އެމްޑީޕީ ޗެއަރޕާރސަން ކެމްޕޭނުގައި އައްޑޫސިޓީ ފޭދޫގައި ދަމާފައިހުރި ފައްޔާޟު އިސްމާޢީލްގެ ބެނަރ ތައް ކަނޑާލައިފިއެވެ.
މި އިންތިޚާބު ފޯރި އެންމެގަދަ އެއް ސަރަހައްދަކީ އައްޑޫސިޓީ ކަމަށްވާއިރު، އެ ބެނަރ ތައް ކަނޑާލައި، ގެއްލުން ދިނީ ކޮން ބައެއްކަން އަދިނޭނގެއެވެ.
މިކަމާއިގުޅިގެން ރައްޔިތުންގެ މަޖިލީހުގެ ފޭދޫ ދާއިރާގެ މެމްބަރު ނިހާދު ވަނީ އެކަން ކުށްވެރިކުރައްވާފައެވެ. އަދި މިއީ ވަރަށް ނާތަހުޒީބު އަމަލެއްކަން ފާހަގަކޮށް، މިފަދަ ކަންކަން ނުކުރުމަށް ވެސް ވަނީ އިލްތިމާސް ކުރައްވާފައެވެ.
އައްޑޫ ސިޓީގެ މަޖިލިސް މެމްބަރުން ތެރެއިން ދެމެމްބަރުން ފިޔަވައި ދެން ހުރިހާ މެމްބަރުން ފައްޔާޟަށް ތާއީދު ކުރައްވާއިރު، އައްޑޫ ސިޓީގެ މޭޔަރާއި، ގިނަ އެމްޑީޕީ ކައުންސިލަރުންގެ ތާއީދު ވެސް އޮތީ ފައްޔާޟަށެވެ.
އެމްޑީޕީގެ ޗެއަރޕާރސަން އިންތިޚާބުގެ ވާދަވެރިކަން ބޮޑުވެ، ޕާޓީގެ ތެރޭގައި ވަނީ ދެ ފެކްޝަން އުފެދިފައެވެ.
އެއީ މިހާރުގެ ރައީސުލްޖުމްހޫރިއްޔާ އިބްރާހިމް މުހައްމަދު ސާލިހަށް ތާއީދު ކުރައްވާ ފެކްޝަނަކާއި ކުރީގެ ރައީސް އަދި މަޖިލީހުގެ ރައީސް މުޙައްމަދު ނަޝީދަށް ތާއީދު ކުރައްވާ ފެކްޝަނެކެވެ. މި ދެ ފެކްޝަނަށް ތާއީދު ކުރައްވާ ފަރާތްތަކުން އަންނަނީ އެއްބަޔަކު އަނެއްބަޔަކަށް ބަހުގެ ޙަމަލާތައް ވެސް ރައްދުކުރަމުންނެވެ.
މި އިންތިޚާބު ބޭއްވުމަށް ހަމަޖެހިފައިވަނީ އަންނަ މެއި މަހުގެ 14 ވަނަ ދުވަހުއެވެ.
