މިއަދަކީ ބައިނަލްއަޤުވާމީ މަދަނީ ވައިގެ ދަތުރުފަތުރުގެ ދުވަހެވެ. ކޮންމެ އަހަރެއްގެވެސް ޑިސެމްބަރު މަހުގެ 7 ވަނަ ދުވަސް ފާހަގަ ކުރެވެނީ ބައިނަލް އަޤުވާމީ މަދަނީ ވައިގެ ދަތުރު ފަތުރުގެ ދުވަހުގެ ގޮތުގައެވެ.
މި ދުވަސް ފުރަތަމަ ފާހަގަ ކުރަން ފެށުނީ 1994 ވަނަ އަހަރު އިންޓަނޭޝަނަލް ސިވިލް އޭވިއޭޝަން އޯގަނައިޒޭޝަން (އައިކާއޯ) އަށް 50 އަހަރު ފުރުމުގެ ޙަރަކާތްތަކުގެ ތެރެއިންނެވެ.
1996 ވަނަ އަހަރު އައިކާއޯގެ އިސްނެގުމުގެ މަތީން، އ.ދ. ގެ ޖެނެރަލް އެސެމްބްލީން ވަނީ ޑިސެމްބަރު މަހުގެ 7 ވަނަ ދުވަހަކީ އ.ދ. ގެ ނިޒާމުގެ ތެރެއިން ފާހަގަ ކުރެވޭ ބައިނަލް އަޤުވާމީ މަދަނީ ވައިގެ ދަތުރު ފަތުރުގެ ދުވަހުގެ ގޮތުގައި ބަލައިގެންފައެވެ.
2015 އިން ފެށިގެން 2018 ވަނަ އަހަރަށް އައިކާއޯއިން ކަނޑައަޅާފައިވާ ޝިޢާރަކީ "އެއްވެސް ގައުމެއް ބާކީ ވިޔަ ނުދިނުމަށް ގުޅިގެން މަސައްކަތް ކުރުން" އެވެ.
Working together to Ensure No Country is Left Behind
އައިކާއޯގެ "ނޯ ކަންޓްރީ ލެފްޓް ބިހައިންޑް" ކެމްޕޭނުގެ ބޭނުމަކީ އައިކާއޯއިން އެކުލަވާލައިވާ ސްޓޭންޑަޑްތަކާއި ހަމަތަކާއި އުޞޫލުތައް ހުރިހާ ޤައުމެއްގައިވެސް ތަންފީޒުވެގެންދާނޭ ގޮތަށް ބައިނަލްއަޤުވާމީ މުޖުތަމަޢު އެކުއެކީގައި މަސައްކަތް ކުރުމެވެ. އެގޮތުގެ މަތީން މުޅި އިންސާނިއްޔަތަށް ސަލާމަތާއި ރައްކާތެރިކަމާއެކު ޚިދުމަތް ކުރާނޭ ވައިގެ ދަތުރު ފަތުރުގެ ނިޒާމެއް ޤާއިމުކުރުމެވެ.
މޯލްޑިވްސް ސިވިލް އޭވިއެޝަން އޮތޯރިޓީން ހާމަ ކުރާ ގޮތުގައި ވައިގެ ދަތުރުފަތުރުގެ ދުވަސް ފާހަގަ ކުރުމުގެ ގޮތުން ޚާއްސަ ޕްރޮގްރާމްތަކެއް ހިންގަން ވަނީ ކަނޑައަޅާފައެވެ. އެންމެ ފުރަތަމަ ކަމެއްގެ ގޮތުގައި އެ އޮތޯރިޓީން ފާހަގަ ކޮށްފައި ވަނީ ދުވަހުގެ މުނާސަބަތުގައި ސިވިލް އޭވިއޭޝަން އޮތޯރިޓީގެ މިނިސްޓަރ، މިނިސްޓަރ އޮފް ޓޫރިޒަމް އޮނަރަބަލް މޫސާ ޒަމީރު ދެއްވާ ޚިޠާބެވެ. މި ޚިޠާބު ޢާއްމު ކުރީ ރާއްޖޭގެ ނޫސްތައް މެދުވެރިކޮށެވެ.
މީގެ އިތުރަށް ގިނަ ހަރަކާތްތަކެއް އެއާޕޯޓުތަކުގައި ހިންގުމަށް ހަމަޖެހިފައިވެއެވެ. އެގޮތުން އެއާޕޯޓުތަކުގައި ދުވަހާގުޅޭ ބެނާ ދެމުމާއި، އެއާޕޯޓުން ދަތުރުކުރާ ފަސިންޖަރުންނަށް "މީޓް އެންޑް ގްރީޓް" ޙަރަކާތް ކުރިއަށް ގެންދިއުމާއި، ސްކޫލްތަކުގެ ދަރިވަރުންނަށް ހުޅުވާލައިގެން "އޯޕަން ޑޭ" އެއްގެ ގޮތުގައި އެއާޕޯޓުގައި އޭވިއޭޝަން ދާއިރާއާބެހޭ މަޢުލޫމާތު ދިނުމަށްވަނީ ހަމަޖެހިފައެވެ.
ސިވިލް އޭވިއޭޝަން އޮތޯރިޓީން އިންތިޒާމުކޮށްގެން އޭވިއޭޝަން ސިނާޢަތުގެ ބައިވެރިންނާ ގުޅިގެން ޑިސެމްބަރު 12 ވަނަ ދުވަހުގެރޭ "އޭވިއޭޝަން ނައިޓް"ގެ ނަމުގައި ޙަފުލާއެއް ނޭޝަނަލް އާޓް ގެލެރީގައި ބޭއްވުމަށްވަނީ ހަމަޖެހިފައެވެ. މި ޙަފުލާ ޝަރަފުވެރި ކޮށްދެއްވާނީ ސިވިލް އޭވިއޭޝަން އޮތޯރިޓީގެ މިނިސްޓަރ، މިނިސްޓަރ އޮފް ޓޫރިޒަމް އޮނަރަބަލް މޫސާ ޒަމީރެވެ.
