ފަލަސްޠީނުގެ ބިމުގައި ގަދަބާރުން އުފައްދާފައިވާ ޔަހޫދި ދައުލަތް، އިސްރާއީލުގެ ސަލާމަތީ ބާރުތަކުން މިއަދުގެ ފަތިހުގެ ވަގުތެއްގައި މުސްލިމުންގެ ފުރަތަމަ ޤިބުލަ އަދި ތިންވަނަ ޙަރަމް އަލްމަސްޖިދު އަލްއަޤްޞާ (މަސްޖިދުލް އަަޤްޞާ) އަށް ވަދެގަނެ އެތަނުގައި އަޅުކަންކުރަން ތިބި މީހުންނަށް ހުރަސްއަޅައި، ބަޔަކު ހައްޔަރުކުރުމަށް ފަހު އަޤްޞާގެ ޙަރަމްފުޅު ދޫކޮށް ގޮސްފިއެވެ.
މިއި ތިން ދުވަހުގެ ތެރޭގައި އިސްރާއީލުގެ ސަލާމަތީ ބާރުތަކުން އަޤްޞާގެ ޙަރަމްފުޅަށް ވަދެގަތް ދެވަނަ ފަހަރެވެ.
30 ހާހެއްހާ މުސްލިމުން މިއަދުގެ ފަތިސް ނަމާދަށް ތިއްބައި، އަޤްޞާގެ ޙަރަމްފުގެ ހުރުމަތް ގަނޑައި އެތަނަށް ވަދެގަނެ، މިސްކިތުގައި ތިބި މުސްލިމުން ހިސާރުކުރުމަށް ފަހު، ޔަހޫދީ ފައުޖުތަކުން ވަނީ ޤުދްސުގައި ތިބި ޔަހޫދީ ވަޒަންވެރިންނަށް އަޤްޞާގެ ޙަރަފްފުޅަށް ވަނުމުގެ ފުރުސަތު ހުޅުވާލާފައެވެ. މިއާއެކު ހަރުކަށި ޔަހޫދީން ވަނީ ބައިބަޔަށް އެ މާތް މިސްކިތްކޮޅުގެ ސަރަހައްދަށް ވަދެފައެވެ.
އިސްރާއީލުގެ ފައުޖުތައް މަސްޖިދުލް އަޤްޞާގެ ޙަރަމްފުޅުން ނުކުތުމަށް ފަހު އިސްރާއީލުގެ ފުލުހުން ބުނެފައި ވަނީ "މުސްތަޤުބަލުގައި އިތުރަށް ހަމަނުޖެހުން އުފައްދަފާނެ މީހުން ހުއްޓުވުމަށް" އިސްރާއީލުގެ ސަލާމަތީ ބާރުތަކުން މަސްޖިދުލް އަޤްޞާގެ ވަށައިގެންވާ ސަރަހައްދުގައި އަދިވެސް ހަރަކާތްތެރިވާނެ ކަމުގައެވެ.
އަޤްޞާގެ ޙަރަމްފުޅުތެރޭގައި ހުންނަ އަލްމަސްޖިދުލް ޤިބްލީއާއި މަސްޖިދު ޤުއްބަތިއްޞަޚްރާގައި ފަތިސް ނަމާދަށް ތިބި މީހުން ވަށާލައި އެމީހުންނަށް އަނިޔާކުރުމަށް ފަހު އިސްރާއީލުގެ ސަލާމަތީ ބާރުތަކުން ވަނީ ފަލަސްޠީނުގެ ބައެއް މީހުން ހައްޔަރުކޮށްފައެވެ. އަދި ޔަހޫދީ ފައުޖުތަކުން ހަމަލާދިނުމުގެ ސަބަބުން 33 މީހަކަށް އަނިޔާވެފައި ވާއިރު، 27 މީހަކު ވަނީ ހޮސްޕިޓަލުން ފަރުވާުހޯދާފައެވެ.
ޔަހޫދީ ފައުޖުތަކުން، ހަރުކަށި ޔަހޫދީންނަށް މަސްޖިދުލް އަޤްޞާގެ ހުރުމަތްކަނޑާލުމުގެ ފުރުސަތު ހުޅުވައިލުމުން، 540 އަށްވުރެ ގިނަ ޔަހޫދީން ވަނީ މިއަދު އެ މާތް ޙަރަމްފުޅުގެ ތެރެއަށް ވަަދެގެންފައެވެ. އަދި ޔަހޫދީންގެ ގިނަ ބަޔަކު ވަނީ މިސްކިތްކޮޅުގެ ބޭރުގައި ތިބެ ޔަހޫދީ ދީނީ ގޮވެލިތައް ގޮވައި، ނަށައި، ލަވަކިޔައި، މުސްލިމުންނަށް ޖެއްސުންކޮށްފައެވެ.
މި އެޕްރީލް މަހުގެ 15 އިން 23 އަށް ޔަހޫދީން އެމީހުންގެ ޢީދުލް ފުޞްޙް (ޕާސްއޯވަރ) ފާހަގަކުރަމުން ދާއިރު، އެ ޔަހޫދީ އީދުގެ ޤުރްބާނީ އަޤްޞާގެ ޙަރަމްފުޅުގައި ކަތިލުމަށް މަސައްކަތްކޮށްފާނެ ކަަމަށްވެސް ފަލަސްޠީނު މީހުން ވަނީ ލަފާކޮށްފައެވެ.
މުސްލިމުންގެ ތިންވަނަ ޙަރަމްފުޅު 1967 ވަނަ އަހަރު އަޅުވެތިކުރުމަށް ފަހު އިސްރާއީލުގެ އުދުވާނީ ބާރުތަކުން ދަނީ ތަކުރާރުކޮށް އެ ޙަރަމްފުޅަށް ގެއްލުންދީ އެތަނުގެ އިސްލާމީ ސިފަ ނައްތާލުމަށް މަސައްކަތްކުރަމުންނެވެ.
