މޯލްޑިވްސް ހައްޖު ކޯޕަރޭޝަނުން މީހުން ހައްޖަށް ގެންދާ އަގު 76,960 ރުފިޔާ އަށް ބޮޑުކޮށްފިއެވެ.
އެ ކޯޕަރޭޝަނުން ބުނީ މިއަހަރު އާންމުކޮށް ހުޅުވާލައިގެން ދޫކުރަން ނިންމި 100 ކޯޓާގައި ހައްޖަށް ދެވޭނީ 76،960 ރުފިޔާއަށް ކަމަށެވެ.
މިއަހަރު ހައްޖަށް ގެންދިއުމަށް ރާއްޖެއަށް ލިބުނު ކޯޓާގެ ތެރެއިން 100 ކޯޓާ ވަނީ އާއްމުންނަށް ހުޅުވާލާފައެވެ. އަދި އެ ކޯޕަރޭޝަންގެ ލިސްޓުގައި ރަޖިސްޓްރީ ވެގެން ދުރާލާ ހައްޖަށް ދިއުމަށް ތައްޔާރުވެގެން ތިބޭ މީހުންނަށް ސަރުކާރާއި އެ ކޯޕަރޭޝަން ގުޅިގެން ލުއި ފަސޭހަ އަގެއް ކަނޑައަޅާފައިވާނެކަމަށް ހައްޖު ކޯޕަރޭޝަނުން ބުނެއެވެ.
މީގެ އިތުރުން އެއްވެސް ތަނެއްގައި ރަޖިސްޓްރީ ނުވެ ވަގުތުން ހައްޖަށް ދިއުމަށް ބޭނުންވެފައި ތިބި މީހުންނަށާއި އަހަރުތަކެއް ވަންދެން ފައިސާދައްކައިގެން ތިބި މީހުންގެ މެދުގައި އަގުގެ ތަފާތުތަކެއް ހުންނަން ޖެހޭކަމަށް ސަރުކާރަށާއި އެ ކޯޕަރޭޝަނަށް ވެސް ފެނިފައިވާކަމަށް ވެސް އެ ކޯޕަރޭޝަނުން ބުނެއެވެ.
އެހެންކަމުން މި އަހަރު ހައްޖުގެ އަޅުކަމަށް ދިއުމަށް ހައްޖު ކޯޕަރޭޝަންގެ، ކިއުގައި ޖެހިފައިވާ މީހުންނަށް އެހެން އަހަރުތަކެކޭ އެއްގޮތަށް 69،965 ރުފިޔާއަށް ހައްޖަށް ދޭވޭނެކަމަށް އެ ކޯޕަރޭޝަނުން ވަނީ ބުނެފައެވެ.
