އެހެން މަސްމަހަށް ވުރެ މި މަހު ރާއްޖެއަށް ހޫނުގަދަވާނެ ކަމަށް މެޓް އޮފީހުން ބުނެފިއެވެ.
އެ އޮފީހުން ބުނީ މި މަހަކީ ވެސް މިއަހަރުގެ އެންމެ ހޫނުގަދަ މަސް ކަމަށާއި މިމަހުގައި ހޫނުމިން އާންމުގޮތެއްގައި ހުންނާނީ 29.7 ޑިގްރީ ސެލްސިއަލް އާއި 31.5 ޑިގްރީ ދެމެދުގައި ކަމަށެވެ.
މިމަހު އެންމެ ގަދަޔަށް ހޫނު ވާނީ މެންދުރު ފަހު 1:30 އާއި 2:00 ޖެހުމާ ދޭތެރޭގައި ކަމަށް ވެސް އެ އޮފީހުން ބުނެއެވެ.
މިދުވަސްވަރު ހޫނުމިން ގަދަވަނީ ވައި މަޑުވެފައި އޭގެ ސަބަބުން ވައިގެ ތެއްކަން މަތިކޮށް ހިފެހެއްޓިފައި ހުރުމުން ކަމަށް ވެސް މެޓް އޮފީހުން ބުނެއެވެ. އަދި ވައިގެ ހޫނުމިނަށް ވުރެ އިހުސާސް ކުރެވޭ ހޫނުމިން އެތައް ގުނައެއް މަތިވާތީ ކަމަށް ވެސް މެޓް އޮފީހުން ބުނެއެވެ.
އެ އޮފީހުން އިތުރަށް ބުނީ އިރުވައި މޫސުން ހުޅަގަށް ބަދަލުވާއިރު ހޫނު ގަދަވާނެ ކަމަށާއި ކުރިއަށް އޮތް މަހުގައި މޫސުން ގޯސްވެދާނެ ކަމަށެވެ.
