ރައީސުލްޖުމްހޫރިއްޔާ އަބްދުﷲ ޔާމީން އަންނަ ބުދަ ދުވަހު ޗައިނާއަށް ފުރާވަޑައިގަންނަވާނެކަން ރައީސް އޮފީހުން ކަށަވަރު ކޮށްދީފިއެވެ.
ރައީސް އޮފީހުގެ ތަރުޖަމާން އިބްރާހިމް މުއާޒް ވިދާޅުވީ ރައީސް ޔާމީން ބުދަ ދުވަހު ޗައިނާއަށް ވަޑައިގަންނަވަނީ ޗައިނާގެ ރައީސް ޝީ ޖިންޕިންގެ ދައުވަތަކަށް ކަމަށެވެ. ޗައިނާ ދަތުރުފުޅަށް ފަހު ރައީސް އެނބުރި ރާއްޖެ ވަޑައިގަތުމަށް ހަމަޖެހިފައި ވަނީ އަންނަ ހަފްތާގެ ހޮނިހިރު ދުވަހު ކަމަށްވެސް މުއާޒް ވިދާޅުވިއެވެ.
ރައީސްގެ މިދަތުރުފުޅުގައި ދެގައުމުގެ ވެރިންގެ މެދުގައި ބަޔެއް ކަހަލަ އެއްބަސްވުންތަކުގައި ސޮއި ކުރައްވާނެކަން ކަށަވަރު ކޮށްދިން ނަމަވެސް ސޮއި ކުރައްވަން ހަމަޖެހިފައިވާ އެއްބަސްވުންތަކާބެހޭ ގޮތުން އިތުރު ތަފްސީލެއް މުއާޒް ނުދެއްވައެވެ. އެއްބަސްވުންތަކެއްގައި ސޮއި ކުރެއްވުމުގެ އިތުރުން ދެގައުމުގެ ސިޔާސީ ގުޅުމަށް 45 އަހަރު ފުރުމާއި ދިމާކޮށް ޗައިނާގައި ހުންނަ ދިވެހި އެމްބަސީން ރާވައިގެން ބާއްވާ ރަސްމިއްޔާތެއްގައިވެސް ރައީސް ބައިވެރިވެވަޑައިގަންނަވާނެ ކަމަށް މައުލޫމާތު ލިބިފައިވެއެވެ.
މިއީ ރައީސްކަމާ ހަވާލުވެވަޑައިގެންނެވި ފަހުން ރައީސް ޔާމީން ޗައިނާއަށް ވަޑައިގަންނަވާ ތިންވަނަ ފަހަރެވެ. މީގެކުރިން ވަޑައިގެންފައި ވަނީ 2014 ވަނަ އަހަރާއި 2015 ވަނަ އަހަރުއެވެ.
