ދެހާހަށްވުރެ ގިނަ މީހުން ޕީޕީއެމްއަށް ސޮއިކޮށް އެފޯމްތައް ޕީޕީއެމްގެ މުސްތަޝާރު، ރައީސް އަބްދުﷲ ޔާމީންއާ މިއަދު ހަވާލު ކޮށްފިއެވެ.
ޕީޕީއެމާ އަލަށް ގުޅުނު ޖުމްލަ 2696 މީހުންގެ ސޮޔާއެކު ފޯމުތައް ހަވާލުކުރުން އޮތީ މިއަދު މެންދުރު ފަހު ދަރުބާރުގޭގައި އޮތް އެޕާޓީގެ ބައްދަލުވުމެއްގައެވެ. "މަވެސް ޕީޕީއެމް" ގެ ނަމުގައި ބޭއްވި މި ބައްދަލުވުމުގައި ދެހާހަށްވުރެ ގިނަ މީހުންގެ ފޯމާ ހަވާލުވެވަޑައިގަތުމަށް ފަހު ރައީސް ޔާމީން ވިދާޅުވީ އެ ހުރިހާ މީހުންވެސް އެޕާޓީއަށް ސޮއި ކުރީ ހިތުގެ އަޑިން އެކަމަށް ރުހިގެން ކަމަށާއި، ޕާޓީއަށް ސޮއި ކުރުމުގައި ކުޑަވެސް މަޖުބޫރު ކަމެއް ނެތް ކަމަށެވެ.
ރައީސް ވިދާޅުވީ ދެހާހަށްވުރެ ގިނަ މީހުންގެ ފޯމު މިއަދުގެ ބައްދަލުވުމާ ހަމައަށް ގެނެވުނީ ވަރަށް ގިނަ ދުވަހުން ކަމަށާއި އެއީ ގިނަބަޔެއްގެ މަސައްކަތް ކަމަށެވެ. އަދި އެއިން ކޮންމެ މީހަކުވެސް ޕީޕީއެމަށް އައީ އެބޭފުޅުންގެ އަމިއްލަ ޝައުގުވެރިކަން ޕީޕީއެމާ ދިމާލަށް އޮތުމުން ކަމަށްވެސް ރައީސް ވިދާޅުވިއެވެ.
