މިއަހަރު ނިމުމުގެ ކުރިން ތިލަފުށީގައި ކުނި އެންދުން ހުއްޓާލާނެ ކަމަށާއި، ކުނި ނައްތާލުމުގެ ނިޒާމް ހަރުދަނާކޮށް ރާއްޖޭގެ ކޮންމެ ރަށެއްގައި ވޭސްޓްމެނޭޖްމެންޓް ސެންޓަރެއް މިއަހަރު ނިމުމުގެ ކުރިން ގާއިމް ކުރެވޭނެ ކަމަށް ތިމާވެއްޓާބެހޭ ވަޒީރު ތޯރިގް ލުތުފީ ވިދާޅުވެއްޖެއެވެ.
އެ މިނިސްޓްރީގައި މިއަދު އޮތް ނޫސްވެރިންގެ ބައްދަލުވުމެއްގައި މިނިސްޓަރު ލުތުފީ ވިދާޅުވީ ޒަމާންތަކެއް ވަންދެން ކުނި ނައްތާލުމަށްޓަކައި ކުނި އަންދަމުން އައި ތިލަފުށި ތަރައްގީ ކުރުމަށްޓަކައި 126 މިލިއަން ޑޮލަރުގެ ބޮޑު މަޝްރޫއެއް ފެށުމަށް މިހާރު ހަމަޖެހިފައިވާ ކަމަށެވެ. ތަފާތު ފިޔަވަހި ތަކަކަށް ބަހާލައިގެން ތިލަފުށީގައި ކުރިޔަށްގެންދާ މި މަޝްރޫއު ނިމޭއިރު މިއަހަރު ނިމުމުގެ ކުރިން ތިލަފުށީގައިވެސް ވޭސްޓް މެނޭޖްމެންޓް ސެންޓަރެއް ގާއިމް ކުރެވޭނެ ކަމަށް މިނިސްޓަރު ވިދާޅުވިއެވެ. މިއީ އޭޑީބީގެ އެހީގައި ކުރިޔަށް ގެންދާ މަޝްރޫއެކެވެ.
މިނިސްޓަރު ވިދާޅުވީ އުފެދޭ ކުނީގެ ތެރޭގައި ހުންނަ އެންމެ ނުރައްކާތެރި ކުނި ކަމަށްވާ ހޮސްޕިޓަލް ފަދަ ތަންތަނުން ތިލަފުށްޓަށް ގެންދެވޭ ކުނި ނައްތާލާނެ އެއްވެސް މެކޭނިޒަމެއް މީގެކުރިން ނެތެވެ. ނަމަވެސް އެފަދަ ނުރައްކާތެރި ކުނި ނައްތާލުމަށްޓަކައި އިންސިނިރޭޓަރު ގެނެސް މިހާރު އިންސްޓޯލް ކުރަމުން އަންނަ ކަމަށްވެސް ތޯރިގް ވިދާޅުވިއެވެ.
