ގދ. މަޑަވެއްޔާއި ގދ. ހޯޑެއްދޫ ކޯޒުވޭއަކުން ގުޅާލުމުގެ އަމަލީ މަސައްކަތް އެމްޓީސީސީން މިއަދު ފަށައިފިއެވެ.
ޒަމާނީ ފެންވަރަށް ހަދާ މި ހަދަނީ ކޯޒުވޭގެ ދަށުން އޮޔެ ދެމޭނެހެން އަދި ކޯޒްވޭމަތިން ހެވީ ވެހިކަލަށް ވެސް ދަތުރުކުރެވޭ ފެންވަރަށެވެ.
އެމްޓީސީސީން ބުނީ ޕްލޭނާއި އެއްގޮތަށް މަސައްކަތްދާނަމަ، އަމާޒު ހިފާފައިވާ މުއްދަތުގައި މި ކޯޒުވޭގެ މަސައްކަތްނިމި، ރައްޔިތުންނަށް ޚިދުމަތް ލިބެންފަށާނެ ކަމަށެވެ. އަދި މިހާރުތަޖުރިބާކުރާ ރަށް ގިރުމުގެ މައްސަލަ ވެސް ހައްލުވާނެ ކަމަށެވެ.
އެ ކުންފުނިން ބުނީ މި ކޯޒުވޭ ގުޅާލެވެނީ މަޑަވެއްޔާއި ހޯޑެއްދޫ އާދޭތެރޭ އޮންނަ "ކަންނިގިލާ" އާއި "ހާދޫ" އާވެސް އެކުގައި ކަމަށްވާތީ، މި ދެ ރަށަކީ އިގްތިސާދީ މަސައްކަތްތައް ކުރެވެން އޮތް ދެރަށް ކަމަށެވެ.
އެހެންވުމުން މި ކޯޒުވޭ ވެގެންދާނީ މަޑަވެއްޔާއި ހޯޑެއްދުއަށް ވެސް ދިރުން ގެނުވާނެ ތަނެއް ކަމަށާއި މި ޒަމާނީ ކޯޒުވޭގެ ސަބަބުން ފަތުރުވެރިކަމަށް ވެސް އައު ދިރުމެއް ލިބި، އިގްތިސާދީ އަދި ވިޔަފާރީގެ ދާއިރާއިން ގިނަ ފައިދާތަކެއް ލިބިގެންދާނެ ކަމަށް އެމްޓީސީސީން ބުންޏެވެ.
މި މަޝްރޫޢުގެ ދަށުން 260 މީޓަރުގެ ގޮނޑުދޮށް ހިމާޔަތް ކުރުމާއި ކޯޒުވޭގެ 2،544 ކިއުބިކް މީޓަރުގެ ސެގްމެންޓް ކޮންކްރީޓް މަސައްކަތް ކުރުން ހިމެނެއެވެ. އަދި 285 ސްޕަން ޕައިލް ހަރުކުރުމާއި 4،596 އަކަ މީޓަރުގެ ސަރަހައްދުގައި ތާރު އެޅުން ވެސް ހިމެނެއެވެ.
މީގެ އިތުރުން 1،378 އަކަ މީޓަރު ސަރަހައްދެއްގައި ޕޭވިންގ ހެދުމާއި ކޯޒުވޭއަށް ދެވެންއޮންނަ މަގުތަކުގެ 3،144 އކަމީޓަރު ސަރަހައްދެއްގައި ސަބްބޭސް ހެދުމާއި ތާރުއެޅުން ވެސް ހިމެނެއެވެ.
84.17 މިލިއަން ރުފިޔާގެ މި މަޝްރޫގައި ރެއިލިންގ އަދި މަގުބައްތި ހަރުކުރުމާއި މަގުމަތީ ނިޝާން ކުރެހުމުގެ މަސައްކަތް ވެސް ހިމެނޭ ކަމަށް އެ ކުންފުނިން ބުންޏެވެ.
މިއަދު ބޭއްވި ރަސްމިއްޔާތުގައި މަޑަވެލި ދާއިރާގެ މެމްބަރު ހުސައިން ފިރުޝާނާއި މަޑަވެލި ކައުންސިލުގެ ރައީސް ފިޔާޒު ހަސަން އަދި ހޯދެއްދޫ ކައުންސިލުގެ ރައީސް ހުސައިން ވާރިޝް ބައިވެރިވެވަޑައިގެންނެވިއެވެ. އަދި އެމްޓީސީސީގެ ސީއީއޯ އާދަމް އާޒިމްއާއި އެ ކުންފުނީގެ އިސްވެރިންނާއި ޢާންމުން ވަނީ ބައިވެރިވެފައެވެ.
