ތައުލީމީ ދާއިރާގައި މަސައްކަތްކުރާ 79 މީހަކު ތަމްރީނު ހޯދުމަށް އިންޑިއާއަށް ފުރައިފިއެވެ.
މިއީ އެޑިޔުކޭޝަން މިނިސްޓްރީ އާއި އިންޑިޔާގެ ގްލޯބަލް އެޑިޔުކޭޝަން ޓްރެއިނިންގ އިންސްޓިޓިއުޓްއާއި ގުޅިގެން ކުރިއަށްގެންދާ ޕްރޮގްރާމެކެވެ.
އެޑިޔުކޭޝަން މިނިސްޓްރީން ބުނީ މިދަތުރުގައި އަޔޯދިޔާ އަދި ލަކްނޯގެ ސްކޫލްތަކުގައި ކިޔަވައިދިނުމުގައި ބޭނުންކުރަމުންދާ ޕްރެކްޓިސްތައް ބަލައި ދިރާސާކުރާނެ ކަމަށެވެ.
އެގޮތުން ފައުންޑޭޝަނަލް ލިޓެރެސީ އަދި ނިޔުމެރެސީ އާއި ކިޔަވައިވުމުގައި ބޭނުންކުރާނެ އައު ގޮތްތަކާއި އުސޫލުތަކުގެ މައުލޫމާތު ތަމްރީންގެ ތެރެއިން ބައިވެރިންނަށް ފޯރުކޮށްދޭނެކަމަށް ވެސް މިނިސްޓްރީން ބުނެއެވެ.
ރާއްޖޭގެ އެކި ދާއިރާތަކުގައި މަސައްކަތްކުރާ މީހުންނަށް ޚާއްސަކޮށް އިންޑިޔާގައި ތަމްރީން ޕްރޮގްރާމްތައް އަބަދު ވެސް އަންނަނީ ކުރިއަށް ގެންދަމުންނެވެ.
އެގޮތުން މިދިޔަ އޮގަސްޓްމަހުގެ ތެރޭގައި ވެސް ނޫސްވެރިންނަށް ޚާއްސަކޮށް މީޑިޔާ ކައުންސިލާއި އިންޑިޔާގެ ޕްރެސް ކައުންސިލާއި ގުޅިގެން އިންޑިޔާގައި ވަނީ ތަމްރީން ޕްރޮގްރާމެއް ކުރިއަށް ގެންގޮސްފައެވެ.
