ސްރީލަންކާގެ ރައީސު ގޮތާބޭ ރާޖަޕަކްސާ މަގާމުން އިސްތިއުފާދެއްވިކަން މާދަމާ އިއުލާންކުރާނެ ކަމުގައި އެގައުމުގެ ގާނޫނުހަދާ މަޖިލީހުގެ ރައީސު މަހިންދަ ޔާޕާ އަބޭވަރްދަނަ ވިދާޅުވެއްޖެއެވެ. އޭނާ މިހެން ވިދާޅުވެފައި ވަނީ އޭނާގެ އޮފީހުން މިރޭ ނެރުނު ރަސްމީ ބަޔާނެއްގައެވެ.
ރައީސު ރާޖަޕަކްސާ މިއަދު މާލެއިން ސިންގަޕޫރަށް ދަތުކުރި ސައޫދީ އެއާލަންސްގެ ފްލައިޓުން ސިންގަޕޫރަށް ވަޑައިގަތުމަށް ފަހު ގިނަ އިރުތަކެއް ނުވެ އޭނާ ވަނީ އިސްތިއުފާގެ ސިޓީ ގާނޫނުހަދާ މަޖިލީހުގެ ރައީސަށް އީމޭލްކުރައްވާފައެވެ. އަދި މިރޭގެ ވަގުތެއްގައި އެ ސިޓީގެ އަސްލު ވަނީ ސިންގަޕޫރުގައި ހުންނަ ސްރީލަންކާގެ ހައިކޮމިޝަން މެދުވެރިކޮށް މަޖިލީހުގެ ރައީސަށް ލިބިވަޑައިގެންފައެވެ.
އެ ސިޓީގެ ސައްހަކަން ކަށަވަރު ކުރުމަށް މިހާރު ވަނީ އެޓާނީ ޖެނެރަލްގެ އަތްޕުޅަށް އަރުވާފައެވެ.
ސްރީލަންކާގައި ރައީސުކަމުގެ މަގާމުގައި ހުންނަވައި އެމަގާމުން އިސްތިއުފާދެއްވި ފުރަތަމަ ބޭފުޅާ، ރައީސު ގޮތާބޭގެ އިސްތިއުފާގެ ޚަބަރާއެކު ގިނަ ބަޔަކު ދަނީ މަގުމައްޗަށް ނުކުމެ އުފާފާޅުކުރަމުންނެވެ.
ގޮތާބޭ މިރޭގެ ވަގުތެއްގައި ސިންގަޕޫރަށް ވަޑައިގަތް ނަމަވެސް، އެއީ އޭނާގެ ފަހު މަންޒިލްކަން އަދި ކަށަވަރެއް ނުވެއެވެ. ސިންގަޕޫރު ސަރުކާރުން ނެރުނު ބަޔާނެއްގައި ބުނެފައި ވަނީ ގޮތާބޭ ރާޖަޕަކްސާ ހިމާޔަތަށް އެދިވަޑަގެންފައި ނުވާކަމަށާއި، އޭނާއަށް ހިމާޔަތް ނުދޭކަމަށެވެ. އެހެންނަމަވެސް އަމިއްލަ ފަރުދެއްގެ ހައިސިއްޔަތުން އޭނާއަށް ސިންގަޕޫރަށް ވަދެވަޑައިގަތުމުގެ ހުއްދަދީފައި ވާކަމުގައެވެ. ބައެއް ޚަބަރުތައް ބުނާ ގޮތުގައި އޭނާގެ ފަހު މަންޒިލަކަށް ވާނީ މެދުއިރުމަތީގެ ގައުމެކެވެ.
ސްރީލަންކާގެ ގާނޫނު ބުނާގޮތުން ރައީސު އިސްތިއުފާދެއްވުމާއެކު އެމަގާމާ ވަގުތީ ގޮތުން ހަވާލުވެވަޑައިގަންނަވާނީ ބޮޑުވަޒީރެވެ. އަދި ގާނޫނުހަދާ މަޖިލީހުގެ ޖަލްސާއެއް ތިން ދުވަހުގެ ތެރޭގައި ބާއްވައި ރައީސަކު ހޮވުމުގެ މަސައްކަތް ފަށަންވާނެއެވެ. ރައީސުކަމަށް ކުރިމަތިލުމަށް ހުޅުވާލުމަށް ފަހު، ކުރިމަތިލާ ކެންޑިޑޭޓުންގެ ތެރޭން މަޖިލީހުގެ އަޣުލަބިއްޔަތު ހޯއްދަވައި ހޮވިވަޑައިގަންނަވާ ކެންޑިޑޭޓަކު އިސްތިއުފާދެއްވި ރައީސުގެ ދައުރު ނިމެންދެން މަގާމުގައި ހުންނަވާނެއެވެ.
ރައީސު ގޮތާބޭ ރާޖަޕަކްސަ ގައުމުދޫކޮށް ވަޑައިގެންފައިވާއިރު، އޭނާގެ ބޭބޭފުޅު އަދި ކުރިން ބޮޑުވަޒީރުކަމާއި ރައީސުކަން ކުރައްވާފައިވާ މަހިންދަ ރާޖަޕަކްސާއާއި، ކޮއްކޯފުޅު އަދި ކުރީގެ ފިނޭންސް މިނިސްޓަރު ބަސިލް ރާޖަޕަކްސާ ވަނީ އެ ބޭފުޅުން ގައުމު ދޫކޮށް ވަޑައިނުގަންނަވާނެކަމުގެ ޔަގީންކަން ސުޕްރީމް ކޯޓަށް ދެއްވާފައެވެ. އެބޭފުޅުން މި ޔަގީންކަން ދެއްވީ ސްރީލަންކާ އިގްތިސާދީ ގޮތުން އިނދަޖެހުމުގައި ޒިންވާމާންޖެހޭ ފަރާތްތަކާ ދެކޮޅަށް ސުޕްރީމް ކޯޓަށް ހުށަހަޅާފައިވާ މައްސަލައަކާ ގުޅިގެންނެވެ.
