ތައުލީމީ ދާއިރާގެ މުވައްޒަފުންގެ މުސާރައާއެކު، ލެކްޗަރާއިންގެ މުސާރަ ބޮޑު ނުވާތީ އެކަމުގެ ޝަކުވާ އަންނަނިކޮށް ފިނޭންސް މިނިސްޓަރ އިބްރާހިމް މިވަނީ އުފާވެރި ޚަބަރެއް ދެއްވާފައެވެ.
އެގޮތުން މިނިސްޓަރ ވިދާޅުވީ ލެކްޗަރާއިންގެ މުސާރަ ވެސް ބޮޑުވާނެ ކަމަށާއި އެކަމުގެ އޮނިގަނޑު އެކުލަވާލަމުން އަންނަކަމަށެވެ.
އެގޮތުން އެމްއެންޔޫ އާއި އައިއެމްޔޫ އެކު މަޝްވަރާކޮށް، އެ ދެ ފަރާތުގެ ކޮމެންޓްސް ހޯދާފައިވާ ކަމަށް ވެސް މިނިސްޓަރ ވިދާޅުވިއެވެ.
ތައުލީމީ ދާއިރާގައި މަސައްކަތް ކުރާ ހުރިހާ މުވައްޒަފުންގެ މުސާރަ ބޮޑުކޮށްފައިވާކަން، ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް އިއުލާނު ކުރެއްވީ މިމަހުގެ އެއްވަނަ ދުވަހުއެވެ.
އެކި ރޭންކުތަކަށް ޓީޗަރުން ބަހާލައިގެން ޓީޗަރުންގެ މުސާރައަށް މި ބަދަލުގެނެސްފައިވާއިރު، މީގެ ތެރޭގައި ރޭންކު އެކެއްގެ ޓީޗަރުންގެ މުސާރައަށް 22 އިންސައްތައިގެ ބަދަލެއް ވަނީ އައިސްފައެވެ. އަދި ރޭންކު ދޭއްގެ މުވައްޒަފުންނަށް 50 އިންސައްތައިގެ ބަދަލެއް އަންނައިރު، ރޭންކު ތިނެއްގެ މުވައްޒަފުންނަށް 38 އިންސައްތައިގެ ބަދަލެއް އަންނާނެއެވެ.
ރައީސް ސާލިޙުގެ ވަޢުދުފުޅާއެކު ތަޢުލީމީ ދާއިރާގެ މުވައްޒަފުންނަށް މި ގެންނެވި ބަދަލާއެކު ޕްރިންސިޕަލުންގެ މުސާރަ އުޅެނީ 30000 ރުފިޔާއިން މަތީގައެވެ. ޓީޗަރުންގެ މުސާރަ ވަނީ 20000 އަށް ބޮޑުކޮށްފައެވެ.
