49 އިންސައްތަ މަސައްކަތް ނިންމުމަށްފަހު، ރައްޔިތުންގެ މަޖިލީހުގެ ފުރަތަމަ ދައުރުގެ ޗުއްޓީއަށް ހިނގައްޖެއެވެ.
ރައްޔިތުންގެ މަޖިލީހުން ވިދާޅުވީ މިދިޔަ އަހަރު ނުނިމި ހުރި ބައެއް ކަންތައްތަކާއި މިއަހަރު މަޖިލީހަށް ހުށަހެޅި ބިލުތަކާއި ގަރާރުތަކާއި މައްސަލަތައް ހިމެނޭގޮތަށް 131 މަސައްކަތް މަޖިލީހަށް ހުށަހަޅާފައިވާއިރު، އޭގެ ތެރެއިން 65 މަސައްކަތް މި ދައުރުގެ ތެރޭގައި މަޖިލީހުން ނިންމާފައިވާ ކަމަށެވެ.
މި ދައުރަށް 28 ބިލެއް ހުށަހެޅިއިރު، އޭގެ ތެރެއިން 8 ބިލުގެ މަސައްކަތް ނިންމާފައިވާ ކަމަށާއި 10 ގަރާރެއް ހުށަހެޅިއިރު، ދެ ގަރާރުގެ މަސައްކަތް ނިންމާފައިވާ ކަމަށް ވެސް މަޖިލިސް އިދާރާއިން ވިދާޅުވިއެވެ. އަދި ސަރުކާރުން ހުށަހެޅި 8 މައްސަލައިގެ ތެރެއިން ހަތް މައްސަލަ ނިންމާ، މަޖިލީހުގެ ރިޔާސަތުން ހުށަހެޅި 8 މައްސަލައިގެ ތެރެއިން ފަސް މައްސަލަ ވެސް ނިންމާފައިވާ ކަމަށެވެ.
މީގެ އިތުރުން މަޖިލިސް މެންބަރުން ހުށަހެޅި 10 މައްސަލައިގެ ތެރެއިން ހަތަރު މައްސަލައާއި އެހެނިހެން މައްސަލަތަކާ ގުޅޭގޮތުން ހުށަހެޅި ހަ ރިޕޯޓުގެ ތެރެއިން އެއް ރިޕޯޓު، އަދި ވަޒީރުންނާ ކުރުމަށް ހުށަހެޅި 49 ސުވާލުގެ ތެރެއިން 26 ސުވާލު ކޮށް، ހުށަހެޅި 12 މައްސަލައިގެ މަސައްކަތް މުޅިން ނިންމާލާފައިވާ ކަމަށް ވެސް މަޖިލިސް އިދާރާއިން ބުނެއެވެ.
މިއަހަރުގެ ފުރަތަމަ ދައުރުގައި ބޭއްވި 35 ޖަލްސާއަށް 71 ގަޑިއިރާއި 11 މިނިޓް ހޭދަ ކޮށްފައިވާ ކަމަށާއި، ކޮމިޓީތަކުން ބޭއްވި 170 ބައްދަލުވުމަށް 134 ގަޑިއިރާއި 18 މިނިޓު ހޭދަވެފައިވާ ކަމަށް ވެސް ރައްޔިތުންގެ މަޖިލީހުގެ އިދާރާއިން ބުނެއެވެ.
މިއަހަރުގެ ދެވަނަ ދައުރުގެ ޖަލްސާތައް ފަށާނީ، އަންނަ މެއިމަހުގެ 16 ގައެވެ.
