ތައިލެންޑުގެ މީހަކު 13275 އަހަރަށް ޖަލަށް ލާން އެ ގައުމުގެ ކޯޓަކުން ހުކުން ކޮށްފިއެވެ.
އުމުރުން 34 އަހަރުވީ ޕުޑިތު ކިއްޓިތުރަޑިލޮކް ގެ މައްޗަށް މި ހުކުން ކުރީ މަކަރާއި ހީލަތުން މީސްމީހުންގެ އަތުން ފައިސާ ހޯދުމުގެ ކުށުގައެވެ. އޭނާ ވަނީ ކުންފުނި ތަކެއް ހަދައިގެން، އެ ކުންފުނިތަކުގެ ވިޔަފާރީގައި ބައިވެރިވާ ބަޔަކަށް ބޮޑު ނަފައެއް ވާނޭ ކަމުގެ ޔަގީންކަން ދީގެން 40000 މީހުން އަތުން 160 މިލިއަން ޑޮލަރު އަތުލާފައެވެ. އޭނާގެ މައްޗަށް މަކަރާއި ހީލަތުން ފައިސާ ހޯދުމުގެ 2653 މައްސަލައެއް ވަނީ ސާބިތުވެފައެވެ. މި މައްސަލަތަކުގައި އޭނާގެ މައްޗަށް ކުރި ހުކުން މިހާރު ވަނީ ދެބައިކުޅަ އެއްބަޔަށް ބަދަލުކޮށް، 6637 އަހަރާއި 6 މަސް ދުވަހަށް ބަދަލު ކޮށްފައެވެ. ހުކުން ކުޑަ ކުރީ މި ހުރިހައި ކުށަކަށް އޭނާ އިއުތިރާފު ވުމުގެ ސަބަބުންނެވެ.
މި ހުކުން ކުރި ކަމުގައި ވިޔަސް އޭނާ ޖަލުގައި އޮންނާނީ 20 އަހަރު ދުވަސް ވާންދެން ކަމުގައި ވަނީ ބެލެވިފައެވެ. އެއީ އޭނާގެ މައްޗަށް ސާބިތުވީ ދެ ބާވަތުގެ މައްސަލައިގައި، ކޮންމެ ބާވަތަކަށް ގިނަވެގެން ދިހަ އަހަރުގެ ޖަލު ހުކުމެއް ކުރެވިދާނޭ ކަމަށް ތައިލެންޑުގެ ގާނޫނުގައި އޮންނާތީއެވެ.
ޕުޑިތު ފައިސާ ހޯދާން ހަދާ ގޮތަކީ ސެމިނާރުތަކަށް މީހުން ގެނެސްގެން ވިޔަފާރީގެ ވާހަކަތައް ދައްކައި، ޝައުގުވެރި ކުރުވައިގެން، ޚަރަދު ކުރާ ފައިސާގެ އެތައް ގުނައެއް ލިބޭނޭ ކަމުގެ ހުތް ލައިގެން ފައިސާ އަތުލުމެވެ. ކުރިން ޚަރަދު ކުރީ މީހުންނަށް ފައިސާ އަނބުރައި ދެނީ، ފަހުން ޚަރަދު ކުރާ މީހުންގެ ފައިސާއިންނެވެ. މި ގޮތަށް ބުރު ޖަހަމުން ގެންދިޔައީއެވެ.
ޕުޑިތު ހައްޔަރުކޮށް ޖަލަށް ލާފައި ވަނީ މި ދިޔަ އޯގަސްޓު މަހުގެ ތެރޭގައެވެ.
ޖަަލު ހުކުމުގެ އިތުރަށް އޭނާ ވަނީ 40 މިލިއަން ޑޮލަރުން ޖުރުމާނާވެސް ކޮށްފައެވެ. އެއީ އޭނާގެ ދެކުންފުނިން ކުރެ ކޮންމެ ކުންފުންޏެއް 20 މިލިއަން ޑޮލަރުގެ މަގުންނެވެ. އަދި ކޯޓަށް ހޯދުނު ނުވަތަ ފާހަގަ ކުރެވުނު 2653 މީހުންނަށް 17 މިލިއަން ޑޮލަރު ދޭންވެސް ވަނީ ހުކުން ކޮށްފައެވެ. އެއީ އަތުލި ފައިސާއާއި، އެ ފައިސާގެ ސޫދުގެ ގޮތުގައި އަހަރަކަށް ދޭން ޖެހޭ 7.5 އިންސައްތަޔާ އެކުގައެވެ.
