ބަންގްލާދޭޝްގެ ބޭރު ފައިސާގެ ރިޒާވް ދަށްވަމުން ދާތީއާއި، އެގައުމުގެ ބެލެންސް އޮފް ޕޭމަންޓް ރަނގަޅުކުރުމަށާއި، ބަޖެޓަށް ބޭނުންވާ އިތުރު ފައިސާ ހޯދުމަށާއި، މޫސުމަށް އަންނަ ބަދަލުތަކުން ލިބޭ ގެއްލުން ކުޑަކުރުމަށްޓަކައި އިންޓަނޭޝަނަލް މަނިޓަރީ ފަންޑް (އައިއެމްއެފް) ގެ އެހީއަށް އެ ގައުމުގެ ފިނޭންސް މިނިސްޓަރު އޭއެޗްއެމް މުސްޠަފާ ކަމާލް އެދިވަޑައިގެންފިއެވެ.
ބަންގްލާދޭޝްގެ ދަ ޑެއިލީ ސްޓާރ ނޫހަށް ލިބުނު ލިޔެކިއުންތަކަކާ ހަވާލާދީ އެ ނޫހުން ބުނެފައިވާ ގޮތުގައި އެގައުމުން އައިއެމްްފަށް ހުށަހަޅާފައި ވަނީ 4.5 ބިލިއަން އެމެރިކާ ޑޮލަރުގެ ލޯނަކަށެވެ. ބަންގްލާދޭޝް ވެފައި މިވަނީ ޕާކިސްތާނާއި، ސްރީލަންކާއަށް ފަހު އިގުތިސާދު ކޮޅަށްޖެހުމަށް ދެކުނު އޭޝިޔާ ސަރަހައްދުން އައިއެމްއެފްގެ އެހީއަށް އެދޭ ތިންވަނަ ގައުމަށެވެ.
އެ ނޫހުން ބުނެފައިވާ ގޮތުގައި ފިނޭންސް މިނިސްޓަރު މުޞްޠަފާ ކަމާލް އައިއެމްއެފްގެ މެނޭޖިންގ ޑިރެކްޓަރު ކްރިސްޓަލީނާ ޖޯޖިއޭވާއަށް ލިއުއްވާފައި ވަނީ އާދިއްތަދުވަހުއެވެ.
މިޚަބަރާ ގުޅިގެން ނޫސްވެރިން ފިނޭންސްަ މިނިސްޓްރީގެ ބަހެއް ހޯދަން ކުރި މަސައްކަތް ވަނީ ކާމިޔާބުނުވެފައެވެ.
ކޮވިޑް-19 އަށްފަހު ދުނިޔޭގެ އިގްތިސާދީ ހާލަތު ރަނގަޅުވަމުން އަންނަނިކޮށް ފެނުނު ރަޝިޔާ-ޔުކްރޭން ހަނގުރާމައިގެ ސަބަބުން ހަކަތައާއި، ކާބޯތަކެތީއަގު އުފުލެމުން ދާތީ އިގްތިސާދީ ހާލަތު ގޯސްވުމުގެ ސަބަބުން ފާއިތުވި އަހަރެއްހާ ދުވަހުގެ ތެރޭގައި ޕާކިސްތާން، ސްރީލަންކާ، ގާނާ، ޓެންޒޭނިޔާ، ޒެންބިޔާ، އިތިއޯޕިޔާފަދަ ގައުމުތަކުން ވަނީ އައިއެމްއެފްގެ އެހީއަށް އެދިފައެވެ.
އައިއެމްއެފްއިން މިހާރު ވަނީ މިގައުމުތަކުގެ ތެރޭން ޕާކިސްތާނަށް 4 ބިލިއަން އެމެރިކާ ޑޮަލަރު އަދި ޓެންޒޭނިޔާއަށް 1.05 ބިލިއަން ޑޮލަރުގެ ލޯނު ދޭން އެއްބަސްވެފައެވެ. ހުޅަނގު އެފްރިކާގެ އެންމެ ބޮޑު އެއް އިގުތިސާދު އޮންނަ ގާނާއިން ވެސް ވަނީ 1.5 ބިލިއަން ޑޮލަރުގެ ލޯނަކަށް އެދިފައެވެ.
ފާއިތުވި 10 މަސްދުވަހަށް ބަލާއިރު، ބަންގްލާދޭޝްއިން ވަނީ މުދާ އެތެރެކުރުމަށް 81.5 ބިލިއަން ޑޮލަރު ހޭދަކޮށްފައެވެ. މިއީ މީގެ އަހަރެއްހާ ދުވަސް ކުރިއަށް ބަލާއިރު %39 ގެ އިތުރުވުމެކެވެ. އެހެންކަމުން، އެގައުމުގެ ކަރެންޓް އެކައުންޓް ޑެފިސިޓް ވަނީ 17.2 ބިލިއަން ޑޮަލަރަށް ބޮޑުވެފައެވެ. ނަތީޖާއެއްގެ ގޮތުން ގައުމުގެ ބޭރު ފައިސާގެ ރިޒާވަށް ދަނީ ނޭދެވޭ އަަސަރުކުރަމުންނެވެ.
ކައިރި މުސްތަގުބަލެއްގައި މުދާ ބޭރުކުރާ މިންވަރު އިތުރުނުވާނަމަ އަދި ބޭރުގައުމުތަކުގައި މަަސައްކަތްކުރާ ބަންގްލާދޭޝް މީހުން ގައުމަށް ފައިސާ އިތުރުުނުވާނަމަ ބޭރު ފައިސާގެ ރިޒާވް ދަށްވަމުން ދާނެކަން ބަންގްލާދޭޝްއިން ވަނީ ފާހަގަކޮށްފައެވެ. އެގައުމުގެ ބޭރު ފައިސާގެ ރިޒާވަށް ބަލާއިރު، ފާއިތުވި އަހަރުގެ ޖުލައި މަހު ރިޒާވްގައި 45 ބިލިއަން އެމެރިކާ ޑޮލަރު ހުއްޓެވެ. މި ޖުލައި މަހު މި އަދަދު ވަނީ 39.7 ބިލިއަން ޑޮލަރަށް ދަށްވެފައެވެ. އެއީ ގާތް މުދާ އެތެރެކުރުމަށް ގަނޑަކަށް 6 މަހަށް ފުދޭނެ ފައިސާއެވެ.
