ކަރަންޓާއި ފެނުން ނަގަމުން އައި މިންވަރު މީގެކުރިން އަތޮޅު ތެރޭގެ ރަށްރަށުގައި މާލެއަށްވުރެ ބޮޑުކޮށް އޮތް ނަމަވެސް ހުރިހާ ރަށެއްގައި ކަރަންޓާއި ފެނުގެ އަގު މާލެއެކޭ އެއްވަރު ކުރަން ސަރުކާރުން ނިންމައިފިއެވެ.
އެނާޖީއާބެހޭ ވަޒީރު ތޯރިގު ލުތުފީ މިއަދު ނޫސްވެރިންނާ ބައްދަލު ކުރައްވައި ވިދާޅުވީ ކަރަންޓާއި ފެނަށް ސަރުކާރުން މިގެނައި ބަދަލަށް އަމަލު ކުރަން ފަށާނީ އަންނަ މާޗު މަހުގެ 1 ވަނަ ދުވަހުން ފެށިގެން ކަމަށެވެ. އަދި މިއީ ރަށްރަށުގެ ކަރަންޓުގެ އަގު މާލޭގެ އަގަށް ތިރިކުރި ފުރަތަމަ ފަހަރުކަންވެސް މިނިސްޓަރު ތޯރިގް ފާހަގަ ކުރެއްވިއެވެ.
މިނިސްޓަރު ވިދާޅުވީ މީގެކުރިން ކަރަންޓާއި ފެނަށް މާލެއިން ނަގަމުން އައި އަގުތަކަށްވުރެ އަތޮޅުތެރޭގެ ރަށްރަށުގައި ނަގަމުން އައި އަގު ވަރަށް ބޮޑެވެ. އަދ އަތޮޅު ތެރޭގެ އެކި ހިސާބުގައިވެސް އަގުގެ ތަފާތުތަކެއް ހުރިކަމަށް ވިދާޅުވިއެވެ. އެހެންކަމުން ސަރުކާރުން މަސައްކަތް ކުރަމުން އައީ މާލެއާއި އަތޮޅު ތެރޭގެ ފަރަގު ކުޑަކުރެވޭތޯ ކަމަށްވެސް މިނިސްޓަރު ވިދާޅުވިއެވެ.
މިނިސްޓަރު ވިދާޅުވީ މާލެއާ އެއްއަގަކަށް އަތޮޅުތެރޭގެ ކަރަންޓުގެ އަގު ތިރިކޮށްލުމުން އަތޮޅުތެރޭގެ ރަށްރަށުގައި މީގެކުރިން ކަރަންޓް ބިލަށް ދައްކަމުން އައި މިންވަރު 80 ޕަސެންޓް ހެޔޮވެގެން ދާނެކަމަށެވެ. 400 ޔުނިޓް ބޭނުން ކުރަމުން މިހާރު އަންނަ ގެއަކުން ނަމަ ކަރަންޓް ބިލުން 400 ރުފިޔާ ކުޑަވާނެ ކަމަށްވެސް ތޯރިގް ވިދާޅުވިއެވެ.\
ކަރަންޓުގެ އަގު މާލެއެކޭ އެއްވަރަށް ހުރިހާ ރަށެއް ބަދަލު ކޮށްލުމުން މާޗު މަހުން ފެށިގެން 100 ޔުނިޓާ ހަމައަށް ނަގާނީ 1.50 ރ އެވެ. 100 ޔުނިޓުން ފެށިގެން 200 ޔުނިޓާ ހަމައަށް ނަގާނީ 1.70 ރ އެވެ. 200 ޔުނިޓުން މަތި، 300 ޔުނިޓާ ހަމައަށް ނަގާނީ 2.15 ރ އެވެ. 300 ޔުނިޓުން މަތި، 400 ޔުނިޓާ ހަމައަށް ނަގާނީ 2.50 ރ އެވެ.
