ސްރީލަންކާގެ ކޮލޮމްބޯ ގައި ގެއްލުނު ދިވެހި ފިރިހެން މީހާގެ ޚަބަރެއް އަދިވެސް ނުވާކަމަށް ރާއްޖޭގެ ފޮރިން މިނިސްޓްރީން ވިދާޅުވެއްޖެއެވެ.
އާފަތިސް ނޫހަށް މަޢުލޫމާތު ދެއްވަމުން ކޮމިއުނިކޭޝަން ޑިރެކްޓަރ މިއުވާން މުހައްމަދު ވިދާޅުވީ އެމީހާއާއިބެހޭ އިތުރުއެއްވެސް ޚަބަރެއް ސްރީލަންކާ ފުލުހުންގެ ފަރާތުން މިހައިތަނަށް އަންގާފައިނުވާ ކަމަށެވެ.
ލަންކާގައި ހުންނަ ރާއްޖޭގެ އެމްބަސީން ހާމަކޮށްފައިވާ ގޮތުގައި ޢުމުރުން 62 އަހަރުގެ އިބްރާހިމް ޢަލީ އެންމެ ފަހުން ދިޔައީ މިއަހަރުގެ ފިޠުރު އީދު ދުވަހު ހެނދުނު ދެހިވަލަ މިސްކިތް ކައިރިއަށެވެ. އަދި އެއަށް ފަހު އޭނާގެ އެއްވެސް ޚަބަރެއް ޢާއިލާއަށް ލިބިފައި ނުވާ ކަމަށް ބުނެފައިވެއެވެ.
އެ އެމްބަސީން ކޮށްފައިވާ ޕޯސްޓުގައި އޭނާގެ އެއްވެސް މައުލޫމާތެއް ލިބިއްޖެ ނަމަ 2382 499 (77) 94+ އަށް ގުޅުމަށް ނުވަތަ އެމްބަސީގެ ނަމްބަރު 6666 881 076 އަށް ގުޅުމަށް ވެސް ވަނީ އެދިފައެވެ. އަދި އެމީހާއަކީ ކިޑްނީ ބައްޔަށް ބޭސް ކުރަމުން އަންނަ މީހެއް ކަމަށް ވެސް ބުނެފައިވެއެވެ.
މިކަމާއިގުޅިގެން ރާއްޖޭގެ ފޮރިން މިނިސްޓްރީން ކުރިން ވިދާޅުވެފައިވަނީ ލަންކާގެ ކޮލޮމްބޯގައި ހުންނާ ދިވެހިރާއްޖޭގެ ހައިކޮމިޝަނުން ދަނީ އިބްރާހިމް ޢަލީގެ ޢާއިލާއަށް އެއްބާރުލުން ދީ އޭނާ ހޯދުމުގައި އެހީތެރިވެ މަސައްކަތް ކުރަމުން ކަމަށެވެ.
