތި އެހެން މަގާމުތައް ވެސް ފުރާފައިވާ އައްބާސް ކުރި ޓްވީޓް އެތައް ބަޔަކު ވަނީ ކުށްވެރިކުރަމުން ނެވެ.
އޭނާ އަށް ފިޔަވަޅު އެޅުމަށް އާންމުންނާއި ސިޔާސީ ޕާޓީތަކުން ގޮވާލާފައިވެއެވެ. އަދި އެ މައްސަލައިގައި ފިޔަވަޅު އަޅާނެ ކަމަށް ސަރުކާރުން ބުނެފައިވެއެވެ.
