ފަހުގެ ތާރީޚުގައި އެންމެ ދިގު މުއްދަތަށް ޖަލު ޙުކުމް އިއްވާފައިވާ ކުރީގެ ނައިބު ރައީސް އަޙްމަދު އަދީބު ބޭސްފަރުވާއަށް ރާއްޖެއިން ބޭރަށް ގެންދިޔުމަށްޓަކައި ކޯޓު އަމުރަކަށް އެދި އަދީބުގެ ފަރާތުން ވެއްދި މައްސަލައިގައި ދައުލަތުން ޖަވާބުދާރީ ވުމަށް ސިވިލް ކޯޓުން ފުރުޞަތު ދީފިއެވެ.
އަދީބުގެ ބޭސްފަރުވާއަށް ރާއްޖެއިން ބޭރަށް ސަރުކާރުން ފޮނުވަން ދެކޮޅު ހަދަމުން އަންނާތީ އަދީބުގެ ވަކީލުންގެ ޓީމުން ކޯޓު އަމުރަކާއެކު އަދީބު ބޭސްފަރުވާއަށް ފުރޭނެ ގޮތް ވޭތޯ ވެއްދި މި މައްސަލައިގައި ޝަރީއަތް ދެން ފަށާނީ ދައުލަތަށް ދިން ފުރުޞަތުގައި ދެފަރާތުން އެއްބަސްވުމަކަށް ނައިސްފިނަމައެވެ.
ދޫނިދޫ ޖަލުގައި މިވަގުތު ހުންނެވި އަދީބު ބޭސްފަރުވާއަށް ރާއްޖެއިން ބޭރަށް ފޮނުވުމަށް ތަކުރާރުކޮށް އާއިލާ އާއި ވަކީލުންގެ ފަރާތުން ދަނީ އެދެމުންނެވެ. ނަމަވެސް ދޫނިދޫގައި ހުންނެވި އަދީބުގެ މައްސަލައިގައި ކަރެކްޝަނުން ބުނެފައި ވަނީ މިވަގުތު އަދީބު ހުންނެވީ އެފަރާތުގެ ބެލުމުގެ ދަށުގައި ނޫން ކަމަށެވެ. ކުރިން މާފުށީ ޖަލުގައި ބެހެއްޓުމަށް ފަހު ދޫނިދޫއަށް އަދީބު ބަދަލު ކުރައްވާފައި ވަނީ ސަލާމަތީ ސަބަބުތަކަށް ޓަކައި ކަމަށް ސަރުކާރުން ވަނީ ބުނެފައެވެ.
އަދީބުގެ ސިއްޙީ ޙާލުކޮޅު ސީރިއަސް ކަމަށް އާއިލާއިން ދަނީ ބުނަމުންނެވެ. ސަރުކާރުންވެސް ދޭތެރެދޭތެރެއިން އަދީބު މާލެ ގެނެސް ޑޮކްޓަރަށް ދައްކަމުން ދެއެވެ. އާއިލާއިން ބުނެފައި ވަނީ ރާއްޖެއިން ހެދި ޓެސްޓް ތަކުން ޔަގީންވާ ގޮތުގައި ލޮލުގެ ނުރައްކާތެރި ބައްޔެއް ކަމަށްވާ ގްލޮކޮމާ އަދީބަށް ވަނީ ޖެހިފައެވެ.
ރިޔާސީ ލޯންޗުގައި އެއްޗެއް ގޮއްވާލައި ރައީސުލްޖުމްހޫރިއްޔާ އަބްދުﷲ ޔާމީން އަވަހާރަ ކޮށްލަން އުޅުނުކަމުގެ ތުހުމަތުގައި އެންމެ ފުރަތަމަ ހައްޔަރު ކުރެވުނު އޭރުގެ ނައިބު ރައީސް އަދީބުގެ މައްޗަށް މިވަގުތު 33 އަހަރުގެ ޖަލު ޙުކުމެއް އެބައޮތެވެ. ސަރުކާރުން ބުނަމުން ދަނީ ބޭސްފަރުވާއަށް އަދީބު ރާއްޖެއިން ބޭރަށް ފޮނުވައިފިނަމަ އަދީބު ފިއްލެވުމުގެ ފުރުޞަތު ބޮޑު ކަމަށެވެ.
