އޭވިއޭޝަން އެކަޑަމީގައި އުދުހުންތައް ފަށައިފިއެވެ.
އައިލެންޑް އޭވިއޭޝަނާއި ގައުމީ ޔުނިވަރސިޓީ ގުޅިގެން ޕައިލަޓުން ތަމްރީނު ކުރުމަށްޓަކައި ހަދާފައިވާ އޭވިއޭޝަން އެކަޑަމީގައި އުދުހުންތައް އިއްޔެ ފަށާފައިވާއިރު، އޭވިއޭޝަން އެކަޑަމީ ހިންގުމުގެ ހުއްދަ، ސިވިލް އޭވިއޭޝަން އޮތޯރިޓީން ދޫކޮށްފައިވަނީ މި ޖުލައި މަހުގެ ތިންވަނަ ދުވަހުއެވެ.
އޭވިއޭޝަން އެކަޑަމީން ބުނެފައިވަނީ އުދުހުމުގެ ގަޑިތައް ފުރިހަމަ ކުރުމަށް ފުރަތަމަ ބުރުގައި ފުރުސަތު ދޭނީ ރިފްރެޝަރ ޕްރޮގްރާމްގެ ފުރަތަމަ ބެޗުގެ 150 ގަޑިއިރުގެ ތިއަރީ ކްލާސްތައް ފުރިހަމަކުރި 35 ދަރިވަރުންނަށް ކަމަށެވެ.
އެހެންވެ އެ ދަރިވަރުންގެ ތެރެއިން ހަ ދަރިވަރަކު އުދުހުމުގެ 10 ގަޑިއިރު ފުރިހަމަކުރުމުގެ މަސައްކަތް އިއްޔެ ފަށާފައިވާ ކަމަށް އެ އެކަޑަމީން ބުނެއެވެ.
އޭވިއޭޝަން އެކަޑަމީން ބުނީ ދެވަނަ ބެޗުގައި 39 ދަރިވަރަކު ރިފްރެޝަރ ޕްރޮގްރާމް މިހާރުފަށާފައިވާ ކަމަށާއި ފުރަތަމަ ބެޗުގެ ދަރިވަރުންގެ އުދުހުންތައް ނިމެމުންދާ ވަރަކުން ދެވަނަ ބެޗުގެ ދަރިވަރުންނަށް އުދުހުމަށް ފުރުސަތު ދެމުންދާނެ ކަމަށެވެ.
މި އަހަރު ނިމުމުގެ ކުރިން ދެ ބެޗުގެ ދަރިވަރުންގެ އުދުހުމުގެ ގަޑިތައް ފުރިހަމަކުރުމަށް ފަހު، އިތުރު ބެޗެއްގެ ކިޔެވުން ވެސް މި އަހަރު ފެށުމަށް އައިލެންޑް އޭވިއޭޝަނުން މަސައްކަތްކުރަމުންދާއިރު، އޭވިއޭޝަން އެކަޑަމީގެ ކިޔެވުން ފަށާފައިވަނީ މިއަހަރުގެ ޖެނުއަރީ މަހުގެ 10 ވަނަ ދުވަހުއެވެ.
މިދިޔަ ޑިސެމްބަރު މަހުގެ 28 ގައި އޭވިއޭޝަން އެކަޑަމީގެ ނަމުގައި އިފްތިތާހުކުރި ފްލައިންގ ސްކޫލް ހިންގުމަށް ހަވާލުކޮށްފައިވަނީ، ފްލައިން ސްކޫލްތައް ހިންގުމުގައި ވިލާތުގައި ފާހަގަ ކޮށްލެވޭ ކުންފުންޏެއް ކަމަށްވާ ޗެކް ރިޕަބްލިކްގެ "ފްލައިން އެކަޑަމީ" އަށެވެ.
ފްލައިންގ ސްކޫލުގެ ދަރިވަރުންގެ ކިޔެވުން އައްޑޫ ގަމުގެ ގައުމީ ޔުނިވަރސިޓީގެ ކެމްޕަހުގައި ކުރިއަށް ގެންދިއުމަށް ވަނީ ހަމަޖައްސާފައެވެ. އަދި ގަން އިންޓަރނޭޝަނަލް އެއަރޕޯޓުގައި ފްލައިންގ ސްކޫލް ހިންގަން ވަނީ ނިންމާފައެވެ.
