ވެލާނާ އިންޓަރނޭޝަނަލް އެއަރޕޯޓު (ވީއައިއޭ) ގެ އައު ރަންވޭ ހުޅުވުމުން ކޮންމެ ދެ މިނެޓަކުން ފްލައިޓު ޖެއްސުމުގެ ގާބިލުކަން ލިބޭނެ ކަމަށް އެއާޕޯޓު ހިންގާ މޯލްޑިވްސް އެއަރޕޯޓްސް ކޮމްޕެނީ (އެމްއޭސީއެލް) އިން ބުނެފިއެވެ.
އެ ކުންފުނިން ބުނީ އައު ރަންވޭ މިއަހަރުގެ ތިން ވަނަ ކުއާޓަރުގެ ތެރޭގައި ހުޅުވޭނެ ކަމަށާއި ޓެކްސީ ވޭއެއްގެ ގޮތުގައި އައު ރަންވޭ މިހާރު ވެސް ބޭނުންކުރަމުން އަންނަކަމަށެވެ.
ވީއައިއޭގެ 56 ވަނަ އަހަރީ ދުވަސް ފާހަގަކުރުމަށް ވީއައިއޭގައި ބޭއްވި ރަސްމިއްޔާތުގައި އެމްއޭސީއެލްގެ ޑެޕިއުޓީ މެނޭޖިންގ ޑިރެކްޓަރު އިބްރާހިމް ތޯހާ ވިދާޅުވީ މިއަހަރުގެ ދެވަނަ ކުއާޓަރުގައި އާ ސީޕްލޭން ޓަރމިނަލް ހުޅުވޭނެ ކަމަށެވެ. އަދި އާ ފަޔަރ ސްޓޭޝަން ހުޅުވޭނީ ތިން ވަނަ ކުއާޓަރުގައި ކަމަށެވެ.
އޭނާ ވިދާޅުވީ ވީއައިޕީ ބިލްޑިންގ ގެ ފުރަތަމަ ފިޔަވަހި ހުޅުވާފައިވާ ކަމަށާއި ދެވަނަ ފިޔަވަހީގެ މަސައްކަތްތައް މިހާރު ވެސް ކުރިއަށްދާ ކަމަށެވެ. އަދި އާ ކާގޯ ޓަރމިނަލާއި އާ ފިއުލް ފާރމުވެސް މިއަހަރުގެ ތެރޭގައި ހުޅުވޭނެ ކަމަށް ތޯހާ ވިދާޅުވިއެވެ.
ވީއައިއޭގެ އާ ރަންވޭގެ ދިގުމިނުގައި 3،400 މީޓަރު އަދި ފުޅާ މިނުގައި 65 މީޓަރުގެ ހުރެއެވެ. ރަންވޭއަށް ފުރަތަމަ ޓެސްޓު ފްލައިޓު ޖެއްސީ 2018 ވަނަ އަހަރުގެ ސެޕްޓެމްބަރު މަހު 18 ވަނަ ދުވަހުއެވެ. އޭގެ ފަހުން ތިން އަހަރު ވެގެން ދިޔައިރުވެސް އާ ރަންވޭ ރަސްމީކޮށް ބޭނުން ކުރަން ފަށާފައި ނުވިނަމަވެސް މީގެ ކުރިންވެސް އެ ރަންވޭ ފްލައިޓް ޕާކް ކުރަން ވަނީ ބޭނުން ކޮށްފައެވެ.
ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ ވެރިކަމުގައި ހެދި އެ ރަންވޭއަކީ ޗައިނާގެ އެގްޒިމް ބޭންކުން 373 މިލިއަން ޑޮލަރުގެ ލޯނެއް ނަގައިގެން ޗައިނާގެ ބެއިޖިން އާބަން ކޮންސްޓްރަކްޝަން ގުރޫޕް (ބީޔޫސީޖީ) އިން ހަދާފައިވާ ރަންވޭއެކެވެ.
