ޔުނައިޓެޑް ކިންގްޑަމް އޮފް ދަ ގްރޭޓް ބްރިޓްން އެންޑް ނޯދަން އަޔަލޭންޑްސްއާއި ކޮމަންވެލްތުގެ 14 ގައުމެއްގެ އެންެމެ އިސްވެރިޔާ، އިނގިރޭސިވިލާތުގެ ރާނީ އެލިޒަބަތު ދެވަނަ އުމުރުފުޅުން 96 އަހަރުފުޅުގައި އަވަހާރަވެއްޖެއެވެ.
ޝާހީ ގަނޑުވަރު ބަކިންހަމް ޕެލަަސްއިން ނެރުނު ކުރު ބަޔާނެއްގައި ވާގޮތުން، 70 އަހަަރަށްވުރެ ދިގު މުއްދަތަކަށް އިނގިރޭސި ތަޚުތުގައި ރެދަލިކުރެއްވި ރާނީ އެލިޒަބަތު ދެވަނަ އަވަހާރަވީ މިއަދު މެންދުރު ފަހުގެ (ދިވެހިރާއްޖެއަށް މިރޭގެ) ވަގުތެއްގައެވެ. އަވަހާރަވީ އެކަމަނާގެ ހާލުކޮޅު ދެރަވެގެން ފަރުވާދެމުން ދަނިކޮށް ސްކޮޓްލޭންޑްގައި ހުންނަ ބެލްމޯރަލް ފޯޓް ގަނޑުވަރުގައެވެ. ފާއިތުވި ޖުލައިމަހުން ފެށިގެން އެކަަމަނާ ދިރިއުއްވަމުން ގެންދެވީ އެ ގަނޑުވަރުގައެވެ.
އެލިޒަބަތު ދެވަނައިގެ ބައްޕާފުޅު ރަސްގެފާނު ޖޯޖް ހަވަނަ އަހަވާރަވުމާގެ ގުޅިގެން 1952 ވަނަ އަހަރުގެ ފެބުރުވަރީ މަހުގެ 6 ވަނަ ދުވަހު ރަނިކަމާ ހަވާލުވެވަޑައިގަތް އިރު އެކަމަނާގެ އުމުރުފުޅަކީ 25 އަހަރުފުޅެވެ. އޭގެ 70 އަހަރު ފަހުން އުމުރުފުޅުން 96 އަހަރުފުޅުގައި މިއަދު އެކަމަނާ އަވަހާރަވިއިރު، އެކަމަނާގެ ރަނިކަމުގައި އިނގިރޭސިވިލާތުގައި 15 ބޮޑުވަޒީރަކު ވެރިކަން ކުރައްވާފައި ވެއެވެ. އޭގެ ތެރޭގައި 1874 ވަނަ އަހަރު އުފަންވެވަޑައިގަތް ވިންސްޓަން ޗާޗިލްއާއި، އޭގެ 101 އަހަރު ފަހުން، 1975 ވަނަ އަހަރު އުފަންވެވަޑައިގަތް ލިޒް ޓްރަސް ހިމެނިވަޑައިގަންނަވައެވެ. ލިޒް ޓްރަސް ބޮޑުވަޒީރުކަމާ ހަވާލުވެވަޑައިގަތީ މި މިމަހުގެ 5 ވަނަ ދުވަހުއެވެ.
ރާނީ އެލިޒަބަތު ދެވަނައަކީ 1707 ވަނަ އަހަރުން ފެށިގެން އިނގިރޭސިވިލާތުގައި ރަސްކަންކުރަމުން އަންނަ ޝާހީ އާއިލާގެ ބޭފުޅުންގެ ތެރޭން އެންމެ ގިނަ ދުވަހު ވެރިކަމުގައި ހުންނެވި ބޭފުޅާއެވެ. އެކަމަނާ އަވަހާރަވުމާ ގުޅިގެން އިނގިރޭސި ތަހުތުގައި ރެދަލިކުރައްވާނީ އެކަަމަނާގެ ދޮށީ ދަރިކަލުން އަދި ވަލީއަހުދު ޕްރިންސް ޗާލްސްއެވެ. އުމުރުފުޅުން 73 އަހަރުފުޅުގެ ޗާލްސް ވެވަޑައިގަންނަވާނީ ރަސްގެފާނު ޗާލްސް ތިންވަނައަށެވެ.
ބަރުލަމާނީ ނިޒާމެއް އޮންނަ އިނގިރޭސިވިލާތުގައި ރަސްގެފާނަށް ނުވަތަ ރާނީއަކީ ޝަރަފުވެރި މަގާމެއްގައި ހުންނަވާ ރަމްޒީ ވެރިއެކެވެ. ވެރިކަން ހިންގަވަނީ ބޮޑުވަޒީރެވެ.
21 އެޕްރީލް 1921 ގައި އުފަންވެވަޑައިގަތް އެލިޒަބަތު އެލެގްޒާންޑްރާ މޭރީއަކީ 1936 އިން 1952 އަށް އިނގިރޭސި ތަޚުތުގައި ރެެދަލިކުރެއްވި ރަސްގެފާނު ޖޯޖް ހަވަނައިގެ ލިބިވަޑައިގެންނެވި ދެ ދަރިކަނބަލުންގެ ތެރޭން ދޮށީ ދަރިކަނބަލުންނެވެ. ހަނގު ދަރިކަނބަލުންނަކީ ޕްރިންސެސް މާގްރެޓްއެެވެ.
އެކަމަނާގެ ފިރިކަލުން ޕްރިންސް ފިލިޕް އޮފް ގްރީސް އެންޑް ޑެންމާކް (ޑިއުކު އޮފް އެޑިންބަރާ) އެކަމަނާއާ ކައިވެނި ބައްލަވައިގަތީ 20 ނޮވެންބަރު 1947 ގައެވެ. އެ ދެ ބޭފުޅުންނަށް 4 ބޭފުޅުން ލިބިވަޑައިގަތެވެ. އެއީ ޕްރިންސް ޗާލްސް، ޕްރިންސެސް އޭން، ޕްރިންސް އެންޑްރޫ އަދި ޕްރިންސް އެޑްވަޑްއެވެ.
