ޝަރީޢަތް ނިމެންދެން މާފުށި ޖަލުގައި ބަންދުކޮށްފައި ހުރި ގައިދީއަކު މަރުވެއްޖެއެވެ.
މޯލްޑިވްސް ކަރެކްޝަނަލް ސަރވިސް އިން ބުނީ މަރުވެފައިވަނީ މ. މުލި ހުދުފިނިފެންމާގޭ މުޙައްމަދު ނަޝީދު ކަމަށެވެ. އޭނާއަކީ އުމުރުން 43 އަހަރުގެ މީހެއް ކަމަށް ވެސް ބުންޏެވެ.
ކަރެލްޝަންސް އިން ބުނީ މުޙައްމަދު ނަޝީދު ނޭވާ ނުލާތީ އޭނާގެ ގޮޅީގައި ހުންނަ ބަންދުމީހަކު ޕްރިޒަން އޮފިސަރުންނަށް އެންގުމުން، އޭނާ މާފުށީ ޖަލުގެ މެޑިކަލް ސެންޓަރަށް ވަގުތުން ގެންގޮސް ސީޕީއާރް ދީފައިވާ ކަމަށެވެ. އަދި ސީޕީއާރަށް ފަހުވެސް ނޭވާ ނުލުމުން، 17:26 ހާއިރު އޭނާ ނިޔާވިކަމަށް ޑޮކްޓަރު ކަނޑައަޅާފައިކަމަށް ވެސް ކަރެކްޝަނުން ބުންޏެވެ.
މުޙައްމަދު ނަޝީދަކީ މަސްތުވާތަކެއްޗާ ބެހޭ މައްސަލައެއްގެ ޝަރީޢަތް ނިމެންދެން ބަންދުކޮށްފައި ހުރި މީހެކެވެ.
މުޙައްމަދު ނަޝީދު ނިޔާވުމާ ގުޅިގެން ވަނީ ވަގުތުން އެކަން އޭނާގެ ޢާއިލާއަށާއި އިންސްޕެކްޓަރ އޮފް ކަރެކްޝަނަލް ސަރވިސްއަށާއި މޯލްޑިވްސް ޕޮލިސް ސަރވިސްއަށާއި ހިއުމަން ރައިޓްސް ކޮމިޝަން އޮފް ދަ މޯލްޑިވްސްއަށާއި ނެޝަނަލް އިންޓެގްރިޓީ ކޮމިޝަން އަށް އަންގާފައިކަމަށް ކަރެކްޝަނުން ބުންޏެވެ.
