ކުރިޔަށް އޮތް ރިޔާސީ އިންތިޚާބުގައި އަދާލަތު ޕާޓީންވެސް ރިޔާސީ ކެންޑިޑޭޓަކު ނެރުމުގެ ވިސްނުން ގެންގުޅޭ ކަމަށް އެޕާޓީން ރޭ ބުނެފިއެވެ.
އިދިކޮޅު އިއްތިހާދުން ފ. މަގޫދޫގައި ރޭ ބޭއްވި ޖަލްސާގައި އަދާލަތު ޕާޓީގެ ތަރުޖަމާން ޝައިޚް އަލީ ޒާހިރު ވިދާޅުވި ގޮތުގައި އެޕާޓީގެ ފުރަތަމަ ވިސްނުމަކީ ރިޔާސީ ކެންޑިޑޭޓެއް ނެރުމެއްނޫނެވެ. އަލީ ޒާހިރު ވިދާޅުވީ އަދާލަތުގެ ފުރަތަމަ ވިސްނުމަކީ އެޕާޓީގެ ގައުމީ މަޖިލީހުން ދާދިފަހުން ފާސްކުރި ގަރާރުގައިވާ ގޮތަށް އިދިކޮޅު ހުރިހާ ޕާޓީތަކެއް ގުޅިގެން އެއްކެންޑިޑޭޓް ނެރެފިނަމަ އެ ކެންޑިޑޭޓަކަށް އަދާލަތުން ތާއީދު ކުރުމެވެ.
ނަމަވެސް އިދިކޮޅުން އެއްކެންޑިޑޭޓު ނެރުމުގެ ވިސްނުމުގައި ކުރަމުންދާ ކަންކަން ކާމިޔާބުނުވެ ޕާޓީ ތަކުން ވަކިވަކި ކެންޑިޑޭޓުން ނެރުމާ ދިމާއަށް ގޮސްފިނަމަ އަދާލަތުންވެސް ކެންޑިޑޭޓެއް ނެރޭނެ ކަމަށް އަލި ޒާހިރު ވިދާޅުވިއެވެ. އޭނާ ވިދާޅުވީ އެޕާޓީން ނެރޭ ކެންޑިޑޭޓު ވާނީ އިސްލާމް ދީނާއި ގައުމުގެ ސުލްޙަމަސަލަސްކަން ދަމަހައްޓާނެ ކެންޑިޑޭޓެކެވެ. ނަމަވެސް އަދާލަތުން ނެރޭނެ ކެންޑިޑޭޓެއް ނިންމުމާ ހަމައަށްދާނީ އެއްކެންޑިޑޭޓު ނެރުމުގެ ހުރިހާ ކަމެއް ނާކާމިޔާބު ވެއްޖެ ކަމަށް އަލީ ޒާހިރު ވިދާޅުވިއެވެ.
އިދިކޮޅު ޕާޓީތަކުން އެއްކެންޑިޑޭޓް ނެރުމުގެ ވާހަކަ ދުވަސްކޮޅެއް ކުރިން ވަރަށް ގަދައަށް ދެކެވުނު ނަމަވެސް މިހާރު އެވާހަކަ ވަނީ މަޑު ޖެހިލާފައެވެ. އަދި އިދިކޮޅު އިއްތިހާދުގެ ބަޔެއް ބޭފުޅުން ވިދާޅުވަމުން ގެންދަވަނީ އިދިކޮޅުން ވަކިވަކި ކެންޑިޑޭޓުން ނެރުނު ނަމަވެސް ރައީސް ޔާމީންގެ ވެރިކަން ބަދަލު ކުރެވޭނެ ކަމަށެވެ. ނަމަވެސް އިދިކޮޅު އިއްތިހާދުން އަދި ވަކިގޮތެއް ނުނިންމައެވެ.
އަދާލަތު ޕާޓީން ރިޔާސީ ކެންޑިޑޭޓަކު ނެރުމުގެ ވިސްނުން ގެންގުޅޭއިރު އެޕާޓީގެ ރައީސް ޝައިޚް އިމްރާން އަބްދުﷲ މިވަގުތު ހުންނެވީ ދިގު މުއްދަތެއްގެ ޖަލު ޙުކުމެއްގައެވެ.
