ގައުމު އަމާން އައްސޭރިއަކަށް ސަރުކާރުން ގެންގޮސްދޭނެ ކަމަށް ހޯރަފުށީ ދާއިރާގެ މެންބަރު އަހުމަދު ސަލީމް، ސައްލެ ވިދާޅުވެއްޖެއެވެ.
އޭނާ މިހެން ވިދާޅުވީ ފަތުރުވެރިކަމުގެ ޤާނޫނަށް އިސްލާހުގެނައުމަށް ހުށަހަޅާފައިވާ ބިލްގެ ބަހުސްގައި ވާހަކަ ދައްކަވަމުންނެވެ.
ސައްލެ ވިދާޅުވީ ދަރަނީގެ ދަންތުރައިގައި ރާއްޖެ ޖެހުނަކަ ސަރުކާރުން ނުދޭނެ ކަމަށެވެ.
ކޮވިޑުގެ ބަލިމަޑުކަމުގެ ތެރޭގައި ރާއްޖެއާއި ބޮޑެތި އެހެން ޤައުމުތަކެއްގެ އިޤްތިޞާދު ދަށަށްދިޔަކަމަށާއި އެހެން ނަމަވެސް އެގައުމުތަކަށް ވުރެ ކުރިން ރާއްޖެއަށް އެ ހާލަތުން އަރައިގަނެވިފައިމިވަނީ މާތް ﷲ ގެ ހެޔޮ ރަޙުމަތާއި ވެރިއެއްގެ މޮޅު ހިކުމަތު އަމަލީން ކަމަށް ވެސް މެމްބަރު ސަލީމް ވިދާޅުވިއެވެ.
" ކޮވިޑާ ގުޅިގެން ޓޫރިޒަމް އިންޑަސްޓްރީއަށް އެންމެ ބޮޑު ދަތިތައް ކުރިމަތިވީ ވަގުތުވެސް ސަރުކާރުން އެކަންކަމަށް ރިއާޔަތްކޮށް، ސިޔާސަތުތައް ބަދަލުކޮށް ލުއި ދިން. ސަރުކާރުން ގަބޫލުކުރީ ފަތުރުވެރިކަމުގެ އިންޑަސްޓްރީ ސަލާމަތްކުރުމަށްވުރެ މުހިންމު ކަމެއް ނެތްކަމަށް. މިއަދު މިދެކޭ ކާމިޔާބުގެ އަސްލަކީ އެއީ." ސަލީމް ވިދާޅުވިއެވެ.
ސައްލެ ވިދާޅުވީ ދިވެހި ދައުލަތުގެ ހުންގާނުގައި ކުޅަދާނަ އިޚުލާސްތެރި ވަފާތެރި ކައްޕިތާނެއް މިއަދު ނުހުންނެވި ނަމަ އަޅުގަނޑުމެންގެ މި އޮޑި ފަރަށް އެރީސް ކަމަށެވެ. އެކަން އެގޭގޮތަކީ ދުނިޔެ ދައްކާ މަންޒަރުތަކުން އަޅުގަނޑުމެންގެ ވަށައިގެންމިވާ ގައުމުތަކުން ފެންނަ އަދި މި ކުރެވޭ ތަޖުރިބާތަކުން ކަމަށް ވެސް ސައްލެ ވިދާޅުވިއެވެ.
މި މޭރުމުން ވާހަކަ ދައްކަވާ މެމްބަރު ސަލީމް ވަނީ ރައީސް ސާލިޙަށް ވަރަށް ބޮޑަށް ތައުރީފް ކުރައްވާފައެވެ.
