ހުޅުމާލޭ ފޭސް ދޭއްގެ ފުރަތަމަ ސްކޫލް ހުޅުވައިފިއެވެ.
ކާމިލް ދީދީ ޕްރައިމަރީ ސްކޫލް (ކޭޕީއެސް) ގެ ނަން ދީފައިވާ މި ސްކޫލް ރަސްމީކޮށް ހުޅުވައި ދެއްވީ ނައިބު ރައީސް ފައިސަލް ނަސީމެވެ.
މި ސްކޫލު ހުޅުވުމަށް ބޭއްވި ރަސްމިއްޔާތުގައި އެޑިއުކޭޝަން މިނިސްޓަރު ޑރ. އައިޝަތު އަލީ އާއި އެ މިނިސްޓްރީގެ އިސްވެރިންނާއި ދައުލަތުގެ އިސްވެރިން ބައިވެރިވެވަޑައިގެންނެވިއެވެ.
މި ސްކޫލުގައި 824 ދަރިވަރުން ތައުލީމު ހާސިލުކުރަމުން އަންނައިރު، މި ސްކޫލުގައި ފައުންޑޭޝަން ލެވަލުން ފެށިގެން ގްރޭޑް ހަޔަކަށް ކިޔަވައިދިނުމަށް ވަނީ ނިންމާފައެވެ.
އެލްކޭޖީ އާއި ޔޫކޭޖީއަށް ހަތަރު ދަންފަޅިއަކަށް ދެ ކްލާސްރޫމްގައި ކިޔަވައިދޭއިރު، ގްރޭޑް އެކަކުން ހަޔަކަށް ކިޔަވައިދެނީ ދެ ދަންފަޅިއަށް 10 ކްލާސް ރޫމްގައެވެ.
މި ސްކޫލްގައި 47 ޓީޗަރުންނާއި އިދާރީ 8 މުވައްޒަފުންނާއި މަސައްކަތު މީހުންގެ ގޮތުގައި 10 މީހުން ތިބެއެވެ.
ކާމިލް ދީދީ ޕްރައިމަރީ ސްކޫލް (ކޭޕީއެސް) ނިސްބަތްވަނީ ދިވެހިރާއްޖޭގައި އެކުލަވާލެވުނު ފުރަތަމަ ގާނޫނު އަސާސީގެ ދަށުން އައްޔަންކުރެވުނު ފުރަތަމަ ވަޒީރުލް މަޢާރިފް އަލްއުސްތާޛް އަޙްމަދު ކާމިލްދީދީއަށެވެ.
ކޭޕީއެސްގެ ކިޔެވުން ރަސްމީކޮށް މިއަދު ފެށުނު އިރު މި ސްކޫލްގެ ދަރިވަރުން މިއަހަރުގެ ދިރާސީ އަހަރު ފެށުނީންސުރެ މިދިޔަ ހަފްތާގެ ނިޔަލަށް ކިޔަވަން ދިޔައީ ހުޅުމާލޭގެ މުހައްމަދު ގާސިމް ޕްރީސްކޫލާއި، ޣާޒީ ސްކޫލް، ރެހެންދި ސްކޫލް އަދި ހުރަވީ ސްކޫލަށެވެ.
