ވިޔަފާރީގެ މައުރަޒެއްގެ ތެރެއިން ދިވެހި ވިޔަފާރިވެރިޔާ ޝަފީގުއާ ދިމާވީ އިންޑިޔާގެ ބޮމްބޭގެ ވިޔަފާރި ކުންފުންޏެއްގެ ބަޔެކެވެ. އެމީހުން މަރުރަޒުގެ ތެރެއިން ދިމާވެ ދެބައިމީހުންގެ ވިޔަފާރީގެ ކުޑަ ތައާރަފެއް ދިނެވެ. ދެބައި މީހުންނަކީވެސް އިމާރާތް ކުރުމުގެ ދާއިރާގައި ހަރަކާތްތެރިވާ ދެކުންފުންޏެވެ. މި ވާހަކަ ފެށެނީ މިހިސާބުންނެވެ.
މައުރަޒުން ނުކުމެ ޝަފީގުވެސް އާދައިގެ މަތިން އޮފީހަށް ދިޔައެވެ. އަދި މައުރަޒުން ދިމާވި ބޮމްބޭގެ ވިޔަފާރި ކުންފުނީގެ މީހުން ދީފައި އޮތް އީމެއިލް އެޑްރެހަކަށް މެއިލެއް ފޮނުވާލިއެވެ. އެކުންފުންޏާ ގުޅުން ބަދަހި ކޮށްލުމުގެ މަގްސޮދުގައެވެ. މިގޮތަށް މަހެއްހާ ދުވަހު ދެފަރާތުން ދެކެވުނު ވާހަކަތަކުން ދެކުންފުނީގެ މެދުގައި ކޮންމެވެސް ކަހަލަ ރަނގަޅު ވިޔަފާރީގެ އެއްބަސްވުމެއް ގާއިމް ކުރެވޭ ވަރަށް ރައްޓެހިކަން ތިލަ ވެގެން ހިނގައްޖެއެވެ. ބޮމްބޭއިން ޝަފީގުއާ ވާހަކަ ދައްކަމުން އަންނަ ކުންފުންޏަކީ ވަރަށް ވަރުގަދައަށް އިމާރާތް ކުރުމުގެ މަސައްކަތް ކުރާ ކުންފުންޏެއްކަން އެމީހުން ދައްކާ ވާހަކައިން އެނގިއްޖެއެވެ.
އެންމެ ފަހުން ދޮޅު މަހެއްހާ ދުވަހަށް ފަހު ދެފަރާތުގެ މެދުގައި ދެކެވުނު ވިޔަފާރީގެ ވާހަކަ ތަކަށް ފަހު ރަނގަޅު ވިޔަފާރީގެ ޑީލެއް ނިންމޭ ހިސާބަށް ދެކުންފުނީގެ ވިސްނުން ދިޔުމާއެކު ބޮމްބޭގެ ކުންފުނިން ޝަފީގު ބޮމްބޭއަށް އައުމަށް ދައުވަތު ދިނެވެ. ދެކުންފުނީގެ މެދުގައި ގާއިމް ކުރެވެން އުޅޭ ވިޔަފާރީގެ އެއްބަސްވުންތައް ރަސްމީކޮށް ނިންމައި، ދެބައިމީހުން އެއްބަސްވުން ތަކުގައި ސޮއި ކުރުމާ ހަމައަށް ވާހަކަތައް ކާމިޔާބު ވެއްޖެއެވެ.
ޝަފީގުގެ ކުންފުންޏަކީ ރާއްޖޭގައި މާފުޅާ ދާއިރާއެއްގައި އިމާރާތް ކުރުމުގެ މަސައްކަތް ކުރާ ކުންފުންޏެއް ނޫނެވެ. އޭނާގެ ކުންފުންޏަކީ ރާއްޖޭގެ ނިސްބަތުންއާދައިގެ ކުންފުންޏެކެވެ. އެހެންވެ ބޮމްބޭގެ ކުންފުންޏާއެކު ދެވެން މިއުޅޭ އެއްބަސްވުމާއެކު ޝަފީގުގެ ކުންފުނި އިތުރަށް ވަރުގަދަ ކޮށްލެވޭނެ ކަމުގެ އުންމީދު ދެކެވުނު ވާހަކައިން ޔަގީނާ ގާތަށް ދިޔުމުން ޝަފީގުވެސް ނިންމީ ބޮމްބޭގެ ކުންފުނީގެ ދައުވަތަށް އެމީހުން ކައިރިއަށް ދާށެވެ. އެހެންވެ އެމީހުންނަށް ޝަފީގުވެސް އޯކޭ ދިނެވެ. ޝަފީގާއި ޝަފީގާއެކު ބޮމްބޭއަށްދާ މީހެއްގެ ދެކޮޅު ޓިކެޓާއި ބޮމްބޭގެ އެންމެ ފެންވަރު ރަނގަޅު ހޮޓަލެއްގައި ހުރުމާއި އެނޫން ހުރިހާ އިންތިޒާމެއްވެސް ހަމަޖައްސައިދިނީ ބޮމްބޭގެ ކުންފުނިންނެވެ. ޝަފީގު އަތުން ދަތުރަށޭ ކިޔާފައި ލޯލާރިއެއްވެސް ހޭދަކުރާކަށް ނުޖެހެއެވެ. ޝަފީގު ބޮމްބޭއަށް ދިޔައީ އޮފީހުގައި އޭނާގެ މުއައްޒަފެއްގެ ގޮތުގައި އުޅެމުން އައި އިންޑިޔާ މީހެއް ގޮވައިގެންނެވެ. އިންޑިޔާ މީހަކު ދަތުރުގައި ގެންދިޔަ ބޭނުމަކީ ޝަފީގު މީގެކުރިން ބޮމްބޭއަށް ގޮސްފައި ނެތުމާއެކު އަމިއްލަ ބަޔެއް ކުދިކުދި ދަތުރުތަކުގައި އިންޑިޔާ މީހާގެ ފަރާތުން ލިބޭނެ ފަސޭހައަށް ވިސްނާފައެވެ. އެނޫން އެހެން ބޭނުމެއް އޭނާ ގެންދިޔުމުގައި ނެތެވެ.
ޝަފީގާއި އޭނާގެ މުއައްޒަފު މަތިންދާ ބޯޓުން ފައިބައިގެން ގޮސް ބޮމްބޭ އެއާޕޯޓުގެ އިމިގްރޭޝަން ކައުންޓަރާ ހަމައަށް ދެވުމާއެކު އެއްކަލަ ކުންފުނީގެ ބަޔަކު އެމީހުންނާ ބައްދަލު ކޮށްފިއެވެ. އެހިސާބުން ޝަފީގަށް ލިބުނީ ސިހުމެކެވެ.
"އަހަރެމެން އިމިގްރޭޝަން ކައުންޓަރާ ހަމައަށް ދިޔައިރު އެމީހުންގެ ބަޔަކު އަހަރެމެންނާ ހަމައަށް އެހީވާން އަތުވެއްޖެ، އަހަރެން ކޮސްވި އެހިސާބަށް އެމީހުން އެތެރެވެފަ ތިބީމަ، އެކަމަކު އޭރު ހިތަށް އެރީ ވަރަށް ވަރުގަދަ ކުންފުންޏަކަށޭ އެވާނީ، އެހެންވީމަތާއޭ އިމިގްރޭޝަން ކައުންޓަރާ ހަމައަށް އެމީހުންގެ ބަޔަކު އައިސް އެތިބީ އަހަރެމެންނާ ހަވާލުވާން" ޝަފީގު ކިޔައިދިނެވެ.
އެހިސާބުން އެކަންތައް އެ ނިމުނީއެވެ. ޝަފީގުވެސް އެކަން ފަހުން މާބޮޑު ކަމަކަށް ނުހަދައެވެ. އެއާޕޯޓު ތެރެއިން ހުރިހާ ކަމެއް އެބަޔަކު ނިކަން ލުއިފަސޭހަ ގޮތަކަށް ކޮށްދީ ނިންމާލައި ޝަގީގުމެން ގޮވައިގެން ހޮޓަލަށް ނައްޓާލައިފިއެވެ. އެމީހުން ތިބުމަށް ހަމަޖައްސާފައި ވަނީ ބޮމްބޭގެ އެންމެ ފެންވަރު ރަނގަޅު އެއްހޮޓަލުގައެވެ. ދިގު ދަތުރަކަށް ފަހު އެ ދުވަސް ދެން ދުއްވާލީ ހޮޓަލުގައި އަރާމު ކޮށްލާށެވެ. ދެ ކުންފުނީގެ ވިޔަފާރީގެ ވާހަކަތައް އޮތީ ޖެހިގެން އަންނަ ދުވަހުއެވެ. އެހެންވީމާ ބޮމްބޭ ކުންފުނީގެ އެންމެ އިސްވެރިންނާ ޖެހިގެން އަންނަ ދުވަހު ބައްދަލު ކުރުމަށް އޮތް ގަޑި ބުނެފައި ކުންފުނިން ފޮނުވި މީހާ ނައްޓާލައިފިއެވެ. ގަޑިއަށް ބަލައި އަންނާނެ ކަމަށާއި ގަޑިއަށް ތައްޔާރުވެގެން ތިރިއަށް ފައިބައި ތިބުމަށް ހަނދާން ކޮށްދެމުންނެވެ.
ޖެހިގެން އައި ދުވަހު ވިޔަފާރީގެ ވާހަކަތަކަށް އެ ކުންފުނީގެ ވެރިންނާ ބައްދަލު ކުރަންދާން ނައްޓާލަން އޮތް ގަޑިއަށް ޝަފީގުމެން ތިރިއަށް ފައިބައިފިއެވެ. އެމީހުން ބަލައި ހޮޓަލަށް އައި މީހާއާއެކު ދިޔުމަށް ނައްޓާލިއެވެ. އޭނާއާއެކު ހިނގާފައި ދިޔައީ އެއްމަގު ހުރަސްކޮށް ޖެހިގެން އޮންނަ މަގަށެވެ. އެއީ ހޮޓާ ނުފެންނަ ހިސާބެވެ. ދިޔައިރު އެތަނުގައި ދެކާރެއްގައި ބަޔަކު ތިއްބެވެ. ކާރުގައި ތިބީ ބޮމްބޭ ކުންފުނީގެ ވެރިންނެވެ. އެހެންވެ ވެރިންނާއެކު އެމީހުންގެ ހޮޓަލަށް ދިޔައެވެ. ޝަފީގަށް ފުރަތަމަ ފަހަރުވެސް ފާހަގަ ކުރެވުނީ އެމީހުންގެ ދަތުރު ކުރުމާއި ކަންކަން އާންމު އެހެން މީހުންނާ ވަރަށް ބޮޑަށް ތަފާތު ކަމެވެ. ނަމަވެސް އެއީ މާބޮޑު ކަމެއް ކަމަށް އޭނާ ހީނުކުރެއެވެ. އޭނާ ހީކުރީ އެއީ މާވަރުގަދަ ވިޔަފާރި ކުންފުންޏެއްވީމާ އޮންނަ އުސޫލު ތަކެއް ކަމަށެވެ. އެމީހުންނާއެކު ހަތަރު ފަސް ބައްދަލުވުން ކުރިޔަށް ދިޔައިރު ކޮންމެ ފަހަރަކުވެސް ހޮޓަލަށް އެމީހުން ބަލައި އަންނަނީ އެންމެ މީހެކެވެ. އެއީ އެ ކުންފުނީގެ ސްޓާފެކެވެ. އޭނާއާއެކު ހިނގާފައި ކޮންމެ ފަހަރަކުވެސް ދާންޖެހެނީ އެއްމަގު ހުރަސްކޮށް ހޮޓާ ނުފެންނަ ހިސާބުގައި އޮންނަ އެހެން މަގަކަށެވެ. އެމަގަށް ދާއިރު ކުންފުނީގެ ވެރިން ވަރުގަދަ ކާރުތަކެއްގައި ތިބެއެވެ. އެއިން މީހަކު ކާރަކުން ފައިބަނީކީވެސް ނޫނެވެ. ދެވެންވާ ހިސާބަށް ދެވުމުން ނޫނީ މަގެއްގެ މަތީގައި ފައިވެސް ޖައްސާލާ ބަޔެއްނޫނެވެ.
އެމީހުންގެ ކަންތައްތައް ހުންނަ ގޮތުން ޝަފީގަށް ކޮންމެވެސް ވަރަކަށް ބިރު ހީވަން ފެށިއެވެ. ނަމަވެސް މާބޮޑު ކަމަކަށް ނުހަދައިވޭތޯ އޭނާ ބެލިއެވެ. އޭނާއަށް އެމީހުންގެ ފަރާތުން ކަންތައްތަކެއް ޝައްކު ވީނަމަވެސް އޭނާއާއެކު ދިޔަ އިންޑިޔާ މީހާއާ އެއިން އެއްވެސް ކަމެއް ޙިއްސާ ނުކުރެއެވެ. އިންޑިޔާ މީހާވެސް އޭނާއަކާ އެކަހަލަ ވާހަކައެއް ނުދައްކައެވެ. ނަމަވެސް ބޮމްބޭ ކުންފުނީގެ ވެރިންނަކީ އެހާ އާދައިގެ ބަޔެއް ނޫންކަން ޝަފީގަށް ދިޔައީ ޔަގީން ވަމުންނެވެ.
ހަތަރު ފަސް ބައްދަލުވުމަށް ފަހު އެއްދުވަހަކު އޮތް ބައްދަލުވުމެއްގެ ވާހަކައެވެ. ދެ ކުންފުނީގެ ވެރިން ދައްކަމުން ދިޔަ ވާހަކަ ތަކުގައި ޝަފީގުގެ ޚިޔާލު ކޮންމެވެސް ވަރަކަށް ތަފާތު ވެއްޖެއެވެ. އެމީހުން ދެއްކި ހުރިހާ ވާހަކައަކަށް އެއްބަސްވެވޭ ގޮތެއް މިފަހަރު ނުވިއެވެ. ވިޔަފާރީގެ އެއްބަސްވުންތައް ނިމުމަކާ ހަމައަށް ގޮސްފައި އޮއްވައި އެދުވަހު ކުއްލިއަކަށް ޝަފީގުގެ ޚިޔާލު އެމީހުންނާ ތަފާތުވެ ކޮންމެވެސް ވަރެއްގެ ދެބަސްވުމެއްވެސް ހިނގަން އުޅޭ ކަހަލަ ނިޝާންތަކެއް ދެބައިމީހުންގެ ވާހަކައިން ދޭހަވަމުން ދާންފެށުމާއެކު މަޝްވަރާގެ މޭޒު ކައިރިން ޝަފީގު އެއްލި ކަޅިއަކުން ފެނުނު މަންޒަރުން ބިރުން ގޮސް "މޭގަނޑު އަނގަޔަށް ނައީ ކިރިޔާ" އެވެ.
"އަހަރެމެންނާ އެމީހުންނާ ޚިޔާލު ތަފާތުވެ ދެބަސްވާން ފެށިތަނާ ކަހަލަ ގޮތަކަށް އަހަރެން ކުއްލިއަކަށް އެއްލި ކަޅިއަކުން ފެނުނީ އެމީހުންގެ ވެރިޔަކު ގެންގުޅުނު ކަޅުކުލައިގެ ކުޑަކުޑަ ފޮއްޓަކުން ފިސްތޯލައެއް ނަގައި ކޯޓު ފަޓުލޫނު ދަށަށް ޖަހާލި މަންޒަރު، އަހަރެންނަށް އެތަން ފެނުނީ އަހަރެމެން ތިބި މޭޒުގެ ބިއްލޫރި ގަނޑުން، އެވަގުތު އަހަރެން ވަރަށް ބިރު ގަތް، އެހެންވެ ވާހަކަތައް މަޑުމަޑުން ފިނިކޮށްލީ" ޝަފީގު ބުންޏެވެ.
ނަސީބު ރަނގަޅު ކަމުން ޝަފީގަށް ފެނުނު މަންޒަރާއެކު ވާހަކަ ފިނިކޮށް ލެވުމުން އެދުވަހު ސަލާމަތުން އެތަނުން ނުކުމެވިއްޖެއެވެ. ނަމަވެސް ޝަފީގަށް އެތަނުން ފެނުނު އެއްވެސް މަންޒަރެއް އޭނާއާއެކު އެތަނުގައި އިން އިންޑިޔާ މުއައްޒަފު ކައިރީ ނުބުނެއެވެ. ބައްދަލުވުމުގައި ބައިވެރި ވަނީ އެދެމީހުންނާއި ބޮމްބޭ ކުންފުނީގެ ވެރިންނެވެ. އެކަމަކު ކޮންމެ ބައްދަލުވުމެއްގައިވެސް އަނގައިން ބަހެއްވެސް ނުބުނެ އިންނަ "ދޮން މީހަކު" އެތަނުގައި އިނދެއެވެ. އެއީ ކާކުކަމެއް އެމީހުންވެސް ތައާރަފް ކޮށްނުދެއެވެ. ހުރިހާ ބައްދަލުވުމެއްގައިވެސް "ދޮން މީހާ" އިންނަނީ ދައްކާ ވާހަކަ އަޑު އަހާށެވެ. ހަމަހިލާ އޭނާ ބަހެއް ނުބުނެއެވެ.
އެދުވަހު ބައްދަލުވުމުން ޝަފީގު ނުކުމެ ހޮޓަލާ ހަމައަށް ދިޔައިރުވެސް އޭނާ ކަންބޮޑުވެފައިވާކަން ދައްކާކަށް ބޭނުމެއްނުވިއެވެ. އޭނާއަށް އެމީހުންނާމެދު ނުބައި ޝައްކެއް ވެއްޖެކަން އެމީހުންނަށް އެނގިއްޖިއްޔާ ދެންވެދާނެ ގޮތަކަށް ވިސްނާފައި ޝަފީގު ވީހާވެސް ހަމަޖެހޭ ގޮތް ދައްކަމުން ދިޔައެވެ. ނަމަވެސް އެމީހުންގެ ކަންތައް ހުންނަ ގޮތުންނާއި ފިސްތޯލައެއް ނަގައި ކޯޓު ފަޓްލޫނު ދަށަށް ކޮއްޕާލި މަންޒަރުގެ އިތުރުން އެމީހުން އެހެރަ ގެންގުޅޭ މޯބައިލް ފޯނު ސިމްތައް ގިނަކަމުންވެސް އެއީ ސަހަލު ބަޔެއް ނޫންކަން މިހާރު އެނގިއްޖެއެވެ. އެއްފަހަރު ގުޅާ ސިމު ނަންބަރަކުން ދެވަނަ ފަހަރަކު ގުޅަނީކީ ނޫންވިއްޔާއެވެ. ހޮޓަލާ ހަމައަށް ދެވެންދެން އެކަހަލަ ވިސްނުން ގަނޑެއްގައެވެ. ހޮޓަލާ ހަމައަށް ދެވުމާއެކު ބޮމްބޭ ކުންފުނީގެ ފަރާތުން އެމީހުންނާއެކު އައި މީހާވެސް އެނބުރި ހިނގައްޖެއެވެ.
ކޮޓަރިއަށް ދާން ލިފްޓާ ދިމާއަށް ހިނގައިގަތްތަނާ ހޮޓަލުގެ ރިސެޕްޝަނިސްޓަކަށް އިން މީހާ ޝަފީގަށް ގޮވާލިއެވެ. އަދި ޝަފީގުގެ ދަތުރާބެހޭ ގޮތުން ވާހަކަ އޮޅުން ފިލުވަން ފެށިއެވެ. އޭނާ އައީ ވިޔަފާރި ބޭނުމެއްގައި ބޮމްބޭގެ ކުންފުންޏަކާ ވާހަކަ ދައްކަން ކަމަށް ރިސެޕްޝަނިސްޓު ކައިރީގައި ބުންޏެވެ. ވާހަކައިގެ ވަކި ހިސާބަކުން ރިސެޕްޝަނުގައި ހުރި ކަލޭގެ ނިކަން ސީރިއަސް ވެއްޖެއެވެ.
"އެހިސާބުން އޭނަ އަހައިފި ތިމަންނަ ބަޔެއްގެ ފޮޓޯ ދައްކައިފިއްޔާ ބުނާނަންހޭ ތެދަށް ތިޔަ ބައްދަލު ކުރާ މީހުންގެ ތެރޭގައި ފޮޓޯގައިވާ މީހަކު ހުރިއްޔާ، އެހެން ކިޔާފަ އޭނަ ދައްކައިފި ފޮޓޯ ތަކެއް" ޝަފީގު ކިޔައިދިނެވެ.
އަސްތާ ބުނާކަށް މިޖެހުނީ ކަންތަކާއެވެ. ދެއްކި ފޮޓޯ ތަކުގައި އެވަނީ ޝަފީގުމެންނާއެކު ބައްދަލުވުން ތަކުގައި ބައިވެރިވި ކުންފުނީގެ ވެރިންނެވެ. ކޮންމެ ދުވަހަކު އެތަނުގައި ބަހެއްވެސް ނުބުނެ އެ އިންނަ ވަރުގަދަ ދޮންމީހަކީ ކާކުކަންވެސް މި އެނގުނީ އޭނާ ފޮޓޯ ތައް ދައްކާލުމުންނެވެ. އެމީހަކީ ރަޝިޔާ މީހެކެވެ.
"އެހިސާބުން އޭނަ ބުނެފި ބުނަންހޭ ވާހަކައެއް، އަވަހަށް އަމިއްލަ ސަލާމަތް ހޯދައިގެން މިތަނުން ފުރާށޭ، އެ އެންމެންނަކީ ބޮމްބޭ ފުލުހުން ފޮޓޯއާއެކު އިއުލާންކޮށް ހޯދަމުން އަންނަ ބަޔެކޭ، އެމީހުން އަތުނުޖެހިގެންނޭ ފުލުހުން އުޅެނީ، އެއީ ބޮމްބޭގެ މާފިޔާ ގްރޫޕެއްގެ ލީޑަރުންތަކެކޭ، އެމީހުންނާއެކު އުޅޭ ރަޝިޔާގެ މާފިޔާ ލީޑަރެކޭ ފޮޓޯގައި އެ ފެންނަ ދޮންމީހާއަކީ، އަވަހަށް އެމީހުންގެ އަތްދޮށުން ސަލާމަތްވާށޭ" ރިސެޕްޝަނިސްޓް އޭނާގެ އަތުގައި އޮތް ފޮޓޯތަކާއެކު ދައްކަމުން ދިޔަ ވާހަކަ ތަކުން ބިރުންގޮސް ބިންމަތީގައި ރަނގަޅަށް ދެފައިވެސް ހަރުނުލައި އޭރު ހުރި ޝަފީގު ކިޔައިދިނެވެ.
އެހިސާބުން ރިސެޕްޝަނުގައި ހުރި މީހާވެސް އެމީހުން ކަންތައް ކުރަންވީ ގޮތުގެ ލަފާތަކެއް ދިނެވެ. ނަމަވެސް ވެގެން މިއުޅޭ ގޮތް ޝަފީގާއެކު ދިޔަ އިންޑިޔާ މީހާއަށް އޭރުވެސް ހިލަމެއް ވިޔަނުދެއެވެ. އޭނާއަށް މިއިން އެއްވެސް ކަމެއް އަންގަން ބޭނުން ނުވީ އިންޑިޔާ ކަލޭގެ ބިރުން ގޮސް ހެދޭ ޅަ އެއްޗަކުން ބަސްޓްވެ އެ ގްރޫޕްގެ އަތްދޮށުގައި ތާށިވެދާނެތީއެވެ. ރިސެޕްޝަނުގައި ހުރި މީހާ އާއި ޝަފީގާ ރޭވުންތަކެއް ރާވަމުން ދަނިކޮށް ބޮމްބޭ ކުންފުނީގެ މުއައްޒަފަކު ހޮޓަލަށް އައެވެ. އޭނާ އައީ ޖެހިގެން އޮތް ދުވަހުގެ ބައްދަލުވުމުގައި އެއްބަސްވުން ތަކުގައި ސޮއި ކުރަން ހަމަޖައްސާފައި އޮތުމުން ޝަފީގު އަތުގައި ހުރި ލިޔުންތަކުގެ ކޮޕީއެއް ހަދާށެވެ.
"ހުރިހާ ލިޔުމެއް ކޮޕީ ހަދަން އޭނަ އަތަށް ދިނީމާ އެންމެ ފަހުން ހުރެފަ ބުނެފި ބޮސް ބުނެފައޭ އޮތީ ޕާސްޕޯޓްގެ ކޮޕީއެއްވެސް ގެންނަން، އެހެންވީމާ ޕާސްޕޯޓް ދޭށޭ ކޮޕީހައްދަން، އަހަރެން ބުނެފިން ޕާސްޕޯޓެއް ނުދޭނަމޭ، އެއީ ދިވެހި ސަރުކާރުގެ މިލްކެކޭ، އެ ދީފިއްޔާ އަހަރެން ކުށްވެރިވާނޭ، ބުނީމަވެސް ކުރުނުކޮށް ހިފަހައްޓަނީ ޕާސްޕޯޓު ދޭށޭ ކިޔާފަ، އަހަރެންނަށް އެނގިއްޖެ އެމީހުން އެއުޅެނީ މަކަރުން އަހަރެންގެ ޕާސްޕޯޓް އަތުލަންކަން އަހަރެން އިންޑިޔާއިން ފުރައިގެން ދިޔަ ނުދޭން، އެހެންވެ ޕާސްޕޯޓެއް ނުދެން" ޝަފީގު ކިޔައިދިނެވެ.
އެހިސާބުން ޝަފީގު ނިންމީ ދަންވަރު ގަޑިއެއްގައި އެ ހޮޓަލުން ޗެކްއައުޓްވެ އަވަހަށް އެތަނުން ބެޗޭތޯ ބަލާށެވެ. އެހެންވެ ރިސެޕްޝަނިސްޓާވެސް ގުޅިގެން އަވަހަށް އަމިއްލައަށް ޓިކެޓްނަގައި އެތަނުން ފުރުމުގެ ކަންކަން ހަމަޖެއްސިއެވެ. އަދި އިންޓަރނޭޝަނަލް ފްލައިޓަކުން ބޮމްބޭ އެއާރޕޯޓަށް ފުރަން ގޮސްފިނަމަ އެމީހުންގެ އަތްދަށުގައިވާނެކަން ޔަގީންވާތީ ނިންމީ އެއްގަމު މަގުން ކޮޗިންގއަށް ގޮސް އެތަނުން ރާއްޖެ ނައްޓާލާށެވެ. އެހެންވެ ޖެހިގެން އައި ދުވަހު އެންމެ ހެނދުނު އޮތް ފްލައިޓުން ކޮޗިންއިން ރާއްޖެ އައެވެ.
"އަހަރެމެންނަށް އެނގިއްގެ ބޮމްބޭ އެއާޕޯޓުން އެމީހުން އަތުލައިގަންނާނެކަން، އެމީހުންގެ މީހުން އެތިބެނީ އިމިގްރޭޝަން ކައުންޓަރާ ހަމައަށް ވަދެފަ، އެހެންވީމާ އެމީހުން ބާރު އެ އެއާޕޯޓުގަ އޮންނާނެ، އެހެންވެ އެމީހުންގެ ކައިރިން ސަލާމަތް ވެވޭނީ އެއްގަމު މަގުން ކޮޗިންއާ ހަމައަށް އެތެރެވެ، ދެން ފުރިއްޔާ، އެހެންވެ އެހެން ހެދީ، އަހަރެމެން ނައްޓާލީ އެމީހުން އެކޮޅުން ދިން ސިމްއާ ފޯނުވެސް ހަލާކުކޮށްލައި ޑަސްބިނަށް އަޅާލާފަ، އެ އެއްޗެހި ހިފައިގެން އުޅެނިކޮށް އެމީހުން އަހަރެމެން ތިބި ލޮކޭޝަން ހޯދަފާނެތީ އެހެން ހެދީ" އިންޑިޔާ އާއި ރަޝިޔާގެ ވަރުގަދަ މާފިޔާ ގްރޫޕެއްގެ އަތްދޮށުން ސަލާމަތްވި ގޮތް ކިޔައިދެމުން އޭނާ ބުންޏެވެ.
ރާއްޖެ އައިސް އެއާޕޯޓަށް ފޭބުމާއެކު ޝަފީގުގެ ފޯނު ނަގައި ދިރާގު ސިމް އޭނާގެ ފޯނަށް ލައްވާލިއެވެ. ސިމް ލައްވާލާފައި ފޯން އޮން ކޮށްލުމާއެކު އޭނާގެ ފޯނަށް ބޮމްބޭ ކުންފުނީގެ މާފިޔާ ލީޑަރުން "ހެޓަކަށް ގުޅާފައި ހުރުމުން" މިސްކޯލް މެސެޖުތައް އަންނަން ފެށިއެވެ. އެމީހުން ގުޅާފައި ހުރީ ޖެހިގެން އައި ދުވަހުގެ ބައްދަލުވުމަށް އޭނާ ބަލައި ހޮޓަލަށް އެމީހުން ދާން އޮތް ގަޑީގައެވެ. ދިޔައިރު އޭނާ ހޮޓަލުގައި ނެތުމުންނާއި އެވަރަށް ގުޅައިވެސް ޚަބަރެއް ނުވުމުން އެމީހުންގެ އަތްދޮށުން ސަލާމަތްވެ ޝަފީގު ފިލީކަން ކަށަވަރު ވުމުން މާފިޔާ ގްރޫޕްގެ ލީޑަރު ޝަފީގަށް ފޮނުވާލީ ނުރައްކާތެރި މެސެޖެކެވެ. ޒަމާނެއްގެ ކޮޅުންވެސް ބޮމްބޭއަށް އަރައިފިއްޔާ ނިމުނީއެވެ....
އެމީހުންގެ އަސްލު ބޭނުމަކީ ކޮބާ؟
ޝަފީގު ބުނި ގޮތުގައި އޭނާ ލަފާކުރާ ގޮތުގައި އެމީހުންގެ މައިގަނޑު ބޭނުމަކީ އެގޮތަށް އަތްދަށު ލައިގެން ޝަފީގު ލައްވައި "ކަޅު ފައިސާ" ދައުރު ކުރުވުމެވެ. ޝަފީގު ކަހަލަ ކުޑަކުޑަ ވިޔަފާރިވެރިއެއްގެ އަތުން އެމީހުންނަށް ލިބޭނެ އިތުރު މާލީ މަންފާއެއް ނޯންނާނެއެވެ. އެއަށްވުރެ އެމީހުންނަކީ މުއްސަނދި، "ވަގު ވިޔަފާރި ތަކުން" މުއްސަނދިވެފައިވާ މާވަރުގަދަ ވިޔަފާރިވެރިން ތަކެއްކަން އެނގެއެވެ.
"އެމީހުންގެ ބޭނުމަކީ ހީވަނީ ކަޅުފައިސާގެ ވިޔަފާރި ކުރުންހެން، އަހަރެމެން ކަހަލަ ކުދިކުދި ވިޔަފާރި ކުރާ މީހުން އަތުން އެމީހުން ބޭނުންވާނީ ކޮންފައިސާއެއް، އަހަރެން ބޭނުމެއްނޫން ކަޅު ފައިސާގެ ވިޔަފާރިއަށް ވަންނާކަށް، އެމީހުންގެ އަތްދޮށުން ސަލާމަތްވީއިރުވެސް އަސްލު އަހަންނަކަށް ނޭނގެ އެމީހުންގެ ބޭނުމެއް، އަނެއްކޮޅުން މާފިޔާ ގްރޫޕެއްކަން ކުރިން އެނގުނުނަމަ އެމީހުންނާ ބައްދަލު ކުރަން ނުވެސް ދިޔައިމުސް" ޝަފީގު އޭނާގެ ވާހަކަ ނިންމާލަމުން ކިޔައިދިނެވެ.
ސަލާމަތުން އެނބުރި ގައުމަށް އާދެވުނުކަން ނަސީބުތާއެވެ. އެމީހުންނަކީ ދެފަހަރު ހަމައަށް އެއްތަނެއްގައި މީހުންނާ ބައްދަލުނުކުރާ، ބައްދަލުވުން އޮތްތަން ކުރިޔާލައި އަންގާވެސްނުލާ، އަދި އެކިފަހަރު އެކި މޯބައިލް ސިމް ބޭނުންކުރާ ބަޔެއް ކަމުން ބޮމްބޭގެ ފުލުހުންނަށްވެސް އަތުލައިނުގަނެވިގެން އުޅޭ ވަރުގަދަ ނުރައްކާތެރި މާފިޔާ ގްރޫޕެއްގެ ވެރިންނެވެ.
މިލިޔުން ވަރަށް ބަރާބަރު... ނައު ޔޫ ބޯތް އާރ ޑެޑް އޯކޭ!