އަންހެނުންގެ ތަރައްގީއަށް މަސައްކަތްކުރާ ކޮމެޓީތަކުގެ އިންތިޚާބު އަހަރަކު އެއްފަހަރު ބާއްވަން މަޖިލީހުން ފާސްކޮށްފި އެވެ.
މިއީ އެތައް ބައިއިލެކްޝަނެއް ބާއްވަން ޖެހުމުގެ ސަބަބުން އެކަމުގެ ޚަރަދު ކުޑަކުރުމަށް ސަރުކާރުގެ ފަރާތުން ލޯކަލް ކައުންސިލްތަކުގެ އިންތިޚާބުގެ ގާނޫނަށް އިސްލާހު ވެލިދޫ ދާއިރާގެ މެމްބަރު މުހައްމަދު އަބްދުﷲ ޝަފީގު ހުށަހެޅުއްވި އިސްލާހެކެވެ.
ލާމަރުކަޒީ ކޮމެޓީން ބިލު ދިރާސާކޮށް، ފާސްކުރިގޮތަށް މަޖިލީހުގެ ތަޅުމުން ފާސްކޮށްފައިވަނީ 34 މެމްބަރުންގެ ވޯޓުންނެވެ. ބިލު ފާސްކުރަން ނުފެންނަކަމަށް ވޯޓު ދެއްވީ 2 މެމްބަރުންނެވެ.
މިހާރު ޤާނޫނުގައި އޮތްގޮތުން، އަންހެނުންގެ ކޮމެޓީތަކުގެ މެމްބަރުން އިސްތިއުފާދީފިނަމަ 60 ދުވަހުގެ ތެރޭގައި ބައި-އިލެކްޝަން ބާއްވަންޖެހެއެވެ.
މިހާރު ގެނެވުނު އިސްލާހާއެކު 365 ދުވަހުގެ ތެރޭގައި ބައި-އިލެކްޝަން ބޭއްވޭގޮތަށް ވަނީ ބަދަލުކުރެވިފައެވެ. އަދި ދެ ބައި-އިލެކްޝަން ދޭތެރޭ 300 އާއި 365 ދުވަހާއި ދެމެދުގެ މުއްދަތެއް އޮންނަންވާނެ ކަމަށް އިސްލާހުގައިވެއެވެ.
2021 ވަނަ އަހަރު ލޯކަލް ކައުންސިލް އިންތިހާބު ބޭއްވި ފަހުން މިހާތަނަށް ތިރީހަކަށް ބައި-އިލެކްޝަން ބާއްވާފައިވެއެވެ.
މީގެ ތެރެއިން އެންމެ ގިނައީ އަންހެނުންގެ ތަރައްގީއަށް މަސައްކަތް ކުރާ ކޮމެޓީތަކުގެ ބައި-އިލެކްޝަންތަކެވެ. ކައިރި ކައިރީގައި ގިނަ ބައި-އިލެކްޝަންތަކެއް ބޭއްވުމަކީ ދައުލަތުގެ ހަރަދު ބޮޑުވެގެންދާ ކަމަކަށްވާތީ ބައި-އިލެކްޝަންތައް މަދުކުރުމަށް ހުށަހެޅި އިސްލާހަށް މެމްބަރުން ބަހުސްކުރެއްވިއިރު، ހަމައެކަނި ކޮމެޓީތަކުގެ އަންހެނުން ކޮމެޓީތަކުން ވަކިވާން ބޭނުންވަނީ ކީއްވެތޯ ބެލުމަށް ދިރާސާތަކެއް ކުރަންޖެހޭކަމަށް މެމްބަރުން ފާހަގަކުރެއްވިއެވެ.
ކޮމެޓީތަކުގެ އަންހެން މެމްބަރުންނަށް ބައެއް ކައުންސިލް މެމްބަރުންގެ ފުރައްސާރައާއި އުނދަގޫ ކުރިމަތިވާކަމަށް މަޖިލީހުގެ މެމްބަރުން ވަނީ ތުހުމަތުކުރައްވާފައެވެ.
މިދިޔަ އަހަރު އީސީން ވަނީ އަންހެނުންގެ ކޮމެޓީތަކުގެ 11 ބައި-އިލެކްޝަން ބާއްވައިފަ އެވެ. މިއަހަރުގެ މިހާތަނަށް 10އަކަށްވުރެ ގިނަ ބައި-އިލެކްޝަންވަނީ ބާއްވާފައެވެ.
އަންހެނުންގެ ކޮމެޓީތަކުގެ ބައި އިލެކްޝަންތައް ބޭއްވުމަށް މި އަހަރުގެ މިހާތަނަށް އިލެކްޝަންސް ކޮމިޝަނުން 1.4 މިލިއަން ރުފިޔާ ވަނީ ހޭދަކޮށްފައެވެ. ބައި-އިލެކްޝަންތައް ބޭއްވުމަށް މިއަހަރުގެ ބަޖެޓުގައި އެ ކޮމިޝަނަށް ކަނޑައަޅާފައި އޮތީ 1.5 މިލިއަން ރުފިޔާ އެވެ.
