"ދަންގަލް" ގެ ތަރި އުމުރުން 17 އަހަރުގެ ޒާއިރާ ވަސީމަށް މަތިންދާ ބޯޓެއްގައި ގޯނާ ކުރި މީހަކު ހައްޔަރު ކޮށްފިއެވެ.
ހޮނިހިރު ދުވަހު އޭނާ ދަތުރު ކުރި މަތިންދާ ބޯޓުގައި އިން މެދު އުމުރުގެ ފިރިހެނަކު އޭނާއަށް ގޯނާ ކުރިކަމަށް ޒާއިރާ ބުނެފިއެވެ. ޒާއިރާ އާ ހަވާލާ ދީ މީޑިއާގައި ރިޕޯޓުކޮށްފައިވާ ގޮތުގައި ޒާއިރާއަށް ހޭލެވުނީ ފަހަތު ސީޓުގައި އިން މީހަކު އޭނާގެ ކަރުގައި ފައިތިލަ ކާއްތަން ފެށުމުންނެވެ. އަދި އޭނާ އޮތީ ޒާއިރާ ގެ ސީޓުގެ އަތް ގަނޑު މަތީގައި ފައި ބާއްވައިގެން ކަމަށް ވެސް ޒާއިރާ ބުނެފައިވެއެވެ.
ދަތުރަށް ފަހު އޭނާ އަމިއްލައަށް ނަގާފައިވާ ވީޑިއޯއެއް ޒާއިރާ ވަނީ އިންސްޓެގްރާމް ގައި ހިއްސާކޮށްފައެވެ. އެ ވީޑިއޯގައި އަންހެނުންނަށް ކަމޭހިތާ ގޮތަކީ މިއިތޯ އޭނާ ސުވާލުކޮށްފައިވެއެވެ. އަދި އަހަރުމެން އަމިއްލައަށް އަމިއްލަ ނަފްސަށް އެހީނުވާނަމަ އެހެން މީހަކު އެހީ ނުވާނެ ކަމަށްވެސް ބުނެފައިވެއެވެ. އޭނާއަށް ވަރަށް ބޮޑަށް އަސަރު ކޮށްފައިވާ ކަން މި ވީޑިއޯއިން އެނގެއެވެ.
މި މައްސަލައިގައި އާދީއްތަ ދުވަހުގެރޭ މުންބާއީ ފުލުހުން ވަނީ 39 އަހަރުގެ ފިރިހެނަކު ހައްޔަރުކޮށްފައެވެ. ޒާއިރާ އަށް ގޯނާ ކުރިކަމުގެ ތުހުމަތުގައި އޭނާ ހައްޔަރު ކުރުމުގެ ކުރީން ފުލުހުން ވަނީ އާދީއްތަ ދުވަހު މެންދުރު ފުލުހުންގެ ބެލުމުގެ ދަށަށް އެމީހާ ގެނެސް ސުވާލުކޮށްފައެވެ.
ޖައްމޫ އާއި ކަޝްމީރުގެ ޗީފް މިނިސްޓަރާއި، ސިވިލް އޭވިއޭޝަން މިނިސްޓްރީ އާއި އަންހެނުންގެ ހައްގު ތަކަށް މަސައްކަތް ކުރާ ޖަމިއްޔާތަކާއި ފިލްމް އިންޑަސްޓްރީ އިން ވަނީ މި ހާދިސާ އާ މެދު ކަންބޮޑުވުން ފާޅުކޮށްފައެވެ. އަދި އެއަރލައިނުން ވަނީ ޒާއިރާ ގެ ކިބައިން މާފަށް އެދިފައެވެ.
ޒާއިރާ އަށް ވަނީ މިދިޔަ ނޮވެންބަރު މަހު "ނެޝެނަލް ޗައިލްޑް އެވޯޑް ފޮރ އެކްސެޕްޝަނަލް އެޗީވްމަންޓް 2017" ލިބިފައެވެ.
