ސްރީލަންކާގެ ސަރަޙައްދަށް ދާދިފަހުން އައި ބާރުގަދަ ތޫފާނުގައި ބެހިގެން ގޮސް، ރާއްޖޭގެ ސަރަހައްދުން ފެނުނު ސްރީލަންކާގެ މަސްބޯޓު ހއ. އުލިގަމު ބަނދަރަށް ވައްދައިފިއެވެ.
ލަންކާ އާއި އިންޑިޔާގެ މަސްބޯޓު ތަކެއް ތޫފާނުގައި ގެއްލުމާއި ގުޅިގެން ރާއްޖޭގެ ކޯސްޓްގާޑުންވެސް އެ ބޯޓުތައް ހޯދުމުގެ މަސައްކަތް ކުރަމުން ދަނިކޮށް ލަންކާގެ މި ބޯޓު ފެނުނީ އުލިގަމާ ދިމާ ބޭރުންނެވެ. އެމްއެންޑީއެފް ކޯސްޓްގާޑުން ބުނި ގޮތުގައި ބޯޓު ފެނުނުއިރު 7 މީހުން ބޯޓުގައި ތިއްބެވެ. ނަމަވެސް ބޯޓުގެ އިންޖީނު ހަލާކު ވެފައި ވާތީ ކޯސްޓްގާޑުގެ ކަފު ޖަހައިގެން ބޯޓު އުލިގަމު ބަންދަރަށް ވެއްދީއެވެ.
ބޯޓު ހާލުގައި ޖެހިފައި ވަނީ އިންޖީނު ހުއްޓިގެންނެވެ. ބޯޓުގައި ތިބި ހުރިހާ މަސްވެރިންގެ ޙާލު ރަނގަޅު ނަމަވެސް ފެނުނުއިރު އެމީހުން ތިބީ ބޯފެނަށް ޖެހިފައެވެ. އެހެންވެ ކޯސްޓްގާޑުން ވަނީ އެމީހުންނަށް އެހީތެރިކަން ފޯރުކޮށްދީފައެވެ. ކޯސްޓްގާޑުން ބުނީ ބޯޓު އަނބުރައި ލަންކާއަށް ފޮނުވާލުމުގެ މަސައްކަތް މިހާރު ކުރަމުން އަންނަ ކަމަށެވެ.
ލަންކާ ސަރަހައްދަށް އައި ބާރުގަދަ ތޫފާނުގައި ލަންކާ އާއި އިންޑިޔާގެ ގިނަ އަދަދެއްގެ މަސްވެރިން ވަނީ ގެއްލިފައެވެ. އިންޑިޔާ އާއި ލަންކާ އަދި ދިވެހި ކަނޑުގެ ސިފައިން ގުޅިގެން މިހާތަނަށް މަސްވެރިން ހޯދުމަށް ކުރި މަސައްކަތުން ގިނަ އަދަދެއްގެ މަސްވެރިން ސަލާމަތް ކުރެވިފައި ވީނަމަވެސް އަދިވެސް ބަޔެއް މީހުން ފެނިފައިވެއެވެ.
