އައިމިންދައްތަގެ މައްޗަށް ދައުވާ ނުކުރުމަށް ޕްރޮސިކިއުޓަރ ޖެނެރަލް (ޕީޖީ) އޮފީހުން ނިންމުމުން އޭނާ ބަންދުން ދޫކޮށްލައިފިއެވެ.
ފުލުހުން ނެރުނު ބަޔާނެއްގައި ބުނެފައިވަނީ އައްޑޫ ސިޓީގައި ކުޑަ އަންހެން ކުއްޖަކަށް ޖިންސީ ގޯނާ ކުރި މައްސަލައެއްގައި، ހައްޔަރުކުރި 59 އަހަރުގެ އަންހެންމީހާ (އައިމިނަތުދިޔެ) ބަންދުން ދޫކޮށްލާފައިވާ ކަމަށެވެ. އަދި އޭނާ ދޫކޮށްލީ އާމިނަތުދިޔެގެ މައްޗަށް ދައުވާ ނުކުރުމަށް ޕްރޮސެކިއުޓާ ޖެނެރަލްގެ އޮފީހުން ނިންމާފައިވާ ކަމަށެވެ.
ޕީޖީ އޮފީހުން މައްސަލަ ވަނީ އަނބުރާ ފޮނުއްވާލާފައިވަނީ އައްޑޫ ސިޓީ ހިތަދޫގައި އުމުރުން 16 އަހަރުގެ ކުއްޖަކަށް ޖިންސީ ގޯނާކުރި މައްސަލައެއްގެ ތުހުމަތުގައި ހައްޔަރުކުރި މައްސަލައިގެ ތަހުގީގުގައި ހޯދާފައިވާ ހެއްކާއި ގަރީނާ ވަޒަންކުރުމަށްފަހު، ޖިނާއީ ދައުވާއެއް ކޮށްގެން ކުށް ސާބިތުކުރެވޭ މިންވަރަށް ހެއްކާއި ގަރީނާ ލިބިފައި ނުވާކަމަށް ބަޔާންކޮށް ކަމަށް ވެސް ފުލުހުން ބުނެއެވެ.
ފުލުހުން ބުނީ އެ މައްސަލައިގެ ތަހުގީގަށް ލިބުނު ހުރިހާ މައުލޫމާތެއްގެ ވަށައިގެންވާ އެންމެހައި ކަންކަން ބަލައި، އެކަށީގެންވާ ހެއްކާއި ގަރީނާ ހޯދުމަށް އެ މައްސަލައިގެ ތަހުގީގުގައި މަސައްކަތްކޮށްފައި ވާނެ ކަމަށެވެ.
އެހެންނަމަވެސް އެމައްސަލައިގައި ހައްޔަރުކުރި މީހާ ފިޔަވައި އިތުރު މީހެއް ނުވަތަ ބައެއްގެ މައްޗަށް ތުހުމަތުކުރެވޭ ވަރަށް އެކަށީގެންވާ ހެއްކެއް ލިބިފައިނުވާ ކަމަށް ފުލުހުން ބުންޏެވެ.
އެ މައްސަލައިގާ މިދިޔަ މަހުގެ 25 ވަނަ ދުވަހު އައްޑޫ ސީޓީ ހިތަދޫން ހައްޔަރުކުރި މީހާއަކީ ޝަރަފުއްދީން ސްކޫލުގެ މަސައްކަތު މީހެކެވެ. އުމުރުން 59 އަހަރުގެ އެ އަންހެން މީހާ ޝަރީއަތް ނިމެންދެން ބަންދުގައި ބަހައްޓަން ސ. ހިތަދޫ މެޖިސްޓްރޭޓް ކޯޓުން އަމުރު ނެރުމުން މެޖިސްޓްރޭޓް ކޯޓުގެ އެ ނިންމުން އާމިނަތުދިޔެގެ ފަރާތުން ވަނީ ހައި ކޯޓުގައި އިސްތިއުނާފު ކޮށްފައެވެ.
އެ މައްސަލަ ބެލުމަށްފަހު ހައި ކޯޓުން ހުކުމްކުރީ އާމިނަތުދިޔެ ޝަރީއަތް ނިމެންދެން ބަންދު ކުރުމަށް މެޖިސްޓްރޭޓް ކޯޓުން އަމުރުކުރީ ރަނގަޅަށް ކަމަށެވެ.
ޖީންސީ ގޯނާކުރުމުގެ މައްސަލައިގައި އަމިނަތުދިޔެ ފްރޭމްކޮށްފައިވާ ކަމަށް އޭނާގެ އާއިލާ މީހުންނާއި އިތުރު ބައެއް މީހުން ބުނެ ވަނީ އައްޑޫ ސިޓީ ހިތަދޫ ޕޮލިސް ސްޓޭޝަންގައި ވަނީ މުޒާހަރާ ވެސް ކޮށްފައެވެ.
