ޔުކްރޭންެގެ ވެރިރަށް ކިޔީވް ކައިރީގައި އޮންނަ ބުޗާ އަވަށުގައި ރަޝިޔާ ސިފައިން ރަހުމްކުޑަ ގަތުލު އާއްމެއް ހިންގާފައިވާ ކަމުގެ ޚަބަރުތަކާއެކު ޔޫރަޕުގެ ގައުމުތަކުން ރަޝިޔާއާ ދެކޮޅަށް ފިޔަވަޅު އަޅައި ޑިޕްލޮމޭޓުން ފޮނުވާލުމުގެ އޮއިވަރެއް ވަނީ ފެށިފައެވެ. އެގޮތުން ފާއިތުވި 48 ގަޑިއިރުގެ ތެރޭގައި ޔޫރަޕުގެ އެކި ގައުމުތަކުން ރަޝިޔާގެ 200 އެއްހާ ޑިޕްލޮމޭޓުން ވަނީ ބޭރުކޮށްލައިފައެވެ.
ހޯމަ ދުވަހު ޖަރުމަނުން ރަޝިޔާގެ 40 ޑިޕްލޮމޭޓުން ބޭރުކޮށްލައިވާއިރު، ފްރާންސުން 35 ޑިޕްލޮމޭޓުން އަދި އިޓަލީން 30 ޑިޕްލޮމޭޓުން ވަނީ ބޭރުކޮށްފައެެވެ. މީގެ އިތުރަށް އަންގާރަ ދުވަހު ސްޕޭން، ޑެންމާކް، ލެޓްވިޔާ، ސްވިޑަން އަދި ސްލޮވީނިޔާއިން ވަނީ ރަޝިޔާގެ ގިނަ އަދަދެއްެގެ ޑިޕްލޮމޭޓުން ބޭރުކޮށްފައެވެ. މިގައުމުތަކުން ޑިޕްލޮމޭޓުން ބޭރުކުރުމުގެ ސަބަބަކަށް ދައްކާފައި ވަނީ ޖާސޫސުކުރުމާއި، ގައުމީ ސަލާމަތަށް ނުރައްކާވުމެވެ.
ޔޫރަޕުގެ ގައުމުތަކުން ރަޝިޔާއާ ދެކޮޅަށް ޑިޕްލޮމެޓިކް ގޮތުން ފިޔަވަޅު އަޅަމުން ދާއިރު، ޔޫރަޕިއަން ޔުނިއަން (އީޔޫ) އިންވެސް ވަނީ ފިޔަަވަޅު އަޅާފައެވެ. އީޔޫގެ ހައި ރެޕްރެޒެންޓެޓިވް ފޯ ފޮރިން އެފެއާޒް އެންޑް ސެކިއުރިޓީ ޕޮލިސީ ޖޯސެޕް ބޮރެލް ވިދާޅުވި ގޮތުގައި އީޔުގެ އެކި މުއައްސަސާތަކުގައި މަސައްކަތްކުރާ ރަޝިޔާގެ ގިނަ އަދަދެއްގެ ޑިޕްލޮމޭޓުން އެމީހުންގެ ޑިޕްލޮމެޓިކް ހައިސިއްޔަތާ ފުށުއަރާ އަމަލުތަކެއް ހިންގާތީ، ބައިތިއްބަން ބޭނުންނުވާ ބައެއް ކަމަށް ކަނޑައަޅައި ފޮނުވާލަން ވަނީ ނިންމާފައެވެ. އެހެންނަމަވެސް އެމީހުން ފޮނުވާލާނެ ދުވަހެއް އޭނާ ހާމަނުކުރައްވައެވެ.
ޔޫކްރޭނަށް ރަޝިޔާ ސިފައިން އެރުމާއެކު ގޯސްވެފައިވާ ރަޝިޔާއާއި ޔޫރަޕުގެ ގުޅުން އިތުރަށް ގޯސްވެގެން މިދިޔައީ ބުޗާގެ ގަތުލުއާއްމުގެ ވާހަކަ ފެތުރުނު ހިސާބުންނެެވެ. ކިޔީވްގެ ހުޅަނގު އުތުރަށް އޮންނަ ކުޑަ އަވަށެއް ކަމުގައިވާ ބުޗާއިން ރަޝިޔާ ސިފައިން ފައިބައިގެން ދިޔައިރު، ގިނަ އަދަދެއްގެ ބަޔަކު މަރާފައި ވަޅުގަނޑުތަކަށް އަޅައި ވަޅުލާފައިވާ ކަމާއި، ރަށުތެރޭ އެތަން މިތަނުގައި އެތައް ބަަޔަކު މަރުވެފައި ވާކަމުގެ ޚަބަރުތައް ވަނީ ފެތުރިފައެވެ. ބުނެވޭ ގޮތުގައި މި ގަތުލުއާއްމުގައި 300 އަށްވުރެ ގިނަ މީހުން މަރުވެފައި ވެއެވެ.
އެ އަވަށުގެ ގިނަ ބަޔަކު ގަތުލު އާއްމުގެ މަންޒަރު ލޮލުން ދުށްކަމަށް ބުނެ، އެކަމަށް ހެކިދެމުން ދާއިރު، ރަޝިޔާއިން ވަނީ އެފަދަ ކަމެއް ހިނގާފައިވާކަން ދޮގުކޮށްފައެވެ.
ފާއިތުވި ފެބުރުވަރީ މަހުގެ 24 ވަނަ ދުވަހު ރަޝިޔާ ސިފައިން ޔުކްރޭނަށް އަރައިގަތުމަށް ފަހު، ދޮޅު މަހެއްހާ ދުވަސްވެފައި ވާއިރު، މި ހަނގުރާމަ މިހާރު ވެފައިވަނީ ދެވަނަ ބޮޑު ހަނގުރާމައަށް ފަހު ޔޫރަޕަަށް ކުރިމަތިވި އެންމެ ބޮޑު އިންސާނީ ކާރިސާއަށެވެ.
