ކިޔަވާ ކުދިންގެ އާބާދީ 50 އަށްވުރެ މަދު 9 ސްކޫލެއްގައި ވީޑިޔޯ ކޮންފަރެންސަކުން އިސްކަންދަރު ސްކޫލާ ގުޅުވާލައިގެން ކިޔަވައިދޭ ގޮތަށް ނިންމައިފިއެވެ.
އެކަން އިފްތިތާޙު ކުރުމަށް މިއަދު އޮތް ރަސްމިއްޔާތެއްގައި އެޑިޔުކޭޝަން މިނިސްޓަރ ޑރ އައިޝަތު ޝިހާމް ވިދާޅުވީ ރާއްޖޭގައި މިވަގުތު 50 ކުދިންނަށްވުރެ ދަށް އާބާދީއެއް އޮތީ އެންމެ 9 ސްކޫލްގައި ކަމަށާއި އިސްކަންދަރު ސްކޫލާ ވީޑިޔޯ ކޮންފަރެންސަކުން ގުޅުވާލައިގެން އެ 9 ސްކޫލްގެ ކިޔެވުން އަންނަ ހަފްތާގެ ތެރޭގައި ފެށޭނެ ކަމަށެވެ.
މިނިސްޓަރު ވިދާޅުވީ ޒަމާނީ ވަސީލަތުގެ އެހީގައި ވީޑިޔޯ ކޮންފަރެންސަކުން އިސްކަންދަރު ސްކޫލާއި އެ 9 ސްކޫލް ގުޅުވާލައިގެން ކިޔަވައިދެވޭނެ ހުރިހާ އިންތިޒާމެއް މިހާރު ވަނީ އެ ސްކޫލްތަކުގައި ގާއިމްކޮށް ނިމިފައެވެ. މިކަމަށް ޚަރަދު ކޮށްފައި ވަނީ ވޯލްޑް ބޭންކުން ލިބުނު ލޯނު އެހީއަކުންނެވެ.
ރާއްޖޭގައި މިވަގުތު 50 ކުދިން ހަމަނުވާ 9 ސްކޫލަކީ ހއ. ތަކަންދޫ ސްކޫލް، ހއ. މޮޅަދޫ ސްކޫލް، ނ. ފޮއްދޫ ސްކޫލް، ނ. މަންދޫ ސްކޫލް، ބ. ފުޅަދޫ ސްކޫލް، އދ. ދިއްދޫ ސްކޫލް، މ. ރަތްމަންދޫ ސްކޫލް، މ. ވޭވަށު ސްކޫލްގެ އިތުރުން ގއ. ކޮނޑޭ ސްކޫލެވެ.
