އިންޑިއާ އައުޓް ހަރަކާތަކީ ޤައުމީ ސަލާމަތަށް ނުރައްކަލެއްގެ ގޮތުގައި ކަނޑައަޅައިފިއެވެ.
ސަލާމަތާ ބެހޭ މަޖިލީހުން އެގޮތަށް ކަނޑައަޅާފައިވުމުން، އެފަދަ ހަރަކާތްތައް ހުއްޓުވުމަށް އަންގަވައި ރައީސް އިބްރާހީމް މުޙައްމަދު ޞާލިޙު މިހާރުވަނީ ގަރާރެއް ވެސް ނެރުއްވާފައެވެ.
ރައީސްގެ ޤަރާރުގައި ވަނީ އެ ހަރަކާތުގެ ސަބަބުން ރާއްޖޭގެ އެކި ސަރަހައްދުތަކުގައި އޮތް އަމާންކަމާއި ދާޚީލީ ހަމަޖެހުން ނަގާލައި، ސަރަހައްދީ ސަލާމަތާއި ރައްކާތެރިކަން ވެސް ގެއްލުވައިލާ ކަމަށެވެ. ގައުމީ ސަލާމަތަށް ނުރައްކާވާ ފަދަ ކޮންމެ ހަރަކާތަކީ ދިވެހި ސަރުކާރުން އެ ކަމެއް ހުއްޓުވަން ޖެހޭނެ ކަމެއް ރައީސް ވަނީ ޤަރާރުގައި ވިދާޅުވެފައެވެ.
"އިންޑިއާ އައުޓް" އެ ހަރަކާތަކީ ރާއްޖޭގެ ގާނޫނުލްްއުގޫބާތުން ޖިނާއީ ކުށެއްގެ ގޮތުގައި ކަނޑައަޅައި މަނާކޮށްފައިވާ އަމަލުތަކުގެ ތެރެއިން ވަކި ނަސްލަކަށް ނުވަތަ ނަސަބަކަށް ވީތީ ދަތިކޮށް ފުރައްސާރަކޮށް ތަފާތުކުރުންފަދަ އަމަލެއް ކަމުގައި ޤަރާރުގައި ވަނީ ފާހަގަކުރައްވާފައެވެ. އަދި ނަސްލީ ތަފާތުކުރުންތައް ހުއްޓުވަން އެކި އެކި މުއާހަދާތަކާއި އދ. ގެ އެކި އެކި ގަރާރުތަކުގައި އެފަދަ އަމަލުތައް މަނާކުރާ ކަމެއް" ޤަރާރުގައި ވެއެވެ.
