ކ. ހިންމަފުށީގައި ހުންނަ އައްސޭރި ޖަލަށް އެތެރެކުރަން އުޅުނު ފޯނުތަކަކާއި، ބައެއް ސާމާނު ހޯދައި މީހަކު ހައްޔަރުކޮށްފިއެވެ.
މި މައްސަލާއާއި ގުޅިގެން ހައްޔަރުކޮށްފައިވަނީ 30 އަހަރުގެ ދިވެހި ފިރިހެނެކެވެ. މި މީހާ ހައްޔަރުކޮށްފައިވަނީ އައްސޭރި ޖަލަށް ފޯނުތަކެއް އެތެރެކުރަން އުޅޭކަމަށް ފުލުހުންނަށް ލިބުނު މައުލޫމާތަކާ ގުޅިގެން ހިންމަފުށި ޕޮލިސް ސްޓޭޝަނާއި އައްސޭރި ޖަލުގެ މުވައްޒަފުން ގުޅިގެން ހިންގި އޮޕަރޭޝަނެއްގައި މި ޖެނުއަރީ މަހުގެ 24 ވަނަ ދުވަހުގެރޭ 22:30 ހާއިރު ހިންމަފުށި އައްސޭރިޖަލާއިދިމާ ގޮނޑުދޮށުންނެވެ.
މިމީހާއަށް އައްސޭރި ޖަލުގެ މުވައްޒަފުން ފެނުމާއެކު ފިލަން ދުވެފައިގޮސް އައްސޭރި ޖަލުގެ އުތުރުފަރާތު މޫދަށް އޭނާގެ އަތުގައި އޮތް ކޮތަޅެއް އެއްލާލާފައިވެއެވެ. އަދި އެމީހާ ހުއްޓުވައި ފުލުހުންގެ ބެލުމުގެ ދަށަށް ގެނެސް ކޮތަޅު އެއްލިދިމާ ބަލައިފާސްކުރިއިރު މޫދުން ފެނުނު ކޮތަޅެއްގެ ތެރެއިން 09 ފޯނާއި 12 ހެޑްސެޓާއި 7 ޗާޖަރުގެ އިތުރުން ފޯނާގުޅޭ އެހެނިހެން ސާމާނު ފެނިފައިވެއެވެ.
މި މައްސަލައާ ގުޅިގެން ހައްޔަރުކޮށްފައިވާ މީހާގެ ބަންދާމެދު ގޮތެއް ނިންމުމަށް ކ.ހުރާ މެޖިސްޓްރޭޓް ކޯޓަށް ހާޒިރުކުރުމުން ވަނީ، މިނިސްޓްރީ އޮފް ހޯމްއެފެއާޒުން ކަނޑައަޅާތަނެއްގައި ބަންދުގައި ބެހެއްޓުމަށް 15 ދުވަހުގެ މުއްދަތެއް ދީފައިވެއެވެ.
